ເພື່ອເປັນການສະເຫລີມສະຫລອງວັນຄູແຫ່ງຊາດ 7 ຕຸລາ ທີ່ໝູນວຽນມາຄົບຮອບອີກວາລະໜຶ່ງ ໃນຕອນເຊົ້າຂອງວັນທີ 3 ຕຸລາ 2019 ນີ້ ຢູ່ສະໂມສອນປົກຄອງເມືອງປາກຊັນ ໄດ້ຈັດພິທີປາຖະກະຖາເລົ່າຫວນຄືນມູນເຊື້ອວັນຄູແຫ່ງຊາດ ຄົບຮອບ 25 ປີ ເປັນກຽດເຂົ້າຮ່ວມຂອງທ່ານ ໄມຈອມ ວັນນະສານຄຳ ກຳມະການພັກແຂວງເລຂາຄະນະບໍລິຫານງານພັກເມືອງ, ເຈົ້າເມືອງປາກຊັນ, ມີບັນດາການນຳຂອງເມືອງ, ຫົວໜ້າຫ້ອງການ, ອຳນວຍການໂຮງຮຽນ, ພະນັກງານຄູອາຈານໂຮງຮຽນອານຸບານສຶກສາ, ປະຖົມ, ມັດທະຍົມ ພ້ອມດ້ວຍນັກຮຽນພາຍໃນເມືອງປາກຊັນ ເຂົ້າຮ່ວມ.

    ທ່ານ ນາງ ສຸພີ ເລືອງຕະກຸນ ຮັກສາການຫົວໜ້າຫ້ອງການສຶກສາທິການ - ກິລາເມືອງປາກຊັນ ໄດ້ໃຫ້ກຽດຂຶ້ນເລົ່າເຖີງມູນເຊື້ອ ແລະ ປະຫວັດຄວາມເປັນມາ ຂອງວັນຄູ ເຊິ່ງປີນີ້ຄົບຮອບ 25 ປີ ( 7 ຕຸລາ ປີ 1994 – 7 ຕຸລາ 2019 ) ເປັນວັນທີ່ມີຄວາມໝາຍຄວາມສຳຄັນຂອງຊາດລາວ. 7 ຕຸລາ ເປັນວັນຄູແຫ່ງຊາດ ທີ່ຄູທຸກໆຄົນເອກອ້າງທະນົງໃຈ ເພາະເປັນວັນທີ່ເຮັດໃຫ້ມວນມະນຸດ ໄດ້ດຳເນີນການພັດທະນາຕົນເອງ ໃຫ້ມີຄວາມກ້າວໜ້າໄປຢ່າງບໍ່ຢຸດຢັ້ງ, ເຮັດໃຫ້ສັງຄົມມະນຸດ ໄດ້ມີການປ່ຽນຈາກລະບອບນີ້ ໄປສູ່ລະບອບສັງຄົມອື່ນ ໃນຂະບວນວິວັດພັດທະນາການດັ່ງກ່າວ ຄູໄດ້ມີບົດບາດປະກອບສ່ວນອັນສໍາຄັນທີ່ບໍ່ມີໃຜ ແລະ ຊັ້ນຄົນໃດຈະປະຕິເສດໄດ້, ຄຳວ່າ “ຄູ” ແມ່ນຄໍາເວົ້າທີ່ສືບທອດກັນຫຼາຍເຊັ່ນຄົນມາແລ້ວ  “ຄູ”ໝາຍເຖິງຄົນທີ່ມີຄວາມຮູ້ ແລະ ປະສົບການ ເຊິ່ງຜູ້ນັ້ນສາມາດໄປຖ່າຍທອດຄວາມຮູ້ ແລະ ປະສົບການນັ້ນໄປສູ່ຜູ້ອື່ນໆ, ຮູບການຖ່າຍທອດຄວາມຮູ້ຈາກຜູ້ຮູ້ໄປສູ່ຜູ້ບໍ່ຮູ້ ເອີ້ນວ່າ: “ການສອນ ແລະ ການຮຽນ”. ສຳລັບປະເທດລາວເຮົາ ເມື່ອເວົ້າເຖິງການສອນ-ການຮຽນ ຫຼື ເວົ້າລວມແມ່ນການສຶກສາ ຖ້າຈະປຽບທຽບບາດກ້າວເລີ່ມຕົ້ນຂອງພວກເຮົາ ກັບການຂະຫຍາຍຕົວຂອງໂລກໃນເວລານັ້ນ ແມ່ນພວກເຮົາຍັງຢູ່ຫ່າງໄກຈາກຄວາມຈະເລີນຂອງໂລກຫຼາຍທີ່ສຸດ. ວັນຄູແຫ່ງຊາດລາວ ໄດ້ຖືກປະກາດໃຊ້ຕັ້ງແຕ່ວັນທີ 7 ຕຸລາ ປີ 1994 ເປັນຕົ້ນມາ ຈົນຮອດປະຈຸບັນເມື່ອຮອດວັນທີ 7 ຕຸລາຂອງທຸກໆປີ ຈະມີພິທີການເລົ່າປະຫວັດ ແລະ ອວຍພອນຄູຂຶ້ນໃນທຸກໆໂຮງຮຽນທົ່ວປະເທດ ເພື່ອສັນລະເສີນຄຸນງາມຄວາມດີຂອງນາຍຄູຄຳ ແລະ ຄູໃນທົ່ວປະເທດ ທີ່ໄດ້ເອົາໃຈໃສ່ສຶກສາອົບຮົມບົ່ມສອນລູກຫຼານ ໃຫ້ກາຍເປັນຄົນດີຂອງສັງຄົມ, ປະກອບສ່ວນເຂົ້າໃນການສ້າງສາ ແລະ ພັດທະນາປະເທດຊາດສືບຕໍ່ໄປ.

    ໃນພິທີດັ່ງກ່າວ ເພື່ອເປັນການຍ້ອງຍໍສັນລະເສີນຜົນງານຂອງ ຄູ, ອາຈານ  ແລະ ບຸກຄົນທີ່ມີຜົນງານດີເດັ່ນ ປະກອບສ່່ວນເຂົ້າໃນພາລາກິດຂອງວຽກງານການສຶກສາ ແລະ ກິລາ ຈຶ່ງໄດ້ຖືໂອກາດນີ້ ຈັດພິທີມອບໃບກຽດຕິຄຸນ, ໃບຍ້ອງຍໍ ແລະ ໃບຊົມເຊີຍ ໃຫ້ແກ່ຄູອາຈານ ຈາກໂຮງຮຽນຂັ້ນຕ່າງໆໃນທົ່ວເມືອງປາກຊັນ ແລະ ໃນຕອນທ້າຍຂອງພິທີຜູ້ເຂົ້າຮ່ວມຍັງໄດ້ຮັບຟັງການໂອລົມຂອງ ທ່ານ ໄມຈອມ ວັນນະສານຄຳ ເຈົ້າເມືອງປາກຊັນ ເຊີ່ງກ່ອນອື່ນໝົດ ທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານຂອງຄູອາຈານທີ່ຍາດມາໄດ້ ແລະ ຈົ່ງພ້ອມກັນຮັກສາມູນເຊື້ອອັນສູງສົ່ງນີ້ໄວ້ໃຫ້ຍາວນານ ຄຽງຄູ່ກັບການສ້າງສາ ແລະ ພັດທະນາ ເວົ້າລວມ, ເວົ້າສະເພາະ ແມ່ນວຽກງານການສຶກສາໃຫ້ມີພາລະບົດບາດອັນໂດດເດັ່ນກ້ວາງຂວາງ, ສາມາດຊີ້ນຳນຳພາ ແລະ ເອົາໃສ່ໃນການສິດສອນ ຖ່າຍທອດບົດຮຽນໃຫ້ແກ່ລຸ່ນຫຼັງ ແລະ ສາມາດສຶກສາອົບຮົມບົ່ມສອນລູກຫຼານ ໃຫ້ກາຍເປັນຄົນດີຂອງສັງຄົມ, ປະກອບສ່ວນເຂົ້າໃນການສ້າງສາ ແລະ ພັດທະນາປະເທດຊາດສືບໄປໃຫ້ດີຂຶ້ນເທື່ອລະກ້າວ.

    ໃນວັນດຽວກັນ ທີ່ ມສ ຈອມທອງ ເມືອງວຽງທອງ ແຂວງບໍລິຄຳໄຊ ກໍໄດ້ຈັດພິທີສະເຫລີມສະຫລອງວັນຄູແຫ່ງຊາດ ໂດຍການໃຫ້ກຽດເຂົ້າຮ່ວມ ຂອງຄະນະນຳຫ້ອງການສຶກສາທິການ ແລະ ກິລາເມືອງ, ມີຄູອາຈານ ນ້ອງນັກຮຽນ ແລະ ແຂກຖືກເຊີນ ເຂົ້າຮ່ວມ.

ພິທີສະເຫລີມສະຫລອງວັນຄູແຫ່ງຊາດ ມສ ຈອມທອງ