ໃນວັນທີ 9 ສິງຫາ 2019 ຢູ່ຫ້ອງປະຊຸມຊັ້ນ III ຫ້ອງວ່າການປົກຄອງເມືອງວຽງທອງ, ແຂວງບໍລິຄໍາໄຊ ໄດ້ມີກອງປະຊຸມສະຫຼຸບລາຍງານການຈັດຕັ້ງປະຕິບັດກິດຈະກໍາ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2019 ຂອງໂຄງການຄຸ້ມຄອງປ່າປ້ອງກັນແຫ່ງຊາດ "ນໍ້າມ່ວນ-ນໍ້າຍວງ" (ເຂດຍອດນໍ້າມ່ວນ) ໃຫ້ມີຄວາມຍືນຍົງ ໂດຍເປັນປະທານຂອງ ທ່ານ ພອນສະຫວັນ ຫອມນະບຸນລັດ ຫົວໜ້າພະແນກກະສິກໍາ-ປ່າໄມ້ແຂວງບໍລິຄໍາໄຊ, ເປັນກຽດເຂົ້າຮ່ວມຂອງ ທ່ານ ອາລຸນສັກ ປະທໍາມະວົງ ຄະນະປະຈໍາພັກເມືອງ, ຮອງເຈົ້າເມືອງວຽງທອງ, ມີທີມງານຄຸ້ມຄອງປ່າປ້ອງກັນແຫ່ງຊາດ, ຫົວໜ້າຫ້ອງການ, ພະນັກງານທີ່ກ່ຽວຂ້ອງ, ນາຍບ້ານ ແລະ ແຂກຖືກເຊີນ ເຂົ້າຮ່ວມ.

    ທ່ານ ຊາຍສົມແພງ ແສງຄໍາຢອງ ຫົວໜ້າໂຄງການຄຸ້ມຄອງປ່າປ້ອງກັນແຫ່ງຊາດເຂດຍອດນໍ້າມ່ວນ ໄດ້ລາຍງານຕໍ່ກອງປະຊຸມວ່າ: ໃນ 6 ເດືອນຕົ້ນປີ 2019 ໂຄງການຄຸ້ມຄອງປ່າປ້ອງກັນມີ 21 ກິດຈະກໍາ, ມີ 88 ໜນ້າວຽກຍ່ອຍ, ປະຕິບັດສໍາເລັດແລ້ວ 36 ໜ້າວຽກ, ກໍາລັງຈັດຕັ້ງປະຕິບັດ 46 ໜ້າວຽກ ແລະ ບໍ່ທັນໄດ້ປະຕິບັດມີ 6 ໜ້າວຽກ ເຊີ່ງຈັດຕັ້ງປະຕິບັດຕົວຈິງໄດ້ 67,05%. ຜ່ານມາໂຄງການໄດ້ສ້າງຄວາມເຂັ້ມແຂງໃຫ້ແກ່ພະນັກງານຂັ້ນເມືອງ ແລະ ບ້ານໃນການຄຸ້ມຄອງຊັບພະຍາກອນປ່າໄມ້ ເປັນຕົ້ນແມ່ນຈັດຝຶກອົບຮົມວຽກງານຄຸ້ມຄອງປ່າໄມ້, ທັດສະນະສຶກສາໃຫ້ແກ່ພະນັກງານ ແລະ ຄູ່ຮ່ວມງານທີ່ກ່ຽວຂ້ອງ, ຝຶກອົບຮົມວຽກງານກວດກາລາດຕາເວັນ ແລະ ການຄຸ້ມຄອງປ່າໄມ້, ຝຶກອົບຮົມລະບົບການຄຸ້ມຄອງການບໍລິຫານກອງທຶນໝູນວຽນໃຫ້ບ້ານ, ຝຶກອົບຮົມວຽກງານປັບປຸງຊີວິດການເປັນຢູ່ໃຫ້ແກ່ຊຸມຊົນໃນການປູກຝັງ-ລ້ຽງສັດ, ການເຮັດກະສິກໍາແບບຍືນຍົງ, ທັດສະນະສຶກສາວຽກງານການພັດທະນາ ແລະ ການອະນຸລັກ ໃຫ້ບ້ານ, ການຈັດສັນເຂດປ່າປ້ອງກັນ, ປ່າຫວງຫ້າມ, ປ່າຄຸ້ມຄອງນໍາໃຊ້, ການປັກຫຼັກໝາຍ ແລະ ຕິດປ້າຍຂອບເຂດປ່າປ້ອງກັນ, ເຜີຍແຜ່ລະບຽບການໃນການຕ້ານ ແລະ ສະກັດກັ້ນການຄ້າ-ຂາຍສັດປ່າ, ການປ່ອຍກອງທຶນປັບປຸງຊິວິດການເປັນຢູ່ໃຫ້ບ້ານ.

ບັນດາຜູ້ເຂົ້າຮ່ວມ ຍັງໄດ້ຜັດປ່ຽນກັນຂຶ້ນປະກອບຄໍາຄິດ-ຄໍາເຫັນຢ່າງກົງໄປກົງມາຕໍ່ບົດສະຫຼຸບເພື່ອນໍາໄປຈັດຕັ້ງປະຕິບັດໃຫ້ໄດ້ຮັບຜົນດີ. ຈາກນັ້ນ ກໍ່ໄດ້ມອບປ້າຍກອງທຶນປັບປຸງຊິວິດການເປັນຢູ່ໃຫ້ບັນດາບ້ານເປົ້າໝາຍ.