ພິທີສະເຫຼີມສະຫຼອງ ວັນຄູແຫ່ງຊາດຄົບຮອບ 25 ປີ ( 7 ຕຸລາ 1994 - 7 ຕຸລາ 2019 ) ໄດ້ຈັດຂຶ້ນໃນວັນທີ 3 ຕຸລາ 2019 ຢູ່​ສະ​ໂມ​ສອນໃຫຍ່​ແຂວງ ​ໃຫ້ກຽດປາຖະກະຖາ​ຫວນຄືນມູນເຊື້ອໂດຍ​ ທ່ານ ບຸນ​ມາ ບຸ​ຈະ​ເລີ​ນ ຮອງ​ເຈົ້າ​ແຂວງບໍລິ​ຄຳ​ໄຊ ມີການນຳຂອງແຂວງ, ຜູ້ບໍລິຫານການສຶກສາ, ຄູອາຈານ, ພະນັກງານ, ທະຫານ - ​ຕຳ​ຫຼວດ ແລະ ນັກຮຽນ - ​ນັກ​ສຶກສາ​ ເຂົ້າ​ຮ່ວມ​ຮັບ​ຟັງ.

     ທ່ານ ບຸນມາ ບຸຈະເລີນ ​ໄດ້​ຍົກ​ໃຫ້​ເຫັນ​ວ່າ ​ປະເທດລາວຂອງເຮົາໃນ​ຊຸມ​ປີ 1905 ຄົນ​ລາວ​ທີ່​ໄດ້​ເຂົ້າ​ໂຮງຮຽນ​ແມ່ນ​ໜ້ອຍ​ທີ່​ສຸດ, ​ໃນ​ນັ້ນ ​ໄດ້​ມີ​ຜູ້​ໜຶ່ງ​ຊື່ວ່າ ​ທ້າວ ຄຳ ​ໄດ້​ຮຽນ​ຮອດ​ຫ້ອງ​ທີ I ຫຼື ຈົບ ປ.6 ​ໄດ້​ເຂົ້າ​ຮ່ວ​ມຝຶກ​ອົບຮົມ​ຄູ​ເປັນ​ຄົນ​ທຳ​ອິດ​ຂອງ​ລາວ ພາຍຫຼັງສຳ​ເລັດ​ການ​ຝຶກ​ອົບຮົມ​ແລ້ວ ທ້າວ ຄຳ ​ໄດ້​ເຂົ້າ​ຮັບ​ລາຊະການ​ເປັນຄູ​ສອນ ຢູ່ນະຄອນຫຼວງວຽງຈັນ ໃນເວລານັ້ນ ປະເທດຂອງພວກເຮົາ ໄດ້ຕົກເປັນຫົວເມືອງຂຶ້ນຂອງພວກລ່າເມືອງຂຶ້ນຝຣັ່ງ ປະຊາຊົນລາວຕົກເປັນຂ້ອຍຂ້າມ້າໃຊ້ ຝຣັ່ງເອີ້ນວ່າ “ກູລີ” ເຮັດໃຫ້ປະຊາຊົນມີຄວາມທຸກທໍລະມານ ບໍ່ມີອິດສາລະພາບ ຍ້ອນຕົກເປັນຂ້າທາດຂອງພວກເຂົາ ຍ້ອນເຫດຜົນນັ້ນ ນາຍຄູຄຳ ຈຶ່ງໄດ້ຕັດສິນໃຈ​ເຂົ້າ​ຮ່ວມ​ຂະ​ບວນການ​ນຳພາ​ປະຊາຊົນ​ລາວ​ລຸກ​ຮື້​ຂຶ້ນ​ ຕໍ່ສູ້​ຕ້ານ​ການ​ຮຸກ​ຮານ​ຂອງ​ພວກ​ລ່າ​ເມືອງ​ຂຶ້ນຝຣັ່ງ. ປະຫວັດ​ສາດ​ຂະ​ບວນການ​ຕໍ່ສູ້​ຂອງ​ປະຊາຊົນ​ລາ​ວບັນດາ​ເຜົ່າ ຕ້ານ​ການ​ຮຸກ​ຮານຂອງພວກລ່າເມືອງຂຶ້ນແບບເກົ່າ ແລະ ແບບໃໝ່ໄດ້ຜ່ານໄລຍະອັນຍືດເຍື້ອຍາວນານ ແລະ ໄດ້ຮັບໄຊຊະນະເປັນແຕ່ລະໄລຍະຈົນເຮັດໃຫ້ປະເທດລາວໄດ້ສະຖາປານາ ສາທາລະນະລັດ ປະຊາທິປະໄຕ ປະຊາຊົນລາວຂຶ້ນໃນວັນທີ 2 ທັນວາ 1975 ຊຶ່ງໄດ້ເປັນເງື່ອນໄຂອັນສະດວກໃນການພັດທະນາການສຶກສາຂອງລາວ ການພັດທະນາຖັນແຖວຄູ-ອາຈານໄດ້ເພີ່ມຂຶ້ນ ແລະ ຄູ-ອາຈານ ຈຳນວນເຫຼົ່ານັ້ນ ລ້ວນແຕ່ມີນ້ຳໃຈຮັກຫອມປະເທດຊາດ, ມີຄວາມຮູ້, ຄວາມສາມາດ, ຊື່ສຽງຂອງຄູໄດ້ຕິດພັນກັບຂະບວນວິວັດ ແຫ່ງການພັດທະນາປະເທດຊາດແຕ່ລະສະໄໝ ຈົນເຖີງປະຈຸບັນນີ້ ປະເທດຊາດຂອງພວກເຮົາໄດ້ມີນັກວິຊາການ, ນາຍທະຫານ, ນາຍຕຳຫຼວດ, ນັກການເມືອງ ແລະ ນັກທຸລະກິດຈຳນວນບໍ່ໜ້ອຍ ລ້ວນແຕ່ມີຄວາມຮູ້ຈາກຄູສອນ, ປະເທດຊາດມີການພັດທະນາເທົ່າໃດ ກໍ່ຍິ່ງເຮັດໃຫ້ສັງຄົມມີຄວາມສຳນຶກ ເຖິງບຸນຄຸນອັນລ້ຳເລີດຂອງຄູ - ອາຈານຫຼາຍຂຶ້ນເທົ່ານັ້ນ ເພື່ອສະແດງເຖິງຄວາມຮູ້ບຸນຄຸນຕໍ່ຄູ-ອາຈານໃນທົ່ວສັງຄົມ ລັດຖະບານຈຶ່ງໄດ້ກຳນົດເອົາວັນທີ 7 ເດືອນ ຕຸລາ ຂອງທຸກໆປີ ເປັນວັນຄູແຫ່ງຊາດລາວ.

     ນອກຈາກການຫວນຄືນມູນເຊື້ອແລ້ວ ທ່ານຮອງເຈົ້າແຂວງ ພ້ອມດ້ວຍບັນດາພະແນກການ ກໍ່ໄດ້ມອບກະຕ່າຂອງຂວັນໃຫ້ແກ່ຄູ-ອາຈານ ຕາງໜ້າຮັບໂດຍທ່ານ ຄຳສີ ຍົມມະລາດ ຫົວໜ້າພະແນກສຶກສາທິການ ແລະ ກິລາແຂວງ. ໃນພິທີ ຍັງໄດ້ມີການລະດົມວັດຖຸ-ປັດໃຈ ເພື່ອນຳໄປຊຸກຍູ້ສົ່ງເສີມການຮຽນ-ການສອນ ເຫັນວ່າມີຫຼາຍພາກສ່ວນທັງພາກລັດ, ລັດວິສາຫະກິດ ແລະ ບຸກຄົນ ໃຫ້ການສະນັບສະໜຸນ ລວມມູນຄ່າທັງໝົດ 9.860.000 ກີບ ເຊິ່ງຈະໄດ້ນຳໄປຊ່ວຍເຫຼືອໃຫ້ນັກຮຽນຢູ່ເຂດພູດອຍຫ່າງໄກສອກຫຼີກ.

ພາບ-ຂ່າວ: ສີປະເສີດ