ເພື່ອເປັນການສ້າງພື້ນຖານໂຄງລ່າງບ້ານ ໃຫ້ມີຄວາມເຂັ້ມແຂງ, ມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍໃນສັງຄົມ ເຮັດໃຫ້ພໍ່ແມ່ປະຊາຊົນທຳມາຫາກິນແບບສຸດຈະລິດ ບໍ່ພົວພັນກັບສິ່ງເສບຕິດ, ຫຼີ້ນການພະນັນ, ບໍ່ຜິດຜົວ-ຜິດເມຍ, ຜິດລູກ ສ້າງຄວາມແຕກແຍກໃນຄອບຄົວ, ຍ້ອນເຫັນໄດ້ຄວາມໝາຍຄວາມສຳຄັນຂອງວຽກງານດັ່ງກ່າວນັ້ນ ໃນທ້າຍອາທິດທີ່ຜ່ານນີ້, ກອງບັນຊາການ ປກສ ເມືອງທ່າພະບາດ ແຂວງບໍລິຄຳໄຊ ໄດ້ສືບຕໍ່ລົງເຮັດວຽກງານສ້າງຄອບຄົວ ແລະ ບ້ານປ້ອງກັນຄວາມສະຫງົບດີ ໃຫ້ແກ່ບ້ານ ນ້ຳໂລ້ ແລະ ບ້ານສີສົມໄຊ ເມືອງທ່າພະບາດ ແຂວງບໍລິຄຳໄຊ ຢູ່ທີ່ອາຣາມວັດບ້ານ ນ້ຳໂລ້ ໂດຍເປັນກຽດເຂົ້າຮ່ວມເປັນປະທານຂອງ ທ່ານ ຄຳປຸ່ນ ສີຫາລາດ ຮອງເຈົ້າເມືອງທ່າພະບາດ, ມີ ທ່ານ ພັນໂທ ປອ ຄຳຜັນ ບຸນມີໄຊ ຫົວໜ້າກອງບັນຊາການ ປກສ ເມືອງທ່າພະບາດ, ມີຄະນະພັກກອງບັນຊາການ ປກສ ເມືອງ, ປກສ ບໍລິການປະຊາຊົນ, ອໍານາດການປົກຄອງບ້ານ-ນາຍບ້ານ, ພໍ່ແມ່ປະຊາຊົນ ແລະ ແຂກທີ່ຖືກເຊີນ  ເຂົ້າຮ່ວມ.

          ການສືບຕໍ່ລົງສ້າງຄອບຄົວ ແລະ ບ້ານປ້ອງກັນຄວາມສະຫງົບດີຂອງ ປກສ ເມືອງທ່າພະບາດ ໃນຄັ້ງນີ້ໄດ້ນຳເອົາເອກະສານແຜນການສ້າງຄອບຄົວ ແລະ ບ້ານປ້ອງກັນຄວາມສະຫງົບດີ, ເອກະສານບົດບັນທຶກສັນຍາກ່ຽວກັບວຽກງານຮັກສາຄວາມສະຫງົບ, ເອກະສານຂໍ້ແຂ່ງຂັນການສ້າງຄອບຄົວ ແລະ ບ້ານປ້ອງກັນຄວາມສະຫງົບດີ, ເອກະສານລະບຽບສາຍພົວພັນພາຍໃນບ້ານ ແລະ ເອກະສານທີ່ສຳຄັນຕ່າງໆອີກຈຳນວນໜື່ງ ເຊິ່ງບັນດາທ່ານໄດ້ກ່າວວ່າ ແຜນສ້າງຄອບຄົວ ແລະ ບ້ານປ້ອງກັນຄວາມສະຫງົບດີ ແມ່ນເພື່ອເປັນການຫັນເອົາແນວທາງນະໂຍບາຍຂອງພັກລະບຽບກົດໝາຍຂອງລັດ ກໍ່ຄືວຽກງານປ້ອງກັນຊາດ-ປ້ອງກັນຄວາມສະຫງົບ ລົງສູ່ຮາກຖານບ້ານ, ຫົວໜ່ວຍຄອບຄົວ ໂດຍປະຊາຊົນພາຍໃນບ້ານ ຕ້ອງໄດ້ເປັນເຈົ້າການໃນການປະຕິບັດແນວທາງວຽກງານປ້ອງກັນຊາດ-ປ້ອງກັນຄວາມສະຫງົບ ໃຫ້ເປັນຂະບວນການທົ່ວປວງຊົນຮອບດ້ານ, ສ້າງຄອບຄົວ ແລະ ບ້ານຂອງຕົນໃຫ້ກາຍເປັນຄອບຄົວ ແລະ ບ້ານປ້ອງກັນຄວາມສະຫງົບດີ, ໂດຍອີງໃສ່ 06 ມາດຖານເງື່ອນໄຂເປັນຫຼັກ ຖ້າຄອບຄົວ ຫຼື ບຸກຄົນໃດບໍ່ຟັງຄວາມການຈັດຕັ້ງ, ບໍ່ເຄົາລົບລະບຽບກົດໝາຍຂອງບ້ານເມືອງ ຈະຕ້ອງໄດ້ນໍາມາສຶກສາອົບຮົມ ຫຼື ປະຕິບັດວິໄນຕໍ່ຜູ້ລະເມີດ, ທຸກຄອບຄົວທີ່ດໍາລົງຊີວິດຢູ່ພາຍໃນບ້າ່ນ ຕ້ອງໄດ້ເປັນເຈົ້າການສ້າງບົດບັດທຶກຂໍ້ແຂ່ງຂັນໃນການສ້າງຄອບຄົວ ແລະ ບ້ານປ້ອງກັນຄວາມສະຫງົບດີ, ການເຄື່ອນໄຫວໃນການປະກອບອາຊີບໃດໜື່ງຕ້ອງໃຫ້ສອດຄ່ອງ ແລະ ຖືກຕ້ອງຕາມລະບຽບກົດໝາຍ, ຖືກຕ້ອງຕາມແນວທາງນະໂຍບາຍຂອງພັກ-ລັດ ວາງອອກ ຫຼື ຖືກຕ້ອງຕາມຮີດຄອງປະເພນີອັນດີງາມຂອງບ້ານເມືອງ.