ເພື່ອເຮັດໃຫ້ງານບຸນອອກພັນສາປະວໍລະນາປີ ພສ 2562 ທີ່ຈະມາເຖິງນີ້ ຮັບປະກັນໄດ້ເຖິງຄວາມສະຫງົບປອດໄພ ແລະ ໄດ້ຮັບຜົນສຳເລັດຢ່າງຈົບງາມ ມາໃນວັນທີ 08 ຕຸລາ 2019 ຢູ່ກອງບັນຊາການ ປກສ ເມືອງປາກຊັນ ທ່ານ ພັນໂທ ລາຕີ ພິລາວົງ ຫົວໜ້າກອງບັນຊາການ ປກສ ເມືອງປາກຊັນ ໄດ້ໃຫ້ສຳພາດຕໍ່ສື່ມວນຊົນ ກ່ຽວກັບການຮັກສາຄວາມສະຫງົບໃນງານບຸນອອກພັນສາປີນີ້ ວ່າ: ຄວາມພ້ອມໃນຈັດຕັ້ງປະຕິບັດໃນງານບຸນອອກພັນສາປີນີ້ ທາງກອງບັນຊາການ ປກສ ເມືອງປາກຊັນ ແມ່ນໄດ້ສຶກສາອົບຮົມການເມືອງຄິດໃຫ້ອ້າຍນ້ອງພະນັກງານໃນກອງບັນຊາການໄດ້ຮັບຮູ້ເຂົ້າໃຈ ເຖິງຄວາມສຳຄັນໃນການກະກຽມໃນງານຄັ້ງນີ້.

          ເພື່ອເປັນການຮັກສາຄວາມສະຫງົບໃຫ້ໄດ້ໂດຍພື້ນຖານນັ້ນ ໄດ້ຈັດແບ່ງກຳລັງລົງຕາມຈຸດຕ່າງໆ ເກືອບ 20 ຈຸດ ເພື່ອຕິດຕາມ ແລະ ແກ້ໄຂສະພາບໃຫ້ທັນເວລາ ໂດຍສະເພາະຈຸດທີ່ເປັນແຍກ, ເຂດຊຸມຊົນ, ງານບຸນ ນອກນັ້ນ ຍັງໄດ້ແຈ້ງການລົງໄປແຕ່ລະບ້ານກ່ຽວກັບກົດລະບຽບ ຂໍ້ຫ້າມຕ່າງໆ ຂອງການຫຼິ້ນບຸນ ໂດຍຈະມີມາດຕະການຢ່າງເດັດຂາດຕໍ່ກັບຜູ້ລະເມີດ, ເພື່ອຮັບປະກັນຕໍ່ວຽກງານດັ່ງກ່າວ ປກສ ເມືອງປາກຊັນ ຈະໄດ້ສຸມໃສ່ 3 ບັນຫາໃຫຍ່ ຄື: ຮັກສາຄວາມສະຫງົບປອດໄພ ຄວາມເປັນລະບຽບຮຽບຮ້ອຍໃນງານບຸນ ໂດຍສະເພາະພະນັກງານການນຳ, ແຂກທັງພາຍໃນ ແລະ ຕ່າງປະເທດ ໃຫ້ມີຄວາມຄວາມສະຫງົບປອດໄພ; ການລະບາຍການສັນຈອນຫຼີກລ້ຽງອຸບັດເຫດ ການແອອັດຂອງລົດ ແລະ ການຈອດລົດຊະຊາຍຕາມແຄມທາງ.

      ທ່ານຍັງກ່າວຕື່ມອີກວ່າ ເສັ້ນທາງເຂົ້າງານບຸນ ມີ 3 ເສັ້ນ: ມື້ທີໜຶ່ງ ແມ່ນຈະໄດ້ກຳນົດເອົາເສັ້ນກາງເປັນທາງເຂົ້າງານ ແລ້ວເອົາເສັ້ນທາງຫ້ອງວ່າການປົກຄອງເມືອງປາກຊັນ ເປັນທາງອອກ ສ່ວນເສັ້ນແຄມນ້ຳຊັນແມ່ນປິດ ຈົນສຳເລັດງານ ໂດຍກຳນົດເອົາສູນຊາວໜຸ່ມແຂວງເປັນບ່ອນຝາກລົດ, ສຳລັບມື້ທີສອງ ແມ່ນເອົາເສັ້ນຫ້ອງວ່າການປົກຄອງເມືອງປາກຊັນເປັນທາງເຂົ້າ ແລະ ເອົາເສັ້ນກາງເປັນທາງອອກ, ທ່ານຍັງໄດ້ຮຽກຮ້ອງມາຍັງປະຊາຊົນບັນດາເຜົ່າ ເປັນເຈົ້າການໃນການຮັກສາຄວາມສະຫງົບ ພ້ອມທັງໃຫ້ຄວາມຮ່ວມມືກັບເຈົ້າທີ່ໃນການປະຕິບັດວຽກງານໃນຄັ້ງນີ້ດ້ວຍ.