ຊຸດອົບຮົມຄູຝຶກການໂຄສະນາສົນທິສັນຍາ ວ່າດ້ວຍສິດທິເດັກ ແລະ ສື່ສັງຄົມອອນລາຍ ໄດ້ຈັດຂຶ້ນໃນວັນທີ 13 ສິງຫາ 2019 ຢູ່ຫ້ອງປະຊຸມພະແນກ ຖວທ ແຂວງບໍລິຄຳໄຊ ໂດຍການເຂົ້າຮ່ວມຂອງ ທ່ານ ສົນທອງ ວີບຸນກ້ວາງ ຮອງຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງບໍລິຄຳໄຊ, ທ່ານ ສີພາ ນົງລາດ ຮອງປະທານສະມາຄົມນັກຂ່າວແຫ່ງປະເທດລາວ ແລະ ທ່ານ ຕະບອງເພັດ ພຸດທະວົງ ຊ່ຽວຊານສື່ສານມວນຊົນ ອົງການຢູນີເສບຟ໌ ປະຈຳລາວ, ມີທີມງານຄູຝຶກ ແລະ ສະມາຊິກສື່ໄວໜຸ່ມຈາກແຂວງໄຊສົມບູນ, ວຽງຈັນ, ບໍລິຄຳໄຊ, ຄຳມ່ວນ, ສະຫວັນນະເຂດ, ສາລະວັນ, ຈຳປາສັກ, ເຊກອງ, ອັດຕະປື ແລະ ນະຄອນຫຼວງວຽງຈັນ ເຂົ້າຮ່ວມ.

     ສະມາຊິກສື່ໄວໜຸ່ມຈາກ 10 ແຂວງ ຈະໄດ້ຮຽນຮູ້ຫຼາຍບົດຮຽນທີ່ສຳຄັນ ເປັນຕົ້ນແມ່ນຄວາມເປັນມາຂອງສົນທິສັນຍາວ່າດ້ວຍສິດທິເດັກ, ສິດທິພື້ນຖານຂອງເດັກ(CRC), ຫຼັກການວິທີເປັນຄູຝຶກທີ່ດີ, 10 ເຕັກນິກການໄລຟ໌ສົດຜ່ານເຟຊ໌ບຸກ, ເຕັກນິກການຖ່າຍວິດີໂອ ໃຫ້ໄດ້ພາບ ແລະ ສຽງທີ່ດີ, ຮຽນຮູ້ກ່ຽວກັບການວາງແຜນ, ການກຳນົດເນື້ອຫາ, ການຂຽນສະຄຣິບຖ່າຍວິດີໂອ, ວິທີສຳພາດ ແລະ ວິທີເຮັດວຽກໃນວິທະຍຸໄວໜຸ່ມ, ພ້ອມດຽວກັນຍັງຈະໄດ້ຮຽນຮູ້ ແລະ ທົດລອງຖ່າຍວິດີໂອ, ຖ່າຍພາບນິ້ງ ແລະ ຜະລິດລາຍການວິທະຍຸໃນຫົວຂໍ້: ການຢູ່ລອດ, ການສຶກສາ, ການປົກປ້ອງເດັກ ແລະ ການມີສ່ວນຮ່ວມ, ເຕັກນິກການຕັດຕໍ່ວິດີໂອ ແລະ ອື່ນໆ ຫຼັງຈາກນັ້ນ ແຕ່ລະກຸ່ມ ຈະໄດ້ສະເໜີຜົນງານຂອງຕົນເອງ ແລະ ແລກປ່ຽນຄຳຄິດເຫັນເຊີ່ງກັນ ແລະ ກັນ ເພື່ອນຳໄປປັບປຸງແກ້ໄຂ ເຮັດໃຫ້ຜົນງານ ແລະ ເນື້ອຫາລາຍງານ ໄດ້ຮັບການພັດທະນາໃຫ້ດີຂຶ້ນໃນຕໍ່ໜ້າ. ຊຸດຝຶກອົບຮົມດັ່ງກ່າວຈະໄດ້ດຳເນີນໄປເປັນເວລາ 3 ວັນເຕັມຈຶ່ງສຳເລັດ.

    ສຳລັບໂຄງການວິທະຍຸໄວໜຸ່ມ ໄດ້ເລີ່ມດຳເນີນງານແຕ່ປີ 2004 ຈາກ 3 ແຂວງໃນອາດີດ ຄື: ແຂວງອຸດົມໄຊ, ຫຼວງພະບາງ ແລະ ຈຳປາສັກ, ປະຈຸບັນຂະຫຍາຍໄດ້ແລ້ວທຸກແຂວງໃນທົ່ວປະເທດ ເຊີ່ງໂຄງການດັ່ງກ່າວນີ້ໄດ້ຊຸກຍູ້ສົ່ງເສີມໃຫ້ເດັກ ໄດ້ສະແດງອອກຕາມພາລະບົດບາດ ໃນການໂຄສະນາສິດທິເດັກ ແລະ ບັນຫາອື່ນໆ ໂດຍສະເພາະບັນຫາສຸຂະພາບ, ສິ່ງເສບຕິດ, ໂລເອດສ໌, ການຄ້າມະນຸດ, ນ້ຳສະອາດ, ສິ່ງແວດລ້ອມ ແລະ ອື່ນໆ ຜ່ານວິທະຍຸ, ໂທລະພາບ ແລະ ສື່ສັງຄົມອອນລາຍ.