ພິທີປະກາດ-ປັບປຸງການຈັດຕັ້ງ ຂອງຫ້ອງວ່າການແຂວງ, ຄະນະຈັດຕັ້ງ, ພະແນກການຕ່າງປະເທດ ແລະ ຄະນະຮັບຜິດຊອບອະນຸສາວະລີ ໄດ້ຈັດຂຶ້ນໃນວັນທີ 1 ຕຸລາ 2019 ຢູ່ຫ້ອງປະຊຸມຫ້ອງວ່າການປົກຄອງແຂວງ ເຂົ້າຮ່ວມໂດຍ ທ່ານ ແດນປີ ມູນທະດີ ຮອງເລຂາພັກແຂວງ ຫົວໜ້າຄະນະຈັດຕັ້ງແຂວງບໍລິຄຳໄຊ,  ມີຄະນະພະແນກ, ພະນັກງານລັດຖະກອນ ແລະ ແຂກຖືກເຊີນ ເຂົ້າຮ່ວມ.

        ໃນພິທີ ໄດ້ຮັບຟັງການຜ່ານມະຕິຕົກລົງຂອງຄະນະປະຈຳພັກແຂວງ ສະບັບເລກທີ 451/ຄປພ.ຂບຊ, ລົງວັນທີ 25 ກັນຍາ 2019 ວ່າດ້ວຍການອະນຸມັດປ່ຽນຊື່ໜ່ວຍພັກ ອະນຸສາວະລີ-ເລຂາການນຳ ມາເປັນ ໜ່ວຍພັກຄະນະຮັບຜິດຊອບອະນຸສາວະລີແຂວງ ຂຶ້ນກັບຄະນະພັກຮາກຖານຫ້ອງວ່າການແຂວງ, ມະຕິຕົກລົງ ສະບັບເລກທີ 458/ຄປພ.ຂບຊ, ລົງວັນທີ 27 ກັນຍາ 2019 ວ່າດ້ວຍການບົ່ງຕົວແຕ່ງຕັ້ງ ສະຫາຍ ແກ້ວອຸດອນ ໄຊປະເສິດ ເປັນເລຂາໜ່ວຍພັກຄະນະຮັບຜິດຊອບອະນຸສາວະລີແຂວງ, ຂໍ້ຕົກລົງຂອງເຈົ້າແຂວງບໍລິຄຳໄຊ ເລກທີ 513/ຂບຊ, ລົງວັນທີ 16 ກັນຍາ 2019 ວ່າດ້ວຍການແຕ່ງຕັ້ງ ທ່ານ ແກ້ວອຸດອນ ໄຊປະເສິດ ເປັນຫົວໜ້າຄະນະຮັບຜິດຊອບອະນຸສາວະລີແຂວງ, ຂໍ້ຕົກລົງເລກທີ 555/ຂບຊ, 556/ຂບຊ, 557/ຂບຊ ແລະ 558/ຂບຊ ລົງວັນທີ 27 ກັນຍາ 2019 ວ່າດ້ວຍການແຕ່ງຕັ້ງ ທ່ານ ອຸດົມ ວົງໄກສອນ ຮອງຫົວໜ້າພະແນກການຕ່າງປະເທດ ຂື້ນວ່າການຫົວໜ້າພະແນກການຕ່າງປະເທດແຂວງ, ແຕ່ງຕັ້ງ ທ່ານ ປອ ນາງ ວິໄລ ພິລາວົງ ເປັນຮອງຫົວໜ້າຫ້ອງວ່າການປົກຄອງແຂວງ, ແຕ່ງຕັ້ງ ທ່ານ ວັນໄຊ ເງຍຈັນທະສອນ ເປັນຮອງຫົວໜ້າຄະນະຈັດຕັ້ງແຂວງ ແລະ ຍົກຍ້າຍ ທ່ານ ກຸສົນ ເວດທະນາ ຫົວໜ້າພະແນກການຕ່າງປະເທດແຂວງ ໄປປະຈຳການຮັບໜ້າທີ່ໃໝ່ຢູ່ຫ້ອງວ່າການປົກຄອງແຂວງບໍລິຄຳໄຊ.

      ເພື່ອເຮັດໃຫ້ພິທີດັ່ງກ່າວ ມີຄວາມໝາຍຄວາມສໍາຄັນຢ່າງໜັກແໜ້ນ ຍັງໄດ້ຮັບຟັງການໂອ້ລົມ ແລະ ໃຫ້ທິດຊີ້ນໍາຈາກ ທ່ານ ແດນປີ ມູນທະດີ ເຊິ່ງທ່ານໄດ້ຍົກໃຫ້ເຫັນວ່າການ​ແຕ່ງ​ຕັ້ງ, ຍົກຍ້າຍ​ພະນັກງານ​ຊີ້​ນຳ​-ນຳພາ ​ແມ່ນ​ວຽກ​ງານ​ປົກກະຕິ ທັງນີ້ກໍ່ເພື່ອຕອບສະໜອງຕາມຄວາມຮຽກຮ້ອງຕ້ອງການຂອງໜ້າທີ່ວຽກງານ, ປັບປຸງໃຫ້ແທດເໝາະກັບໜ້າທີ່ການເມືອງ ແລະ ວິຊາສະເພາະໃນໄລຍະໃໝ່ ແນໃສ່ເຮັດໃຫ້ວຽກງານໄດ້ມີການຂະຫຍາຍຕົວ ຕາມຂັ້ນເທິງວາງອອກ ພ້ອມດຽວກັນ ທ່ານຍັງ​ໄດ້ຮຽກຮ້ອງ​ໃຫ້ຜູ້ທີ່ໄດ້ຮັບການແຕ່ງຕັ້ງ​ ຈົ່ງ​ໄດ້​ສືບຕໍ່ປະຕິບັດໜ້າທີ່​ວຽກງານຂອງຕົນດ້ວຍຄວາມຮັບຜິດຊອບສູງ ພ້ອມທັງຍົກສູງຄວາມຮູ້ຄວາມສາມາດ, ແບບແຜນວິທີເຮັດວຽກ ແລະ ມີຄວາມສາມັກຄີເປັນໝູ່ຄະນະ ບົນພື້ນຖານຫຼັກການລວມສູນປະຊາທິປະໄຕ.