ກອງປະຊຸມເປີດກ້ວາງຄົບຄະນະບໍລິຫານງານພັກກອງບັນຊາການ ປກສ ແຂວງບໍລິຄຳໄຊ ຄັ້ງທີ 9 ສະໄໝທີ II ໄດ້ຈັດຂຶ້ນໃນວັນທີ່ 3 ກັນຍາ 2019 ຢູ່ສະໂມສອນໃຫຍ່ ປກສ ແຂວງ ພາຍໃຕ້ການເປັນປະທານຂອງ ສະຫາຍ ພັອ ທອງໃບ ລໍວັນໄຊ ກໍາມະການພັກແຂວງ ເລຂາຄະນະພັກ ຫົວໜ້າກອງບັນຊາການ ປກສ ແຂວງ ມີຄະນະພັກກອງບັນຊາການ ປກສ ແຂວງ, ຄະນະພັກຮາກຖານບັນດາຫ້ອງ, ກອງ, ປກສ ເມືອງ, ພະນັກງານສໍາມະຊິກພັກ ເຂົ້າຮ່ວມ.

      ກອງປະຊຸມ ໄດ້ຮັບຟັງລາຍງານການຈັດຕັ້ງປະຕິບັດມະຕິກອງປະຊຸມເປີດກ້ວາງຄົບຄະນະພັກ ກອງບັນຊາການ ປກສ ແຂວງ ຄັ້ງທີ່ 8 ສະໄໝທີ່ II ແລະ ທິດທາງແຜນການໃນຕໍ່ໜ້າ ພ້ອມທັງບົດສໍາຫຼວດການນໍາພາລວມຂອງຄະນະພັກ ກອງບັນຊາການ ປກສ ແຂວງ ປະຈຳໄຕມາດ ທີ 02 ເຊິ່ງໄດ້ຍົກໃຫ້ເຫັນຜົນງານຫຼາຍດ້ານ, ຄະນະພັກ, ຄະນະບັນຊາໄດ້ຖືເອົາວຽກງານສຶກສາອົບຮົມການເມືອງ-ແນວຄິດເປັນຫຼັກ ເພື່ອເຮັດໃຫ້ຖັນແຖວພະນັກງານ-ສຳມະຊິກພັກ ມີຫລັກໝັ້ນ ຕໍ່ອຸດົມການຂອງພັກຢ່າງໜັກແໜ້ນ, ຄະນະພັກໄດ້ຖືສຳຄັນກ່ຽວກັບວຽກງານກໍ່ສ້າງພັກ ແລະ ຂະຫຍາຍພັກ ໂດຍອີງໃສ່ກົດລະບຽບຂອງພັກປະຊາຊົນປະຕິວັດລາວ ສະໄໝທີ 10 ວາງອອກ, ເອົາໃຈໃສ່ນໍາພາປັບປຸງການຈັດຕັ້ງພັກໃຫ້ປອດໃສ, ເຂັ້ມແຂງ, ໜັກແໜ້ນ ສອດຄ່ອງຕາມ 5 ຫລັກການ 3 ທິດນຳຂອງພັກ . ຜ່ານມາສາມາດຂະຫຍາຍມະຫາຊົນກ້າວໜ້າເຂົ້າພັກສໍາຮອງ ໄດ້ຍິງ 01 ສະຫາຍ ເລື່ອນສຳມະຊິກພັກສຳຮອງຂື້ນສົມບູນ 16 ສະຫາຍ ຍິງ 07 ສະຫາຍ, ນອກນີ້ ຄະນະພັກ, ຄະນະບັນຊາ, ກໍ່ໄດ້ເອົາໃຈໃສ່ຊີ້ນໍາ-ນຳພາພະນັກງານ-ນັກຮົບ ໃຫ້ປະຕິບັດໜ້າທີ່ວຽກງານວິຊາສະເພາະ ຕ້ານປະກົດການຫຍໍ້ທໍ້ໃນສັງຄົມໃຫ້ຫຼຸດໜ້ອຍຖອຍລົງ, ແກ້ໄຂຄະດີໃຫ້ມີຄວາມຍຸຕິທຳ ຖືກຕ້ອງຕາມລະບຽບກົດໝາຍຢ່າງເຂັ້ມງວດ.

    ທີ່ປະຊຸມ ຍັງໄດ້ເຊື່ອມຊືມເອກະສານຄຳສັ່ງແນະນຳຂອງເຈົ້າແຂວງ ບໍລິຄໍາໄຊ ສະບັບເລກທີ 12/ຂບຊ ລົງວັນທີ່ 07 ສິງຫາ 2019 ວ່າດ້ວຍການເພີ່ມທະວີປະຕິບັດດໍາລັດຂອງລັດຖະບານກ່ຽວກັບຈັນຍາບັນຂອງພະນັກງານ-ລັດຖະກອນ, ຄຳສັ່ງແນະນຳຂອງກົມໃຫຍ່ການເມືອງກະຊວງປ້ອງກັນຄວາມສະຫງົບ ສະບັບເລກທີ 2323/ກມປສ ວ່າດ້ວຍການຈັດຕັ້ງຜັນຂະຫຍາຍ ດຳລັດເລກທີ 184/ລບ, ດຳລັດຂອງລັດຖະບານ ເລກທີ 184/ລບ ວ່າດ້ວຈັນຍາບັນຂອງພະນັກງານ-ລັດຖະກອນ, ຈາກນັ້ນຜູ້ເຂົ້າຮ່ວມກອງປະຊຸມ ກໍ່ໄດຜັດປ່ຽນກັນຂຶ້ນປະກອບຄຳຄິດ, ຄຳເຫັນໃສ່ບົດສະຫຼຸບ, ທິດທາງແຜນການ ແລະ ຄໍາຖາມເຈາະຈິ້ມຈາກທ່ານປະທານຢ່າງກົງໄປກົງມາ ເພື່ອເປັນເອກະພາບກັນນຳໄປຈັດຕັ້ງປະຕິບັດ ໃຫ້ມີຜົນສຳເລັດຕາມລະດັບຄາດໝາຍທີ່ວາງໄວ້.