ຕອນເຊົ້າວັນທີ 06  ສິງຫາ 2019ນີ້ ປກສ ເມືອງທ່າພະບາດ ແຂວງບໍລິຄຳໄຊ ໄດ້ຈັດພິທີປະກາດສ້າງຄອບຄົວ ແລະ ບ້ານປ້ອງກັນຄວາມສະຫງົບດີ ໃຫ້ແກ່ບ້ານສາມະຄີໄຊ ຂື້ນຢ່າງເປັນທາງການ ຢູ່ທີ່ຫ້ອງການບ້ານ ສາມະຄີໄຊ, ໂດຍການໃຫ້ກຽດເຂົ້າຮ່ວມເປັນປະທານຂອງທ່ານ ປອ ດວງຕາ ມໍລະຄາສຸກ ກໍາມະການພັກແຂວງ, ເລຂາພັກພັກເມືອງ, ເຈົ້າເມືອງທ່າພະບາດ, ມີ ທ່ານ ພັນໂທ ຄຳແພງ ນຳພາວັນ ຄະນະພັກ ຮອງຫົວໜ້າກອງບັນຊາການ ປກສ ແຂວງ, ທ່ານ ພັນໂທ ປອ ຄຳຜັນ ບຸນມີໄຊ ກຳມະການພັກເມືອງ ຫົວໜ້າກອງບັນຊາການ ປກສ ເມືອງທ່າພະບາດ,ມີຄະນະກອງບັນຊາການ ປກສ ເມືອງ, ປກສ ບໍລິການປະຊາຊົນ, ອໍານາດການປົກຄອງບ້ານ-ນາຍບ້ານ, ຕະຫຼອດຮອດພໍ່, ແມ່ປະຊາຊົນ ເຂົ້າຮ່ວມ.

          ໃນພິທີໄດ້ມີການເຜີຍແຜ່ ຂໍ້ຕົກລົງຂອງກະຊວງປ້ອງກັນຄວາມສະຫງົບ ສະບັບເລກທີ 818/ປກສ ວ່າດ້ວຍການສ້າງຄອບຄົວ ແລະ ບ້ານປ້ອງກັນຄວາມສະຫງົບດີ, ຂໍ້ຕົກລົງຂອງເຈົ້າເມືອງທ່າພະບາດ ສະບັບເລກທີ 761-762/ມທບ ວ່າດ້ວຍການສ້າງຄອບຄົວ ແລະ ບ້ານປ້ອງກັນຄວາມສະຫງົບດີທົ່ວເມືອງທ່າພະບາດ, ແຜນການສ້າງຄອບຄົວ ແລະ ບ້ານປ້ອງກັນຄວາມສະຫງົບດີ, ເອກະສານບົດບັນທຶກສັນຍາກ່ຽວກັບວຽກງານຮັກສາຄວາມສະຫງົບ, ຂໍ້ແຂ່ງຂັນການສ້າງຄອບຄົວ ແລະ ບ້ານປ້ອງກັນຄວາມສະຫງົບດີ ແລະ ເອກະສານລະບຽບສາຍພົວພັນພາຍໃນບ້ານ ການສ້າງແຜນສ້າງຄອບຄົວ ແລະ ບ້ານປ້ອງກັນຄວາມສະຫງົບດີ ເປັນການຫັນເອົາແນວທາງນະໂຍບາຍຂອງພັກ-ລະບຽບກົດໝາຍຂອງລັດ ລົງສູ່ຮາກຖານບ້ານ, ຫົວໜ່ວຍຄອບຄົວ, ປະຊາຊົນພາຍໃນບ້ານຕ້ອງໄດ້ເປັນເຈົ້າການໃນການປະຕິບັດແນວທາງວຽກງານປ້ອງກັນຊາດ-ປ້ອງກັນຄວາມສະຫງົບ ໃຫ້ເປັນວຽກງານທົ່ວປວງຊົນຮອບດ້ານ, ໂດຍອີງໃສ່ 06 ມາດຖານເງື່ອນໄຂເປັນຫຼັກ, ເພື່ອໃຫ້ຖືກຕ້ອງສອດຄ່ອງ, ຖ້າຄອບຄົວ ຫຼື ບຸກຄົນບໍ່ເຄົາລົບລະບຽບກົດໝາຍຂອງບ້ານເມືອງຈະຕ້ອງໄດ້ນໍາມາສືກສາອົບຮົມ ຫຼື ປະຕິບັດຕາມລະບຽບກົດໝາຍ ແລະ ມາໃນຕອນເຊົ້າວັນທີ 08 ສິງຫາ 2019 ຢູ່ສະໂມສອນບ້ານ ປ່າໄລ ເມືອງທ່າພະບາດ ແຂວງບໍລິຄຳໄຊ ຍັງໄດ້ຈັດພິທີປະກາດຮັບຮອງເອົາຄອບຄົວ ແລະ ບ້ານປ້ອງກັນຄວາມສະເຫງົບດີຈຳນວນ 42 ຄອບຄົວ ພ້ອມທັງມອບໃບຢັ້ງຍືນ ຂອງທ່ານ ເຈົ້າແຂວງ, ເຈົ້າເມືອງ ໂດຍການໃຫ້ກຽດຂື້ນມອບໃບຢັ້ງຢືນຂອງຄະນະທານ.