ໃນວັນທີ 4 ກັນຍາ 2019 ຢູ່ຫ້ອງປະຊຸມຂອງກອງບັນຊາການທະຫານເມືອງວຽງທອງ ແຂວງບໍລິຄໍາໄຊ ໄດ້ຈັດກອງປະຊຸມເຜີຍແຜ່ດໍາລັດເລກທີ 184/ລບ ແລະ ຄຳສັ່ງ ເລກທີ 12/ຂບຊ ແລະ ບັນດານິຕິກຳຂອງຫ້ອງການພາຍໃນ ແລະ ຫ້ອງການຈັດຕັ້ງເມືອງ ໂດຍເປັນກຽດເຂົ້າຮ່ວມເຜີຍແຜ່ຂອງ ທ່ານ ຄໍາມອນ ໄຊພົມມີ ຮອງເລຂາພັກເມືອງ ຮອງເຈົ້າເມືອງວຽງທອງ, ມີຄະນະພັກ, ຄະນະກົມກອງ, ພະນັກງານທະຫານພາຍໃນກົມກອງ ແລະ ແຂກ ເຂົ້າຮ່ວມ.

     ກອງປະຊຸມ ຜູ້ເຂົ້າຮ່ວມໄດ້ຮັບຟັງການເຜີຍແຜ່ເອກະສານຕ່າງໆ ເປັນຕົ້ນແມ່ນ ດຳລັດເລກ 184/ລບ ລົງວັນທີ 26/06/2019 ຂອງລັດຖະບານ ວ່າດ້ວຍຈັນຍາບັນຂອງພະນັກງານ-ລັດຖະກອນ ແລະ ຄຳສັ່ງ ເລກທີ 12/ຂບຊ ລົງວັນທີ 7 ສິງຫາ 2019, ຄຳສັ່ງເລກທີ 460/ຈມວທ, ລົງວັນທີ 16 ສິງຫາ 2019 ຂອງເຈົ້າເມືອງ ວຽງທອງ ວ່າດ້ວຍເພີ່ມທະວີຈັດຕັ້ງປະຕິບັດດຳລັດຂອງລັດຖະບານກ່ຽວກັບຈັນຍາບັນຂອງພະນັກງານ-ລັດຖະກອນ, ເນື້ອໃນເອກະສານໃຫ້ຮູ້ວ່າ ພະນັກງານ - ລັດຖະກອນທຸກສະຫາຍ ຈະຕ້ອງໄດ້ມີຈັດຍາບັນຕໍ່ຕົນເອງ, ຈັນຍາບັນຕໍ່ອາຊີບ, ຈັນຍາບັນຕໍ່ການຈັດຕັ້ງ ແລະ ຈັນຍາບັນຕໍ່ປະຊາຊົນ, ສັງຄົມ, ທັງນີ້ ກໍເພື່ອແນ່ໃສ່ຄຸ້ມຄອງ ແລະ ສຶກສາອົບຮົມ ໃຫ້ພະນັກງານ-ລັດຖະກອນ ມີຄຸນທາດການເມືອງ, ຄຸນສົມບັດສິນທໍາປະຕິວັດໜັກແໜ້ນ, ມີຄວາມຮັບຜິດຊອບສູງຕໍ່ໜ້າທີ່ວຽກງານຂອງຕົນ, ມີສະຕິຕື່ນຕົວເຄົາລົບ, ປະຕິບັດກົດໝາຍ ແລະ ລະບຽບການຢ່າງເຂັ້ມງວດ, ມີປະສິດທິພາບປະກອບສ່ວນເຂົ້າໃນການປົກປັກຮັກສາ ແລະ ພັດທະນາປະເທດຊາດ ແລະ ຜູ້ເຂົ້າຮ່ວມຍັງໄດ້ຮັບຟັງການຜ່ານເອກະສານບັນດານິຕິກຳຂອງຫ້ອງການພາຍໃນ ແລະ ຫ້ອງການຈັດຕັ້ງເມືອງ.