ຕອນບ່າຍ ວັນທີ  12 ສິງຫາ 2019 ນີ້, ບໍລິສັດ ສະຕຣາ ໂທລະຄົມ (ຢູນິເທວ) ສາຂາແຂວງ ບໍລິຄໍາໄຊ ໄດ້ສະໜັບສະໜູນພີມປ້າຍ ແລະ ຕິດຕັ້ງປ້າຍໂຄສະນາປູກຈິດສໍານຶກການຮັກສາຄວາມສະອາດພາຍໃນຕົວເມືອງປາກຊັນ ໃຫ້ແກ່ຫ້ອງການ ອົງການພັດທະນາ ແລະ ບໍລິຫານຕົວເມືອງ (ອພບຕ) ເມືອງປາກຊັນ ແຂວງບໍລິຄຳໄຊ ຈໍານວນ 8 ແຜ່ນ ມູນຄ່າ 8,000,000 ກີບ, ລວມທັງໝົດ 5 ຈຸດ ຄື: ໜ້າໂຮງແຮມປາກຊັນ , ໜ້າວັດຫ້ວຍສຽດທາງເຂົ້າຕົວເມືອງປາກຊັນ, ໜ້າສະຖານີໄຟຟ້າລາວ ແລະ 03 ແຍກບ້ານຊະນະໄຊ.

ເປັນກຽດມອບຂອງ ທ່ານ ນາງ ດາວວອນ ເພັດສານຸພົນ ອໍານວຍການ ບໍລິສັດ ສະຕຣາ ໂທລະຄົມ ສາຂາ ແຂວງ ບໍລິຄໍາໄຊ ພ້ອມດ້ວຍຄະນະ ແລະ ເປັນກຽດກ່າວຮັບໂດຍ ທ່ານ ນາງ ເຄນໝັ້ນ ລໍມະນີ ຮອງປະທານ ອົງການພັດທະນາ ແລະ ບໍລິຫານຕົວເມືອງ (ອພບຕ) ເມືອງປາກຊັນ,​ ມີພະນັກງານ, ຂະແໜງການທີ່ກ່ຽວຂ້ອງທັງສອງຝ່າຍເຂົ້າຮ່ວມ.

ທ່ານ ນາງ ດາວອນ ເພັດສານຸພົນ ໄດ້ກ່າວວ່າ: ຍ້ອນເຫັນໄດ້ຄວາມສໍາຄັນ ໃນການເຮັດໃຫ້ຕົວເມືອງມີຄວາມສະອາດ, ມີຄວາມເປັນລະບຽບຮຽບຮ້ອຍ ຢູນິເທວ ມີຄວາມຍິນດີທີ່ໄດ້ເປັນສ່ວນໜຶ່ງໃນການປຸກລະດົມ ແລະ ປູກຈິດສຳນັກໃຫ້ປະຊາຊົນທົ່ວສັງຄົມເວົ້າລວມ, ເວົ້າສະເພາະແມ່ນຊາວເມືອງປາກຊັນ ໃຫ້ພ້ອມກັນຮັກສາຄວາມສະອາດພາຍໃນຕົວເມືອງ, ຊ່ວຍສ້າງຕົວເມືອງໃຫ້ນັບມື້ນັບມີຄວາມສະອາດຈົບງາມ ນີ້ກໍ່ເປັນອີກສ່ວນໜື່ງທີ່ທາງບໍລິສັດ ສະຕາ ໂທລະຄົມ (ຢູນິເທວ) ສາຂາ ແຂວງບໍລິຄຳໄຊ ໄດ້ປະກອບສ່ວນຊ່ວຍເຫລືອ ແລະ ພັດທະນາສັງຄົມຕະຫລອດມາ, ບໍລິສັດ ຈະບໍ່ຢຸດໃຫ້ຄວາມຊ່ວຍເຫລືອສັງຄົມແຕ່ພຽງເທົ່ານີ້ ຍັງມີຫລາຍໂຄງການທີ່ທາງບໍລິສັດ ກຳລັງຈະດຳເນີນໃນຕໍ່ໜ້າ ເພື່ອເປັນສ່ວນຮ່ວມໃນການພັດທະນາສັງຄົມຕໍ່ໄປ ຕາມສະໂລແກນທີ່ວ່າ ຢູນິເທວ ໃຫ້ຊີວິດທີ່ສົດໃສ” ສະນັ້ນ ທາງບໍລິສັດ ສະຕຣາ ໂທຄົມ (ສາຂາ ແຂວງ ບໍລິຄໍາໄຊ) ຈື່ງໄດ້ສະໜັບສະໜູນການພີມ ແລະ ຕິດຕັ້ງປ້າຍ ຈໍານວນດັ່ງກ່າວ ພ້ອມທັງ ມອບ ຫ້ອງການ ອົງການພັດທະນາ ແລະ ບໍລິຫານຕົວເມືອງ (ອພບຕ) ເປັນຜູ້ຄຸ້ມຄອງ ແລະ ນຳໃຊ້ຕໍ່ໄປ.