ໃນວັນທີ 23 ກໍລະກົດ 2019 ຢູ່ເມືອງໄຊຈໍາພອນ ໄດ້ຈັດພິທີປິດຊຸດອົບຮົມການຮຽນ-ການສອນ ກົດໜາຍຊັ້ນຕົ້ນໄລຍະສັ້ນ ລະບົບ 45 ວັນ ໃຫ້ພະນັກງານ, ເລຂາພັກບ້ານ, ນາຍບ້ານກຸ່ມບ້ານນໍ້າອອ້ນ ຫ້ອງການຍຸຕິທໍາເມືອງໄຊຈໍາພອນ ປະຈໍາສົກປີ 2019 ເຂົ້າຮ່ວມໂດຍ ທ່ານ ຄໍາຜັນ ສິດໄຊຍະສານ ຮອງຫົວໜ້າພະເເນກຍຸຕິທໍາເເຂວງບໍລິຄໍາໄຊ, ທ່ານ ໂກ່ ໄຊສົມບັດ ຄະນະປະຈໍາພັກເມືອງ ຮອງເຈົ້າເມືອງໄຊຈໍາພອນ, ມີຄະນະຮັບຜິດຊອບການຮຽນການ-ສອນຂັ້ນເມືອງ, ແຂກຖືກເຊີນ ແລະ ສໍາມະນາກອນ ເຂົ້າຮ່ວມ.

      ຊຸດອົບຮົມ ກົດໝາຍຊັ້ນຕົ້ນໄດ້ເລີ່ມຈັດຕັ້ງປະຕິບັດມາເເຕ່ວັນທີ 27 ມີນາ ຫາ ວັນທີ 6 ມິຖຸນາ 2019 ໄດ້ສຳເລັດ, ໂດຍໄດ້ນໍາເອົາ 5 ວຽກງານຈຸດສຸມຂອງຫ້ອງການຍຸຕິທໍາເມືອງໄຊຈໍາພອນ ເເລະ  34 ກົດໜາຍ ມາເຊື່ອມຊືມໃຫ້ສໍາມະນາກອນ ລວມມີ 22,5 ໜ່ວຍກິດ ເທົ່າກັບ 360 ຊົ່ວໂມງ ໂດຍມີສໍາມະນາກອນເຂົ້າຮຽນທັງໜົດ 22 ຄົນ, ຍິງ 5 ຄົນ, ໃນນັ້ນ ມີພະນັກງານຂອງເມືອງ, ມາຈາກອໍານາດການປົກຄອງບ້ານ 16 ຄົນ. ຈຸດປະສົງກໍ່ເພື່ອຍົກລະດັບຄວາມຮູ້ຄວາມສາມາດ ວຽກງານກົດໜາຍຫັນລົງສູ້ຮາກຖານບ້ານໃນທົ່ວເມືອງ ເຮັດໃຫ້ວຽກງານດັ່ງກ່າວໜັກເເໜ້ນເຂັ້ມເເຂງ, ເຕີບໃຫຍ່ຂະຫຍາຍຕົວຢູ່ຂັ້ນຮາກຖານ.

    ໂອກາດດັ່ງກ່າວ ຍັງໄດ້ມີພິທີມອບໃບຢັ້ງຢືນ ແລະ ໃບຍ້ອງຍໍ້ ໃຫ້ເເເກ່ສໍາມະນາກອນ ມອບໂດຍ ທ່ານ ຄໍາຜັນ ສິດໄຊຍະສານ ຮອງຫົວໜ້າພະເເນກຍຸຕິທໍາເເຂວງບໍລິຄໍາໄຊ.

           ໃນຕອນທ້າຍທ່ານຮອງຫົວໜ້າພະແນກ ຍັງໄດ້ມີຄໍາເຫັນ ໂດຍທ່ານໄດ້ສະເເດງຄໍາຍ້ອງຍໍຊົມເຊີຍ ມາຍັງຄະນະຮັບຜິດຊອບຂັ້ນເມືອງ ທີ່ໄດ້ເອົາໃຈໃສ່ຊີ້ນໍາ-ນໍາພາເຮັດການຮຽນການສອນສໍາເລັດຕາມເປົ້າໜາຍທີ່ວາງໄວ ແລະ ຍັງໄດ້ເນັ້ນໜັກໃຫ້ຫ້ອງການຍຸຕິທໍາເມືອງ ຈົ່ງສືບຕໍ່ນໍາເອົາກົດລົງເຜີຍເເຜ່ ຢູ່ຂັ້ນຮາກຖານບ້ານໃນທົ່ວເມືອງຢ່າງເປັນປົກກະຕິ ເປັນຕົ້ນເເມ່ນກົດໜາຍວ່າດ້ວຍຄອບຄົວ, ກົດໜາຍວ່າດ້ວຍທີ່ດິນ ແລະ ກົດໜາຍວ່າດ້ວຍຢາເສບຕິດ, ສໍາມະນາກອນທີ່ໄດ້ເຂົ້າຝຶກອົບຮົມໃນຄັ້ງນີ້ ຈົ່ງນໍາເອົາຄວາມຮູ້ຄວາມສາມາດທີ່ໄດ້ຮຽນມາ ໄປໜຸນໃຊ້ເຂົ້າໃນວຽກງານຕົວຈິງ ໃຫ້ເກີດດອກອອກຜົນ ແລະ ສອດຄ່ອງກັບສະພາບຄວາມເປັນຈິງ ເປັນເສນາທິການໃຫ້ເເກ່ຄະນະບ້ານໃນການໄກ່ເກ້ຍຂໍ້ຂັດເເຍ່ງຕ່າງໆ ໃນຂັ້ນບ້ານໃຫ້ນັບມື້ຫຼຸດລົງເທື່ອລະກ້າວ.