ການລົງເຜີຍແຜ່ສິນລະທຳ ຫຼັກທຳຄຳສອນໃນທາງພຣະພຸດທະສາສະໜາ ໄດ້ຈັດຂຶ້ນໃນຕ້ອນເຊົ້າຂອງວັນທີ 03 ຕຸລາ 2019 ຢູ່ວັດບ້ານທ່າບໍ່ ເມືອງປາກຊັນ ແຂວງບໍລິຄຳໄຊ ນຳພາໂດຍຍາທ່ານ ຫວາງ ພົມມະວົງ ຮອງປະທານອົງການພຸດທະສາສະໜາສຳພັນລາວ ແຂວງບໍລິຄຳໄຊ, ໂດຍການເຂົ້າຮ່ວມຂອງທ່ານ ຈັນທະວອນ ພົມມະຈັນ ປະທານແນວລາວສ້າງຊາດເມືອງປາກຊັນ ມີອອກຕົນຍາດໂຍມຈາກບ້ານທ່າບໍ່, ສອງຄອນ ແລະ ນ້ອງນ້ອຍນັກຮຽນພາຍໃນບ້ານ ເຂົ້າຮ່ວມຮັບຟັງ.

          ຈຸດປະສົງຂອງການເຜີຍແຜ່ສາສະໜາຄັ້ງນີ້ ກໍເພື່ອປູກຈິດສຳນຶກສັງຄົມ ຫຼື ຫຼັກທຳ ຄຳສັ່ງສອນຂອງພຣະພຸດທະເຈົ້າ ທີ່ສັ່ງສອນມະນຸດໃຫ້ເປັນຄົນດີ, ຍຶດໝັ້ນທາງຈິດໃຈ, ມີຄວາມສາມັກຄີ ມີບັນທັດຖານໃນການປະພຶດ ປະຕິບັດ ແລະ ຢູ່ຮ່ວມກັນໂດຍສັນຕິ, ພຣະພຸດທະສາສະໜາ ຫຼື ສາສະໜາພຸດ ເປັນສາສະໜາທີ່ມຸ່ງເນັ້ນເພື່ອການພົ້ນໄປຈາກຄວາມທຸກ ແລະ ສອນໃຫ້ຮູ້ຈັກກັບຄວາມທຸກ ແລະ ວິທີການທີ່ຈະຫຼຸດພົ້ນຈາກຄວາມທຸກທັງປວງ.

          ໃນພິທີ ຄະນະ ອພສ ເມືອງປາກຊັນ ຍັງໄດ້ຜັດປ່ຽນກັນເຜີຍແຜ່ກ່ຽວກັບພຸດສາສະໜາ ແລະ ເຜີຍແຜ່ດຳລັດ ເລກທີ 315/ລບ ລົງວັນທີ 16 ສິງຫາ 2016 ວ່າດ້ວຍການຄຸ້ມຄອງ ແລະ ປົກປ້ອງການເຄື່ອນໄຫວສາສະໜາຢູ່ ສປປ ລາວ ຈາກທ່ານ ແກ້ວວິໄລ ໄຊຍະຈັກ ຫົວໜ້າຫ້ອງການພາຍໃນເມືອງປາກຊັນ. ທັງນີ້ ກໍ່ເພື່ອເຮັດໃຫ້ນັກບວດ, ນັກສອນສາສະໜາ, ສາສະນິກະຊົນ ການຈັດຕັ້ງສາສະໜາ ເຄື່ອນໄຫວຖືກຕ້ອງ ຕາມກົດໝາຍ, ລະບຽບການ ແລະ ຫຼັກທຳ ຄຳສັ່ງສອນ ແນໃສ່ປົກປັກຮັກສາ ແລະ ເສີມຂະຫຍາຍວັດທະນະທຳອັນດີງາມຂອງຊາດ ເພີ່ມທະວີຄວາມສາມັກຄີກົມກຽວ ລະຫວ່າງ ບຸກຄົນເຊື່ອຖືສາສະໜາຕ່າງໆ ພ້ອມກັນປະກອບສ່ວນເຂົ້າໃນການປົກປັກຮັກສາ ແລະ ພັດທະນາປະເທດຊາດ.