ຫ້ອງສັນຕິບານ ປກສ ແຂວງ ລົງເຜີຍແຜ່ເອກະສານວຽກງານຕຳຫຼວດກວດຄົນເຂົ້າ-ອອກເມືອງ, ວຽກງານຄຸ້ມຄອງຄົນຕ່າງປະເທດ ແລະ ວຽກງານຕຳຫຼວດທ່ອງທ່ຽວ ໃຫ້ແກ່ບັນດາ ປກສ ເມືອງ 07 ຕົວເມືອງ ທົ່ວກອງບັນຊາການ ປກສ ແຂວງ ນຳໂດຍ ທ່ານ ພັນໂທ ກົງຕີ ພຸດທະວົງ ຮອງຫົວໜ້າຫ້ອງສັນຕິບານ ປກສ ແຂວງ ມີຄະນະກອງບັນຊາການ ປກສ ເມືອງ, ຕຳຫຼວດກວດຄົນເຂົ້າ-ອອກເມືອງ, ອຳນາດການປົກຄອງບ້ານ, ບັນດາເຮືອນພັກ, ໂຮງແຮມ  ແລະ ພະນັກງານພາກສ່ວນກ່ຽວຂ້ອງເຂົ້າຮ່ວມຮັບຟັງ.

     ທ່ານ ພັນໂທ ກົງຕີ ພຸດທະວົງ ໄດ້ກ່າວວ່າ: ຈຸດປະສົງທີ່ລົງເຜີຍແຜ່ເອກະສານວຽກງານຕຳຫຼວດກວດຄົນເຂົ້າ-ອອກເມືອງ, ວຽກງານຄຸ້ມຄອງຄົນຕ່າງປະເທດ ແລະ ວຽກງານຕຳຫຼວດທ່ອງທ່ຽວໃນຄັ້ງນີ້ ກໍ່ເພື່ອໃຫ້ອຳນາດການປົກຄອງບ້ານ ແລະ ພໍ່ແມ່ນປະຊົນຊົນມີຄວາມຮັບຮູ້, ເຂົ້າໃຈກ່ຽວກັບກົດໝາຍວ່າດ້ວຍການເຂົ້າ - ອອກເມືອງ, ການຄຸ້ມຄອງຄົນຕ່າງປະເທດ ສະບັບເລກທີ 59/ສພຊ, ລົງວັນທີ 26 ທັນວາ 2014  ໃຫ້ປະຊາຊົນໄດ້ຮູ້ເຖີງຄວາມໝາຍສຳຄັນຂອງການເຂົ້າ-ອອກເມືອງຖືກຕ້ອງຕາມປະຕູດ່ານທີ່ທາງການກຳນົດໄວ້,​ ເພື່ອຮັບປະກັນການຈັດຕັ້ງປະຕິບັດວຽກງານກວດຄົນເຂົ້າ-ອອກເມືອງ ຂອບເຂດປະຕູດ່ານພາຍໃນແຂວງບໍລິຄຳໄຊ ໃຫ້ມີຄວາມເປັນເອກະພາບ ມີຄວາມສະຫງົບ ແລະ ເປັນລະບຽບຮຽບຮ້ອຍ ທັງເປັນການຄຸ້ມຄອງຄົນຕ່າງປະເທດທີ່ເຂົ້າມາເຄື່ອນໄຫວຢູ່ພາຍໃນແຂວງບໍລິຄຳໄຊ ໃຫ້ມີຄວາມຖືກຕ້ອງຕາມຫຼັກການ ແລະ ເປັນການປັບປຸງບັນດາຫົວໜ່ວຍທຸລະກິດ ໂດຍສະເພາະແມ່ນບັນດາ ໂຮງແຮມ, ເຮືອນພັກ,​ ຮ້ານອາຫານ, ຮ້ານບັນເທີງຄາລາໂອເກະ ທີ່ບໍລິການນັກທ່ອງທ່ຽວ ໃຫ້ເຂົ້າສູ່ລະບຽບຫຼັກການ , ຈາກນັ້ນພະນັກງານວິຊາສະເພາະ ຈາກພະແນກຕຳຫຼວດກວດຄົນເຂົ້າ-ອອກເມືອງ, ພະແນກຕຳຫຼວດຄຸ້ມຄອງຄົນຕ່າງປະເທດ ແລະ ພະແນກຕຳຫຼວດທ່ອງທ່ຽວ ກໍ່ໄດ້ຜັດປ່ຽນກັນຂື້ນເຜີຍແຜ່ບັນດາເອກະສານທີ່ສຳຄັນຕ່າງໆກ່ຽວກັບການຄຸ້ມຄອງ ແລະ ກວດຄົນເຂົ້າ-ອອກເມືອງ ເຊັ່ນ:​ກົດໝາຍວ່າດ້ວຍການເຂົ້າ-ອອກ ແລະ ຄຸ້ມຄອງຄົນຕ່າງປະເທດ ຢູ່ ສປປ ລາວ, ດຳລັດເລກທີ 136/ນຍ ( ໝວດທີ IX ມາດຕາ 31 ມາດຕະການຕໍ່ຜູ້ລະເມີດ ),​ ດໍາລັດເລກທີ 558/ລບ ວ່າດ້ວຍດ່ານຊາຍແດນ ແລະ ສະໜາມບີນສາກົນ ແລະ ດຳລັດເລກທີ 198/ນຍ ວ່າດ້ວຍການແຕ່ງດອງລະຫວ່າງພົນລະເມືອງລາວ ແລະ ຄົນຕ່າງປະເທດ, ເອກກະສານ ວ່າດ້ວຍການດຳລົງຊີວິດຢູ່ລາວຖາວອນຂອງຄົນຕ່າງປະເທດ,​ ຄໍາສັ່ງແນະນໍາກ່ຽວກັບຂັ້ນຕອນການຜ່ານ, ສຳພາດເອກະສານແຕ່ງດອງ ແລະ ຢູ່ລາວຖາວອນ, ເອກະສານການແບ່ງຂັ້ນຄຸ້ມຄອງຄົນຕ່າງປະເທດ ແລະ ກົດໝາຍວ່າດ້ວຍການທ່ອງທ່ຽວສະບັບເລກທີ 32/ສພຊ, ເອກກະສານວ່າດ້ວຍການຄຸ້ມຄອງທຸລະກິດບໍລິການໂຮງແຮມ-ເຮືອນພັກ, ເອກະສານວ່າດ້ວຍການເພີ່ມທະວີວຽກງານຄຸ້ມຄອງການທ່ອງທ່ຽວ,​ ເອກະສານວ່າດ້ວຍການຄຸ້ມຄອງທຸລະກິດພັດຕະຄານ,​ຮ້ານອາຫານ, ເອກະສານວ່າດ້ວຍການຄຸ້ມຄອງກວດກາສະຖານທີ່ບັນເທີງ ແລະ ຄາລາໂອເກະ ທັງໝົດນີ້ ກໍ່ເພື່ອເຮັດໃຫ້ບັນດາຜູ້ເຂົ້າຮ່ວມໄດ້ຮັບຮູ້ເຂົ້າໃຈຕໍ່ລະບຽບຫຼັກການຕ່າງໆແລ້ວນຳໄປຈັດຕັ້ງປະຕິບັດຢ່າງຖືກຕ້ອງແນ່ໃສ່ເຮັດໃຫ້ສັງຄົມມີຄວາມສະຫງົບປອດໄພ, ເປັນລະບຽບຮຽບຮ້ອຍດີຂື້ນເລື້ອຍໆ.