ກອງປະຊຸມເຊື່ອມຊືມມະຕິຂອງຄະນະບໍລິຫານງານສູນກາງພັກ ຄັ້ງທີ 8 ສະໄໝທີ X ໄດ້ຈັດຂຶ້ນໃນວັນທີ 10 ກັນຍາ 2019 ຢູ່ສະໂມສອນແຂວງ ໂດຍການເຜີຍແຜ່ເອກະສານຂອງ ທ່ານ ບຸນເສັງ ປະທຳມະວົງ ຄະນະປະຈຳພັກແຂວງ ຮອງເຈົ້າແຂວງບໍລິຄຳໄຊ ມີຄູອາຈານຈາກບັນດາໂຮງຮຽນ ແລະ ພະນັກງານ-ລັດຖະກອນ ໃນຂະແໜງການສຶກສາ ແລະ ກິລາ ເຂົ້າຮ່ວມ.

    ເພື່ອເຮັດໃຫ້ພະນັກງານ-ລັດຖະກອນຄູ ມີຄວາມຮັບຮູ້ເຂົ້າໃຈ, ກຳແໜ້ນເຊື່ອມຊືມ ແລະ ເປັນເອກະພາບສູງ ຕໍ່ບັນດາເນື້ອໃນແນວທາງສຳຄັນຂອງພັກ ໃຫ້ເປັນທິດທາງວຽກງານ ແລະ ເປັນແຜນປະຕິບັດງານລະອຽດ ໃນພິທີທ່ານປະທານໄດ້ຍົກໃຫ້ເຫັນ ເນື້ອໃນຂອງມະຕິກອງປະຊຸມຄົບຄະນະ ຄັ້ງທີ 8 ຂອງຄະນະບໍລິຫານງານສູນກາງພັກສະໄໝທີ X ທີ່ໄດ້ດຳເນີນຢ່າງເປັນທາງການ ແຕ່ວັນທີ 6-14 ພຶດສະພາ 2019 ເຊິ່ງໄດ້ຄົ້ນຄ້ວາ, ປຶກສາຫາລື ແລະ ເປັນເອກະພາບ ໃນຫຼາຍເນື້ອໃນສຳຄັນ ເປັນຕົ້ນແມ່ນ ການແກ້ໄຂຄວາມຫຍຸ້ງຍາກທາງດ້ານເສດຖະກິດມະຫາພາກ ຕິດພັນກັບການຜັນຂະຫຍາຍມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 7 ຕ້ອງສຸມໃສ່ການປະຕິບັດຍຸດທະສາດ ແລະ ນະໂຍບາຍພັດທະນາພື້ນຖານການຜະລິດ ລົງສູ່ລາຍລະອຽດ, ແກ້ໄຂຂັ້ນຂອດ ແລະ ຄວາມໂປ່ງໃສ ໃນການພິຈາລະນາການລົງທຶນ, ສືບຕໍ່ສະກັດກັ້ນການຮົ່ວໄຫຼຂອງແຫຼ່ງລາຍຮັບ ຫັນໄປສູ່ທັນສະໄໝ ໃນການຄຸ້ມຄອງລາຍຮັບ-ລາຍຈ່າຍ, ແກ້ໄຂໜີ້ສິນຂອງລັດ, ປະຕິຮູບບັນດາລັດວິສາຫະກິດຢ່າງຈິງຈັງ ເນັ້ນປະສິດທິຜົນຕົວຈິງ, ຍົກລະດັບຄວາມສາມາດການຄຸ້ມຄອງ, ພັດທະນາບັນດາຄວາມອາດສາມາດອັນບົ່ມຊ້ອນຂອງຊາດ, ສ້າງຄວາມເຂັ້ມແຂງດ້ານໂຄງສ້າງຂອງພື້ນຖານເສດຖະກິດ ແລະ ຖານລາຍຮັບ,  ພ້ອມດຽວກັນ ມະຕິສະບັບນີ້ ຍັງໄດ້ຄົ້ນຄ້ວາ, ປຶກສາຫາລື ແລະ ເປັນເອກະພາບ ກ່ຽວກັບການພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນ, ການແບ່ງຂັ້ນຄຸ້ມຄອງໃນລະບົບອົງການບໍລິຫານລັດ ແລະ ການດຳເນີນຄະດີຕາມຂະບວນການຍຸຕິທຳ ແລະ ກ່ຽວກັບໂຄງຮ່າງລາຍງານການເມືອງ ຕໍ່ກອງປະຊຸມໃຫຍ່ ຄັ້ງທີ XI ຂອງພັກ.

    ກອງປະຊຸມຈະໄດ້ດຳເນີນໄປເປັນເວລາ 1 ວັນເຕັມ ເຊີ່ງຈະໄດ້ຮັບຟັງການເຜີຍແຜ່ດຳລັດ 184/ລບ ວ່າດ້ວຍຈັນຍາບັນຂອງພະນັກງານ-ລັດຖະກອນ, ມະຕິກອງປະຊຸມເປີດກ້ວາງຄົບຄະນະບໍລິຫານງານພັກແຂວງ ຄັ້ງທີ 13 ສະໄໝທີ VI, ມະຕິຕົກລົງກອງປະຊຸມລັດຖະບານເປີດກ້ວາງ ຄັ້ງທີ I ປີ 2019 ແລະ ເອກະສານສຳຄັນອີກຈຳນວນໜຶ່ງ.