ໃນວັນທີ 9 ສິງຫາ 2019 ທີ່ຫ້ອງການບ້ານໂພນດູ່ ເມືອງ ວຽງທອງ ແຂວງ ບໍລິຄຳໄຊ ໄດ້ມີກອງປະຊຸມປິດສະຫຼູບວຽກງານພິສູດຫຼັກຖານອອກໃບຕາດິນແບບເປັນລະບົບ ໂດຍເປັນກຽດເຂົ້າຮ່ວມຂອງທ່ານ ວົງສີ ທອງສີ ອີນທິປັນຍາ ກຳມະການພັກແຂວງ, ເລຂາພັກເມືອງ, ເຈົ້າເມືອງວຽງທອງ.

 

      ຈຸດປະສົງຂອງກອງປະຊຸມ ກໍເພື່ອເປັນການປິດສະຫລຸບວຽກງານອອກໃບຕາດິນແບບເປັນລະບົບ ເຊິ່ງເລີ່ມຈັດຕັ້ງປະຕິບັດມາແຕ່ວັນທີ 04/05/2019 ຫາ ວັນທີ 07/08/2019 ໄດ້ສໍາເລັດ. ບ້ານໂພນດູ່ ມີເນື້ອທີ່ລວມທັງໝົດ 2.777,56 ເຮັກຕ່າ, ມີ112 ຫຼັງຄາເຮືອນ, ມີ 143 ຄອບຄົວ, ມີພົນລະເມືອງທັງໝົດ 649 ຄົນ ຍິງ 320 ຄົນ. ຜ່ານການລົງພິສູດ ແລະ  ຈັດຕັ້ງປະຕິບັດພາກສະໜາມຕົວຈິງສາມາດສຳຫຼວດຂຶ້ນບັນຊີທີ່ດິນ ໄດ້ 186 ຕອນ ໃນເນື້ອທີ່ທັງໝົດ 841.209.00 ຕາແມັດ ເທົ່າກັບ 84.12 ເຮັກຕ່າ ໃນນັ້ນ ມີດິນປຸກສ້າງ 102 ຕອນ 11.075 ເຮັກຕ່າ, ດິນກະສິກຳ 84 ຕອນ 73.045 ເຮັກຕ່າ ແລະ ຍັງບໍໄດ້ປະກອບສໍານວນ 9 ຕອນ ພ້ອມໄດ້ປັກຫຼັກໝາຍເຂດດິນແຕ່ລະປະເພດ ໄດ້ 740 ຫຼັກ ເພື່ອເປັນຫຼັກຖານຕາມເຂດແດນຂອງດິນແຕ່ລະຕອນຂອງບ້ານ ແລະ ຂອງບຸກຄົນ.