ພາຍຫຼັງກອງປະຊຸມໄດ້ດຳເນີນມາເປັນເວລາ 3 ວັນ 7-9 ສິງຫານີ້ ຢູ່ຫ້ອງປະຊຸມຫ້ອງວ່າການປົກຄອງເມືອງຄຳເກີດ ແລະ ມາໃນຕອນບ່າຍຂອງວັນທີ 9 ສິງຫາ ກອງປະຊຸມດັ່ງກ່າວກໍໄດ້ປິດລົງຢ່າງເປັນທາງການ ໂດຍໃຫ້ກຽດເຂົ້າຮ່ວມຂອງທ່ານ ບຸນມາ ບຸຈະເລີນ ຮອງເຈົ້າແຂວງບໍລິຄຳໄຊ ຜູ້ຊີ້ນຳວຽກງານບໍລິຫານລັດ ແລະ ຂົງເຂດວັດທະນະທຳສັງຄົມ, ທ່ານ ຄຳສີ ຍົມມະລາດ ຫົວໜ້າພະແນກສຶກສາທິການ, ຮອງເຈົ້າເມືອງຄຳເກີດ, ຫົວໜ້າຫ້ອງການສຶກສາທິການ ແລະ ກິລາ 7 ຕົວເມືອງ ພ້ອມດ້ວຍແຂກຖືກເຊີນເຂົ້າຮ່ວມ.

    ກອງປະຊຸມຄັ້ງນີ້ ໄດ້ຮັບຮອງເອົາເນື້ອໃນບົດສະຫຼຸບຜົນການຈັດຕັ້ງປະຕິບັດແຜນພັດທະນາການສຶກສາ ແລະ ກິລາ ຂອງແຂວງປະຈໍາສົກຮຽນ 2018-2019 ແລະ ຄາດໝາຍສູ້ຊົນສົກຮຽນ 2019-2020, ແລະ ເຫັນໄດ້ວ່າການສຶກສາກ່ອນໄວຮຽນ ມີການຂະຫຍາຍຕົວເປັນທີ່ໜ້າເພິ່ງພໍໃຈ, ໃນຂະນະທີ່ການສຶກສາຊັ້ນປະຖົມມີລັກສະນະທົດຖອຍ, ອັດຕາການຄ້າງຫ້ອງຍັງສູງ ແລະ ອັດຕາການປະລະການຮຽນຂອງນັກຮຽນມີລັກສະນະເພີ່ມຂຶ້ນ​ ສ່ວນການສຶກສາຊັ້ນມັດທະຍົມ ບໍ່ໄດ້ຮັບການພັດທະນາດີເທົ່າທີ່ຄວນ, ອັດຕາປະລະການຮຽນເພີ່ມຂຶ້ນທັງຊັ້ນມັດທະຍົມຕອນຕົ້ນ ແລະ ຕອນປາຍ ເຊິ່ງສະແດງອອກໃນສົກຮຽນ 2018-2019 ການ­ຈັດຕັ້ງ​ປະ­ຕິ­ບັດ​ຄາດໝາຍ​ຕົວຊີ້ວັດ 15 ຄາດ­ໝາຍ​ຫຼັກ​ ເຫັນໄດ້ວ່າເຮັດໄດ້​ພຽງ​ແຕ່ 4 ຄາດ­ໝາຍ​ທີ່​ສາມາດ​ບັນ­ລຸ​ໄດ້​ຕາມ​ແຜນ, ໃນນັ້ນ ມີພຽງ 2 ຄາດ­ໝາຍ ​ທີ່​ສາ­ມາດ​ປະ­ຕິ­ບັດ​ໄດ້​ດີ​ຂຶ້ນ​ເມື່ອ​ທຽບກັບ​ສົກ­ຮຽນ 2017-2018, ເຊິ່ງໃນນີ້ມີ​ບາງ​ຄາດ­ໝາຍກໍ​ໃກ້​ຈະ​ບັນ­ລຸ ແລະ ມີ 9 ຄາດ­ໝາຍ​ ທີ່​ບໍ່ມີຄວາມຄືບໜ້າ, ສໍາລັບສົກຮຽນ 2019-2020 ເຫັນດີເປັນເອກະພາບໃຫ້ແຕ່ລະພາກສ່ວນສືບຕໍ່ເອົາໃຈໃສ່ຈັດຕັ້ງປະຕິບັດໃຫ້ປະກົດເປັນຈິງ. ພ້ອມນີ້ກອງປະຊຸມໄດ້ຮັບຟັງການລາຍງານການຈັດຕັ້ງປະຕິບັດແຜນພັດທະນາການສຶກສາ ແລະ ກິລາປະຈຳສົກຮຽນ 2018-2019 ແລະ ທິດທາງແຜນການ 2019-2020 ຈາກບັນດາຫ້ອງການສຶກສາທິການ ແລະ ກິລາ 7 ຕົວເມືອງ ແລະ ພະແນກການກ່ຽວຂ້ອງເຊັ່ນ: ປກສ ກ່ຽວກັບວຽກງານການຕ້ານ ແລະ ສະກັດກັ້ນປະກົດການຫຍໍ້ທໍ້ໃນໝູ່ນັກຮຽນເປັນຕົ້ນແມ່ນສິ່ງເສບຕິດ ແລະ ການສັນຈອນຕາມທ້ອງຖະໜົນ, ການສອນວິຊາປ້ອງກັນຕົວໃນໂຮງຮຽນສາມັນ ແລະ ອາຊີວະສຶກສາ, ການຄຸ້ມຄອງຂອງຜູ້ປະກອບການຕູ້ເກມ ແລະ ສະຖານບັນເທິງ, ການພັດທະນາສີມືແຮງງານເພື່ອຕອບສະໜອງຄວາມຮຽກຮ້ອງຕ້ອງການຂອງຕະຫຼາດແຮງງານທັງພາຍໃນ ແລະ ຕ່າງປະເທດ. ໂອກາດດັ່ງກ່າວນີ້ໃນກອງປະຊຸມຍັງໄດ້ມອບທຸງໄຊ, ໃບຍ້ອງຍໍ ໃຫ້ແກ່ຫ້ອງການສຶກສາທິການ ແລະ ກິລາເມືອງ ທີ່ມີຜົນງານດີເດັ່ນຮອບດ້ານໃນການຊີ້ນຳ-ນຳພາ, ມອບໃບປະກາດສະນິຍະບັດແດງ ໃຫ້ນັກຮຽນຊັ້ນ ມ4 ແລະ ມ7 ຜູ້ທີ່ເສັງໄດ້ຄະແນນ 7 ຂຶ້້ນໄປ.