ພິທີສະເຫຼີມສະຫລອງວັນຄູແຫ່ງຊາດ ຄົບຮອບ 25 ປີ ທົ່ວແຂວງບໍລິຄຳໄຊ ກໍ່ໄດ້ສູມໃສ່ການສະເຫຼີມສະຫຼອງຢ່າງເປັນຂະບວນຟົດຟື້ນ ແລະ ມ່ວນຊື່ນ ຖືເປັນປາງບູນໃຫຍ່ອັນໜື່ງຂອງຊາດ ໂດຍສະເພາະແມ່ນເມືອງຄຳເກີດ ໄດ້ຈັດຂື້ນໃນວັນທີ 4 ຕຸລາ 2019 ຢູ່ທີ່ໂຮງຮຽນ ມສ ໂພນຕານ ເມືອງຄຳເກີດ ເປັນກຽດເຂົ້າຮ່ວມ ແລະ ປາຖະກະຖາ ວັນຄູແຫ່ງຊາດໂດຍ ທ່ານ ວິໄລ ສີສະມຸດ ຮອງເລຂາພັກເມືອງ ປະທານກວດກາພັກ-ລັດເມືອງຄຳເກີດ ມີບັນດາຫົວໜ້າຫ້ອງການ,ຄູ-ອາຈານ ແລະ ນ້ອງນັກຮຽນທົ່ວເມືອງເຂົ້າຮ່ວມ.

       ທ່ານ ວິໄລ ສີສະມຸດ ໄດ້ກ່າວບາງຕອນວ່າ: ຄູຄືແມ່ພີມຂອງຊາດ ເປັນຜູ້ສິດສອນ ແລະ ແບ່ງປັນຄວາມຮູ້, ປະສົບການ ແລະ ຄວາມສາມາດຕ່າງໆໃຫ້ແກ່ນັກຮຽນ ເພື່ອໃຫ້ກາຍເປັນຄົນດີມີຄວາມຮູ້, ຄວາມສາມາດປະກອບສ່ວນໃນ      ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ. ພ້ອມກັນນັ້ນ, ຄູຕ້ອງເອົາໃຈໃສ່ໃນການສຶກສາຄົ້ນຄວ້າຮຽນຮູ້ສິ່ງໃໝ່ ເພື່ອມາປະດັບ ຄວາມຮູ້, ຄວາມສາມາດຂອງຕົນໃຫ້ທັນກັບການພັດທະນາຂອງວິທະຍາສາດ ແລະ ເຕັກໂນໂລຊີ, ຄູເປັນຜູ້ສິດສອນຄວາມຮູ້ໃຫ້ແກ່ສັງຄົມຕັ້ງແຕ່ເດັກຈົນຮອດໃຫຍ່ ແລະ ເປັນຜູ້ໃຫ້ຄວາມຈະເລີນຂອງປະເທດຊາດ ໂດຍບໍ່ຫວັງສີ່ງຕອບແທນ ສະນັ້ນຄູຕ້ອງໄດ້ເປັນແບບຢ່າງ ໃນການເວົ້າຈາ, ຄວາມຮູ້, ຄວາມສາມາດ, ການດຳລົງຊີວິດປະຈຳວັນ, ຕ້ອງມີຈັນຍາບັນຈັນຍາທຳທີ່ດີ ໃຫ້ສົມຄຳວ່າ: '' ແມ່ພີມຂອງຊາດ''.