ໃນວັນທີ 3 ຕຸລາ 2019 ຢູ່ຫ້ອງຮັບຮອງຂອງແຂວງ ທ່ານ ປອ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ ພ້ອມດ້ວຍພະແນກການທີ່ກ່ຽວຂ້ອງ ໄດ້ຕ້ອນຮັບການເຂົ້າຢ້ຽມຢາມເຮັດວຽກຂອງ ທ່ານ ໂຄລິນ ຣີສ ຊ່ຽວຊານສິ່ງແວດລ້ອມ ແລະ ທ່ານ ແອນເດຣສ໌ ລີເບັນທໍ ຊ່ຽວຊານການປະເມີນຜົນໂຄງການ ຂອງທະນາຄານໂລກ (World Bank) ແລະ ທະນາຄານພັດທະນາອາຊີ (ADB) ທີ່ມາເຄື່ອນໄຫວເຮັດວຽກຢູ່ແຂວງບໍລິຄໍາໄຊ.

     ຈຸດປະສົງຂອງການມາເຄື່ອນໄຫວວຽກງານໃນຄັ້ງນີ້ ກໍ່ເພື່ອປະເມີນຊີວິດການເປັນຢູ່ ຂອງປະຊາຊົນເຂື່ອນນ້ຳເທີນ 2 ກ່ຽວກັບສະພາບການກ່ອນໜ້າ ແລະ ຫຼັງການສ້າງເຂື່ອນດັ່ງກ່າວ ເພື່ອນຳໄປສັງລວມແລ້ວປະກອບເປັນຄຳສະເໜີ ໃຫ້ແກ່ສະພາຜູ້ບໍລິຫານຂອງທະນາຄານໂລກ ແລະ ທະນາຄານພັດທະນາອາຊີ ນຳໄປປັບປຸງຕໍ່ກັບໂຄງການໃໝ່ໃນອະນາຄົດ ທີ່ທາງທະນາຄານຈະໃຫ້ທຶນສະໜັບສະໜຸນ.

  ໃນພິທີ ບັນດາພະແນກການທີ່ກ່ຽວຂ້ອງ ໄດ້ຜັດປ່ຽນກັນລາຍງານໃນຫຼາຍວຽກງານທີ່ສຳຄັນ ເປັນຕົ້ນແມ່ນວຽກງານທາງດ້ານການສຶກສາ, ສຸຂະພາບ, ການພັດທະນາຊີວິດການເປັນຢູ່ ຂອງປະຊາຊົນໃນເຂດຍົກຍ້າຍຈັດສັນ, ການສ້າງພື້ນຖານໂຄງລ່າງ ແລະ ສິ່ງອຳນວຍຄວາມສະດວກ, ຜົນກະທົບຂອງໂຄງການທີ່ມີຕໍ່ປະຊາຊົນ, ການປົກປັກຮັກສາປາໄມ້, ຊັບພະຍາກອນທຳມະຊາດ ແລະ ວຽກງານອື່ນໆ ເຊິ່ງເຫັນວ່າແຕ່ລະວຽກງານ ໄດ້ຮັບການຈັດຕັ້ງປະຕິບັດດ້ວຍຄວາມເອົາໃຈໃສ່ ແລະ ໄດ້ຮັບການພັດທະນາໃຫ້ດີຂຶ້ນເປັນລຳດັບ.

   ໂອກາດນີ້ ທ່ານເຈົ້າແຂວງ  ໄດ້ສະແດງຄວາມຕ້ອນຮັບຢ່າງອົບອຸ່ນ ແລະ ຍ້ອງຍໍຊົມເຊີຍ ໃນການມາຢ້ຽມຢາມເຮັດວຽກຄັ້ງນີ້ ພ້ອມດຽວກັນທ່ານຍັງໄດ້ອວຍພ້ອນໃຫ້ ຊ່ຽວຊານຂອງທະນາຄານໂລກ  ແລະ ທະນາຄານພັດທະນາອາຊີ ພ້ອມຄະນະ ຈົ່ງສືບຕໍ່ໃຫ້ການສະໜັບສະໜຸນການພັດທະນາ ແລະ ເດີນທາງກັບສູ່ນະຄອນຫຼວງວຽງຈັນ ດ້ວຍຄວາມສະຫວັດດີພາບ.