ເຂົ້າປຸ້ນ ເປັນອາຫານພື້ນບ້ານ ທີ່ນິຍົມກັນບໍລິໂພກ ຂອງຄົນທົ່ວໄປ ເພາະເປັນອາຫານທີ່ແຊບ ປຸງແຕ່ໄດ້ຫລາຍຢ່າງ ແລະ ລາຄາບໍ່ແພງ, ໂດຍທົ່ວໄປແລ້ວ ນອກຈາກເປັນອາຫານທີ່ນິຍົມກັນບໍລິໂພກຕາມຄົວເຮືອນແລ້ວ ຍັງນຳມາເປັນອາຫານຮັບໃຊ້ໃນງານ ແລະ ເທດສະການຕ່າງໆ ໄດ້ນຳອີກ ເຊັ່ນ: ງານບຸນປະເພນີ, ງານດອງ ແລະ ງານອື່ນໆອີກດ້ວຍ.

 

        ທ່ານ ນ ຄອນສະຫວັນ ຜູ້ປະກອບການ ໂຮງງານຜະລິດເຂົ້າປຸ້ນສົດ ໄດ້ໃຫ້ສຳພາດ ຕໍ່ນັກຂ່າວ ຄັ້ງວັນທີ 10 ກັນຍາ 2019 ວ່າ: ໂດຍເຫັນໄດ້ຄວາມຕ້ອງການຂອງຕະຫລາດຜູ້ບໍລິໂພກ ຕົນເອງຈຶ່ງໄດ້ຕັດສິນໃຈຊື້ເຄື່ອງຈັກເຮັດເຂົ້າປຸ້ນ ເພື່ອມາທຳການຜະລິດ ຕອບສະໜອງໃຫ້ແກ່ຕະຫລາດ ໂດຍໄດ້ຜະລິດຈາກເຂົ້າສົດແທ້ ບໍ່ມີການປົນແປ້ງ ແລະ ສານກັນບູດແຕ່ຢ່າງໃດ, ເພື່ອສ້າງຄວາມໝັ້ນໃຈ ແລະ ເພີ່ງພໍໃຈໃຫ້ແກ່ຜູ້ບໍລິໂພກ ທ່ານ ໄດ້ອະທິບາຍ ແລະ ສາທິດ ວິທີ ຂັ້ນຕອນຂອງການເຮັດເຂົ້າປຸ້ນ ວ່າ: ເບື້ອງຕົ້ນ ຕ້ອງນຳເຂົ້າສານຈ້າວມາມັກໄວ້ໃນນ້ຳ 4 ມື້ 4 ຄືນ, ຈາກນັ້ນ ລ້າງດ້ວຍນ້ຳຈົນສະອາດ ຈື່ງນຳມາບົດໃຫ້ມຸ່ນເປັນແປ້ງ ແລ້ວເອົາມາໃສ່ຈັກປັ່ນໃຫ້ແຫ້ງເປັນກ້ອນ, ຫລັງຈາກນັ້ນ ນຳເອົາແປ້ງເຂົ້າທີ່ປັ່ນແຫ້ງນັ້ນ ມາລົງໃນໝໍ້ຕົ້ມ ໂດຍປະສົມນ້ຳສະອາດ ແລະ ເກືອເພື່ອເພີ່ມລົດຊາດ ຂັ້ນຕອນນີ້ ເປັນຂັ້ນຕອນທີ່ສຳຄັນຫລາຍ ເພາະຕ້ອງໄດ້ຄວບຄຸມອຸນນະພຸມຂອງໝໍ້ຕົ້ມ ເພື່ອບໍ່ໃຫ້ຮ້ອນ ແລະ ເຢັນເກີນໄປ, ຫລັງຈາກອອກມາເປັນເສັ້ນແລ້ວ ກໍລ້າງນ້ຳສະອາດ ຈົນເສັ້ນເຂົ້າປຸ້ນຂາວ  ຈຶ່ງນຳມາຈັດເກັບໃສ່ເປັນແພັກ ເພື່ອກຽມນຳອອກຂາຍ, ເຂົ້າປຸ້ນນີ້ ທຳການຜະລິດດ້ວຍເຄື່ອງຈັກ ແລະ ຈາກເຂົ້າສົດ 100% ຜະລິດ ມື້ຕໍ່ມື້ ຕາມການສັ່ງຂອງລູກຄ້າ ຈະບໍ່ມີການຜະລິດປະໄວ້ຜ່ານຄືນ ທັງນີ້ ກໍເພື່ອເປັນການຮັກສາຄຸນນະພາບ ແລະ ຄວາມສົດຂອງຜະລິດຕະພັນ.

 

     

      ທ່ານ ຍັງກ່າວມ້ວນທ້າຍອີກວ່າ: ໃນອະນາຄົດ ມີແຜນຈະຂະຫຍາຍໂຮງງານຂອງຕົນອອກອີກ ເພື່ອຕອບສະໜອງຄວາມຕ້ອງການຂອງລູກຄ້າ ທັງພາຍໃນ ແລະ ຕ່າງເມືອງ ພາຍໃນແຂວງ ດ້ວຍຄຸນນະພາບຂອງໂຮງງານທີ່ວ່າ: "ສົດ, ໃໝ່, ສະອາດ, ປອດສານຜິດ ຜະລິດຈາກເຂົ້າແທ້ 100%".

        ຖ້າທ່ານໃດຫາກສົນໃຈ ຢາກຈະຊື້ໄປກິນເອງ, ຈຳໜ່າຍ - ຂາຍ ຫລື ຮັບໃຊ້ງານລ້ຽງ ງານສ້າງສັນຕ່າງໆ ກໍ່ສາມາດຕິດຕໍ່ພົວພັນກັບທາງໂຮງງານໂດຍກົງໄດ້ ຕາມທີ່ຢູ່: ທາງ 13 ໄຕ້ ບ້ານຫ້ວຍສຽດ ເມືອງປາກຊັນ ແຂວງບໍລິຄຳໄຊ ( ກົງກັນຂ້າມ ວັດບ້ານຫ້ວຍສຽດ ) ໂທ: 020 2887 8831; 2894 3673.