ເພື່ອເປັນການປັບປຸງ ປົວແປງພື້ນຖານໂຄງລ່າງ ໃຫ້ມີຄວາມສະດວກສະບາຍ ໃນການໄປມາພົວພັນວຽກງານຂອງອົງກອນພາກລັດ ບໍລິສັດ ເຂື່ອນໄຟຟ້ານ້ຳເທີນ 1 ໄດ້ໃຫ້ການສະໜັບສະໜຸນຊ່ວຍເຫຼືອລ້າ ໃນການຖົມ ແລະ ປັບໜ້າດິນບໍລິເວນເດີ່ນຕໍ່ໜ້າຫ້ອງວ່າການປົກຄອງເມືອງ ຂະໜາດກ້ວາງ 50 x 70 ແມັດ ໂດຍຈະໄດ້ປັບ ແລະ ຖົມດິນໃຫ້ໄດ້ຕາມມາດຖານເພື່ອອຳນວຍຄວາມສະດວກການຈອດລົດໃຫ້ພະນັກງານລັດຖະກອນ ແລະ ຜູ້ມາພົວພັນວຽກຕ່າງໆ.

       ການສະໜັບສະໜູນຂອງບໍລິສັດຄັ້ງນີ້ ເປັນການສ້າງຂະບວນການຮ່ວມກັບເມືອງປາກກະດິງ ໃນການຕ້ອນຮັບວັນສຳຄັນຕ່າງໆຂອງຊາດລາວເຮົາ ເວົ້າລວມ, ເວົ້າສະເພາະ ແມ່ນເປັນການກະກຽມຕ້ອນຮັບກອງປະຊຸມໃຫຍ່ຄັ້ງທີ VII ຂອງອົງຄະນະພັກເມືອງປາກກະດິງ ທີ່ຈະຈັດຂຶ້ນໃນອີກບໍ່ດົນນີ້ ແລະ ທັງເປັນການສະໜັບສະໜູນຕໍ່ການພັດທະນາສ້າງສາບ້ານເມືອງໃນໄລຍະໃໝ່. ການປັບ-ຖົມດິນໃນຄັ້ງນີ້ ມີມູນຄ່າ 500 ລ້ານກີບ ເຊີ່ງໄດ້ເລີ່ມມາແຕ່ວັນທີ 27 ກັນຍາ 2019 ຮອດປະຈຸບັນສຳເລັດແລ້ວ 70% ແລະ ຕາມແຜນຈະໃຫ້ສຳເລັດໃນໄວໆນີ້.