ໃນທ້າຍອາທິດທີ່ຜ່ານນີ້ ກອງກໍ່ສ້າງຮາກຖານ ເຂດຈຸດສູມໃຈກາງ ປກສ ແຂວງບໍລິໄຊ ທີ່ປະຈຳຢູ່ ບ້ານ ທົ່ງນາມີ ເມືອງປາກກະດິງ ແຂວງບໍລິຄຳໄຊ ໄດ້ນຳເອົາຄອມພິວເຕີ ຈຳນວນໜື່ງຊຸດ ມາມອບໃຫ້ອຳນາດການປົກຄອງບ້ານ ທົ່ງນາມີ  ລວມມູນຄ່າ 5.500.000 ກີບ ຕາງໜ້າມອບໂດຍ ທ່ານ ພັນໂທ ຜາຂົງ ດອກມະຈັນ ຄະນະປະຈໍາພັກ ຮອງຫົວໜ້າກອງບັນຊາການ ປກສ ແຂວງ ຫົວໜ້າຜູ້ຊີ້ນຳວຽກງານກອງກໍ່ສ້າງຮາກຖານ ປກສ ແຂວງ ບໍລິຄຳໄຊ ເຊິ່ງທ່ານໄດ້ກ່າວວ່າ: ການນຳເອົາຄອມພິວເຕີ ມາມອບໃຫ້ໃນຄັ້ງນີ້ ຍ້ອນເຫັນໄດ້ຄວາມໝາຍ,​ ຄວາມສໍາຄັນ ແລະ ການຂາດເຂີນທາງດ້ານອຸປະກອນຮັບໃຊ້ເຂົ້າໃນວຽກງານຕົວຈີງຂອງຫ້ອງການບ້ານ ໃຫ້ມີຄວາມວ່ອງໄວ ແລະ ທັນກັບສະພາບການ ໃນການປະຕິບັດໜ້າທີ່ວຽກງານໃຫ້ໄດ້ຮັບຜົນສຳເລັດຕາມລະດັບຄາດໝາຍ.

   ພ້ອມນີ້ ຍັງໄດ້ມອບເຄື່ອງນຸ່ງຫົ່ມ ອີກຈຳນວນໜຶ່ງ ໃຫ້ແກ່ພໍ່ແມ່ປະຊາຊົນຜູ້ທີ່ທຸກຍາກຂາດເຂີນທາງດ້ານເຄື່ອງນຸ່ງຫົ່ມ ຈຳນວນ 37 ຄອບຄົວ ລວມມູນຄ່າ 5.000.000 ກີບ, ອຳນາດການປົກຄອງບ້ານ ທົ່ງນາມີ ກໍ່ໄດ້ກ່າວຄຳຂອບໃຈມາຍັງຄະນະກອງກໍ່ສ້າງຮາກຖານ ທີ່ເຫັນໄດ້ຄວາມສຳຄັນໃນການປະຕິບັດວຽກງານ ຂາດເຂີນທາງດ້ານອຸປະກອນຈຶ່ງນຳເອົາຄອມພິວເດີມາມອບໃຫ້ໃນຄັ້ງນີ້ ແລະຈະນຳໄປຮັບໃຊ້ເຂົ້າໃນວຽກງານໃຫ້ມີຄວາມວ່ອງໄວຂຶ້ນກ່ວາເກົ່າ ແລະ ຍັງເປັນຫ່ວງ ເປັນໄຍ ພໍ່ແມ່ປະຊາຊົນບັນດາເຜົ່າ ທີ່ພວກທ່ານຍັງໄດ້ໃຫ້ ການຊ່ວຍເຫຼືອໃນຄັ້ງນີ້, ຂໍອວຍພອນໃຫ້ທ່ານ ພ້ອມຄະນະຈົ່ງມີສຸຂະພາບແຂງແຮງ ປະສົບຜົນສຳເລັດໃນໜ້າທີ່ວຽກງານທຸກປະການ.