ພິທີເຊັນສັນຍາສຳປະທານໂຄງການພັດທະນາກະສິກຳ ປູກໝາກຜຸກ (ໝາກກ້ຽງໃຫຍ່) ໄດ້ຈັດຂຶ້ນໃນວັນທີ 8 ຕຸລາ 2019 ຢູ່ຫ້ອງປະຊຸມພະແນກແຜນການ ແລະ ການລົງທຶນແຂວງ ຕາງໜ້າອຳນາດການປົກຄອງແຂວງບໍລິຄຳໄຊ ເຊັນໂດຍ ທ່ານ ເລື່ອນວິໄລ ຈັນທະລາພັນ ຫົວໜ້າພະແນກແຜນການ ແລະ ການລົງທຶນແຂວງ, ຕາງໜ້າບໍລິສັດຜູ້ລົງທຶນພັດທະນາ ເຊັນໂດຍ ທ່ານ ຕານ ເວັນເຈຍ ປະທານບໍລິສັດ ເຖີງຢູ ພັດທະນາປູກໝາກໄມ້ ຈຳກັດຜູ້ດຽວ ຊ້ອງໜ້າໂດຍ ທ່ານ ບຸນເສັງ ປະທຳມະວົງ ຮອງເຈົ້າແຂວງບໍລິຄຳໄຊ ພ້ອມດ້ວຍບັນດາຫົວໜ້າພະແນກການ, ເມືອງ ແລະ ພະນັກງານວິຊາການ ເຂົ້າຮ່ວມເປັນສັກຂີພິຍານ. 

     ບໍລິສັດດັ່ງກ່າວ ມີຄວາມຕ້ອງການສຳປະທານທີ່ດິນ ເພື່ອປູກໝາກຜຸກ ຢູ່ເຂດ ບ້ານນາໄໝ ເມືອງປາກຊັນ, ເນື້ອທີ່ສໍາປະທານຈຳນວນ 162,77 ເຮັກຕ່າ, ​ ​ເວລາ​ໃນ​ການສຳປະທານ 30 ປີ, ເລີມແຕ່ 8 ຕຸລາ 2019 ຫາ 8 ຕຸລາ 2049.

     ຫຼັງຈາກນັ້ນ ກໍ່ໄດ້ມີພິທີເຊັນສັນຍາສຳປະທານໂຄງການພັດທະນາກະສິກຳ ປູກໝາກຜຸກ ຢູ່ເຂດບ້ານຫ້ວຍຊາຍ ເມືອງປາກຊັນ ໃນເນື້ອທີ່ດິນ 98,61 ເຮັກຕ່າ, ໄລຍະເວລາສຳປະທານ 30 ປີ ເລີມແຕ່ 8 ຕຸລາ 2019 ຫາ 8 ຕຸລາ 2049. ຕາງໜ້າອຳນາດການປົກຄອງແຂວງບໍລິຄຳໄຊ ເຊັນໂດຍ ທ່ານ ເລື່ອນວິໄລ ຈັນທະລາພັນ ແລະ ຕາງໜ້າບໍລິສັດຜູ້ລົງທຶນພັດທະນາ ເຊັນໂດຍ ທ່ານ ລີຊາວຢີ່ງ ປະທານບໍລິສັດ ຈື່ຢີ່ງ ຈຳກັດຜູ້ດຽວ.