ໃນວັນທີ 24 ກັນຍາ 2019 ທ່ານ ປອ ສຸວັນນີ ໄຊຊະນະ ປະທານສະພາປະຊາຊົນແຂວງ ພ້ອມດ້ວຍຄະນະ ໄດ້ລົງເຄື່ອນໄຫວຕິດຕາມຊຸກຍູ້ ແລະ ເຮັດວຽກ ຢູ່ເມືອງປາກກະດິງ ໂດຍມີການນຳຂອງເມືອງ, ສະມາຊິກສະພາປະຊາຊົນແຂວງປະຈຳເຂດເລືອກຕັ້ງຂອງເມືອງ, ຫົວໜ້າຫ້ອງການອ້ອມຂ້າງເມືອງ, ກຳລັງປກຊ-ປກສ ຕະຫລອດຮອດພະນັກງານ-ລັດຖະກອນ ພາຍໃນເມືອງເຂົ້າຮ່ວມ.

    ທ່ານ ສົມພອນ ຈັນທະນາສຸກ ເຈົ້າເມືອງປາກກະດິງ ໄດ້ລາຍງານກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ການກະກຽມຄວາມພ້ອມໃນການຈັດກອງປະຊຸມ 3 ຂັ້ນຂອງເມືອງ ເວົ້າລວມ-ເວົ້າສະເພາະ ກໍແມ່ນບັນດາເນື້ອໃນ, ບັນດາຂໍ້ມູນຕ່າງໆ ແລະ ສະພາບການ ທີ່ນອນຢູ່ໃນແຕ່ລະຂົງເຂດຂອງເມືອງ. ໃນໂອກາດດັ່ງກ່າວທ່ານປະທານ ຍັງໄດ້ສະແດງຄວາມຍ້ອງຍ້ອງຍໍຊົມເຊີຍຕໍ່ການຈັດຕັ້ງຂອງເມືອງທີ່ໄດ້ເອົາໃຈໃສ່ໃນການຊີນໍາ-ນໍາພາ ເຮັດໃຫ້ເມືອງຂອງຕົນໄດ້ມີການພັດທະນາຂຶ້ນຢ່າງບໍ່ຢຸດຢັ້ງ. ພ້ອມນີ້ສະມາຊິກສະພາປະຊາຊົນແຂວງ ຍັງໄດ້ນຳເອົາເນື້ອໃນຈິດໃຈຂອງມະຕິກອງປະຊຸມສະພາແຫ່ງຊາດ ແລະ ມະຕິກອງປະຊຸມຂອງສະພາປະຊາຊົນແຂວງ ໂດຍສະເພາະກໍ່ແມ່ນການຈັດສັນງົບປະມານຂອງລັດເຂົ້າໃນໜ້າວຽກ, ຕົວເລກລັດຖະກອນຂອງຂະແໜງການ, ການຈັດສັນບຸກຄະລາກອນຕ່າງໆ, ສະພາບການຈັດຕັ້ງປະຕິບັດກົດໝາຍ ແລະ ນິຕິກໍາໃຕ້ກົດໝາຍ ກ່ຽວກັບການສ້າງວິຊາຊີບ ແລະ ການພັດທະນາວີຊາຊີບ ທີ່ຕິດພັນກັບການສ້າງວຽກເຮັດງານທໍາໃຫ້ພໍ່ແມ່ປະຊາຊົນ ເພື່ອປັບປຸງຊີວິດການເປັນຢູ່ຂອງພໍ່ແມ່ປະຊາຊົນ ແລະ ມີການປະສານສົມທົບກັບພາກສ່ວນກ່ຽວຂ້ອງຄືແນວໃດ, ການຕິດຕາມກວດກາ, ການແກ້ໄຂຄໍາສະເໜີ, ຄໍາຮ້ອງຂໍຄວາມເປັນທໍາຂອງປະຊາຊົນ ມີຂໍ້ສະດວກ, ຂໍ້ຫຍຸ້ງຍາກ ແລະ ສິ່ງທ້າທາຍຄືແນວໃດ ແລະ ຈະຫາວິທີການແກ້ໄຂແນວໃດ ໃຫ້ສາມາດບັນລຸຄາດໝາຍ ຮອດທ້າຍປີ 2019 ແລະ ທິດທາງແຜນການ ຮອດປີ 2020. ຕິດພັນກັບການລົງເຄື່ອນໄຫວຄັ້ງນີ້ ທ່ານປະທານ ພ້ອມດ້ວຍຄະນະ ຍັງໄດ້ລົງພົບປະຢ້ຽມຢາມ ຊຸກຍູ້ການຈັດຕັ້ງປະຕິບັດວຽກງານຂອງໂຄງການກໍ່ສ້າງເຂື່ອນໄຟຟ້ານໍ້າເທີນ 1 ຢູ່ໃນຂົງເຂດເມືອງປາກກະດິງ.