ຂະບວນຈັດສົ່ງເຄື່ອງຊ່ວຍເຫຼືອ ຈາກນໍ້າໃຈຊາວແຂວງບໍລິຄໍາໄຊ ເພື່ອນໍາໄປຊ່ວຍເຫຼືອ ປະຊາຊົນບັນດາ 2 ແຂວງ ພາກກາງ ແຂວງຄໍາມ່ວນ, ສະຫວັນນະເຂດ ແລະ  4 ແຂວງ ພາກໃຕ້ ສາລະວັນ, ເຊກອງ, ອັດຕະປື, ຈໍາປາສັກ ທີ່ໄດ້ຮັບຜົນກະທົບຈາກໄພນໍ້າຖ້ວມ ນັບແຕ່ທ້າຍເດືອນ ສິງຫາ ເປັນຕົ້ນມາ ຂະບວນດັ່ງກ່າວ ໄດ້ຈັດຂຶ້້ນໃນຕອນເຊົ້າວັນທີ 11 ກັນຍາ 2019  ຢູ່ທີ່ຫ້ອງວ່າການປົກຄອງແຂວງ ໂດຍເປັນກຽດຮ່ວມສົ່ງຂະບວນຂອງທ່ານ ປອ ກອງແກ້ວ ໄຊສົງຄາມ ເຈົ້າແຂວງ ບໍລິຄໍາໄຊ ພ້ອມຄະນະ ແລະ ພາກສ່ວນກ່ຽວຂ້ອງ ເຂົ້າຮ່ວມ.   

       ໃນໂອກາດດັ່ງກ່າວ ທ່ານ ໄພວັນ ສີພັນດອນ ຮອງປະທານ ສະພາການຄ້າ ແລະ ອຸດສະຫະກໍາແຂວງ ຕ່າງໜ້າໃຫ້ກັບຂະບວນໄດ້ກ່າວວ່າ:  ເຄື່ອງຊ່ວຍເຫຼື່ອທີ່ຈະນໍາໄປມອບໃຫ້ກັບພໍ່ແມ່ປະຊາຊົນ ທີ່ປະສົບກັບໄພນໍ້າຖ້ວມໃນຄັ້ງນີ້ ລ້ວນແຕ່ແມ່ນເຄື່ອງ ທີ່ລະດົມໄດ້ຈາກພໍ່ແມ່ປະຊາຊົນ ທັງພາກລັດ ແລະ ເອກະຊົນ   ແລະ ພາກສ່ວນຕ່າງໆ ພາຍໃນສັງຄົມ ເຊີ່ງປະກອບມີ ເຂົ້າ, ໝີ່, ເຄື່ອງນຸ່ງຫົ່ມ, ນໍ້າດື່ມ ແລະ ຢາປົວພະຍາດຈຳນວນໜຶ່ງ ລວມມູນຄ່າ 95 ລ້ານກ່ວາກີບ ທັງນີ້ ກໍ່ເພື່ອເປັນການແບ່ງເບົາພາລະ, ປະກອບສ່ວນຊ່ວຍເຫຼືອ ແລະ ໃຫ້ກຳລັງໃຈເຊິ່ງກັນ ແລະ ກັນ.

          ພ້ອມນັ້ນ ທ່ານ ເຈົ້າແຂວງ ຍັງສະແດງຄວາມຍ້ອງຍໍຊົມເຊີຍ ມາຍັງພາກສ່ວນຕ່າງໆ ພາຍໃນສັງຄົມ ທີ່ເຫັນໄດ້ຄວາມສໍາຄັນ ແບ່ງປັນນໍ້າຈິດ - ນໍ້າໃຈ ປະກອບສ່ວນຊ່ວຍເຫຼືອພໍ່ແມ່ປະຊາຊົນທີ່ປະສົບກັບໄພນໍ້າຖ້ວມຢູ່ 2 ແຂວງ ພາກກາງ ແລະ 4 ແຂວງພາກໃຕ້ໃນຄັ້ງນີ້  ພ້ອມຍັງໄດ້ອວຍພອນໄຊອັນປະເສີດມາຍັງ ຂະບວນດັ່ງກ່າວ ຈົ່ງເດີນທາງດ້ວຍຄວາມສະຫວັດດີພາບ ປອດໄພໃນທຸກດ້ານ ແລະ ມີຜົນສໍາເລັດຕາມຈຸດປະສົງເປົ້າໝາຍ.