ພິທີຕ້ອນຮັບການມາຢ້ຽມຢາມຂອງທ່ານຮອງນາຍັກລັດຖະມົນຕີ ສອນໄຊ ສີພັນດອນ ໄດ້ຈັດຂຶ້ນໃນຕອນເຊົ້າຂອງວັນທີ 04 ຕຸລາ 2019 ຢູ່ຫ້ອງປະຊຸມຫ້ອງວ່າການປົກຄອງແຂວງບໍລິຄຳໄຊ  ເປັນກຽດຕ້ອນຮັບຢ່າງອົບອຸ່ນຈາກທ່ານ ປອ ກອງແກ້ວໄຊສົງຄາມ ເຈົ້າແຂວງບໍລິຄຳໄຊ ພ້ອມດ້ວນຄະນະນຳຂອງແຂວງ.

      ການມາຢ້ຽມແລະເຮັດວຽກໃນຄັ້ງນີ້ ທ່ານເຈົ້າແຂວງບໍລິຄຳໄຊ ໄດ້ລາຍງານສະພາບການພັດທະນາເສດຖະກິດ - ສັງຄົມຂອງແຂວງ ໃນໄລຍະຜ່ານມາວ່າ: ເຖິງແມ່ນວ່າແຂວງບໍລິຄຳໄຊ ໄດ້ຮັບຜົນກະທົບຈາກອຸທົກກະໄພໃນກາງປີ 2018 ການລະບາດຂອງໄຂ້ຍຸງລາຍ ແລະ ການລະບາດພະຍາດອະຫິວາໝູອະຟຣິກາ ແຕ່ສະພາບເສດຖະກິດຂອງແຂວງ 9 ເດືອນຕົ້ນປີ 2019 ຍັງສືບຕໍ່ມີການເຕີບໂຕຢ່າງຕໍ່ເນື່ອງ ສາມາດອອກອະນຸຍາດໃຫ້ນັກລົງທຶນພາຍໃນ ແລະ ຕ່າງປະເທດ ເຂົ້າມາລົງທຶນ ຈຳນວນ 61 ໂຄງການ ມູນຄ່າ 1.345,43 ຕື້ກີບ, ລາຍຮັບພູດສູນກາງ ປະຕິບັດໄດ້ 408,50 ຕື້ກີບ ເທົ່າກັບ 60,83% ຂອງແຜນການປີ ແລະ 86,89% ຂອງແຜນການ 9 ເດືອນ, ລາຍຮັບພູດທ້ອງຖິ່ນ ປະຕິບັດໄດ້ 146,35 ຕື້ກີບ ເທົ່າກັບ 75,07% ຂອງແຜນການປີ ແລະ 109,89%  ຂອງແຜນການ 9 ເດືອນ, ການຜະລິດເຂົ້ານາແຊງໄດ້ 1.357 ຮຕ ຜົນຜະລິດໄດ້ 5.904, ນາປີ 37.451 ຮຕ  ເທົ່າກັບ 99,95% , ພືດປະເພດຕ່າງໆມີ 15.325 ຮຕ ເທົ່າກັບ 98,24% ພ້ອມດຽວກັນ ສະພາບການພັດທະນາວຽກງານວັດທະນະທຳ-ສັງຄົມ ກໍ່ໄດ້ຮັບການປັບປຸງ ແລະ ພັດທະນາ ໃຫ້ດີຂຶ້ນເປັນລຳດັບ ວຽກງານປ້ອງກັນຊາດ-ປ້ອງກັນຄວາມສະຫງົບ ກໍ່ໄດຮັບການເອົາໃຈໃສ່ ເຮັດໃຫ້ສັງຄົມມີຄວາມສະຫງົບຮຽບຮ້ອຍໂດຍພື້ນຖານ.

      

   ເພື່ອເຮັດໃຫ້ການການຈັດຕັ້ງປະຕິບັດ ແຜນພັດທະນາເສດຖະກິດ- ສັງຄົມຂອງແຂວງ ໃຫ້ເຂັ້ມແຂງໜັກແໜ້ນ ກ່ອນອື່ນ ທ່ານຮອງນາຍົກລັດຖະມົນຕີ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ທາງແຂວງບໍລິຄຳໄຊຍາດມາໄດ້ ແລະ ທ່ານຍັງໄດ້ເນັ້ນໜັກບາງບັນຫາສຳຄັນ ເປັນຕົ້ນແມ່ນການຄຸ້ມຄອງການນຳໃຊ້ສານເຄມີເຂົ້າໃນການຜະລິດກະສິກຳໃຫ້ຢູ່ລະດັບມາດຕະຖານ ເພືາອຫຼີກລ້ຽງການກະທົບຕໍ່ຊີວິດການເປັນຢູ່ຂອງປະຊາຊົນ, ການຈັດສັນການຄຸ້ມຄອງນຳໃຊ້ທີ່ດິນ ໂດຍສະເພາະການອອກໃບຕາດິນ ການຂຶ້ນສຳມະໂນທີ່ດິນຢູ່ເຂດຊົນນະບົດ, ສືບຕໍ່ປະຕິບັດບັນດາຄາດໝາຍສູ້ຊົນໃຫ້ໄດ້ຮັບຜົນສຳເລັດດ້ວຍໝາກຜົນສູງ, ເລັ່ງໃສ່ການປະເມີນບັນດາໂຄງການການລົງທຶນ ໃຫ້ເປັນໄປຕາມຄາດໝາຍທີ່ວາງໄວ້ ເພື່ອເປັນການສ້າງຈຸດດຶງດູດໃຫ້ນັກທ່ອງທ່ຽວ,  ຫັນສູ່ການນຳໃຊ້ເຄື່ອງມືທີ່ທັນສະໄໝ ເຂົ້າໃນວຽກງານການເຝົ້າລະວັງ ແລະ ເຕືອນໄພ ຕໍ່ກັບໄພພິບັດທີ່ອາດຈະເກີດຂຶ້ນໄດ້ ເພື່ອຫຼຸດຜ່ອນຄວາມເສຍຫາຍແກ່ຊີວິດ ແລະ ຊັບສິນຂອງພໍ່ແມ່ປະຊາຊົນ, ໃຫ້ປັບປຸງບັນດານິຕິກຳຂັ້ນແຂວງ ໃຫ້ມີປະສິດທິພາບ ແລະ ການປະຕິບັດລະບຽບກົດໝາຍ ດ້ວຍຄວາມຖືກຕ້ອງໃນທົ່ວສັງຄົມ ພ້ອມດຽວກັນທ່ານຍັງໄດ້ເນັ້ນເຖິງວຽກງານການເງິນ, ອຸດສາຫະກຳການຄ້າ, ວຽກງານແຜນການ-ການລົງທຶນ ແລະ ສິ່ງແວດລ້ອມ ໃຫ້ຕັ້ງໜ້າປະຕິບັດຢ່າງສອດຄ່ອງ ເຮັດໃຫ້ສະພາບການພັດທະນາເສດຖະກິດ-ສັງຄົມ ໄດ້ຮັບການພັດທະນາຢ່າງຕໍ່ເນື່ອງ ເຮັດໃຫ້ຊີວິດການເປັນຢູ່ຂອງພໍ່ແມ່ປະຊາຊົນດີຂຶ້ນ.

 ໂອກາດທີ່ທ່ານຮອງນາຍົກລັດຖະມົນຕີມາຢ້ຽມຢາມເຮັດວຽກໃນຄັ້ງນີ້ ຍັງໄດ້ມອບເງິນຈຳນວນ 100.000.000  ກີບ ໃຫ້ແຂວງບໍລິຄຳໄຊ  ເພື່ອນຳໄປໃຊ້ເຂົ້າໃນການຟື້ນຟູການຜະລິດຫຼັງໄພພິບັດ.