ເຈົ້າໜ້າທີ່ກອງຄະດີອາຍາ ປກສ ເມືອງທ່າພະບາດ ໄດ້ໃຫ້ຮູ້ວ່າ: ໃນວັນທີ 15 ກໍລະກົດ 2019 ຜ່ານມານີ້ ໄດ້ຮັບແຈ້ງຄວາມຈາກນາງ ຄຳບາງ ບ້ານສາມະຄີໄຊ ( ຄຸ້ມໄຊສະຫວັນ ) ເມືອງ​ທ່າພະ​ບາດ ວ່າ ​ເວ​ລາປະມານ 21 ໂມງ 00 ຂອງວັນ​ດຽວກັນ ໄດ້ມີກຸ່ມຄົນຮ້າຍສອງຄົນ ຍ່າງເຂົ້າມາຖາມຊື້ຢາສູບຢູ່ຮ້ານ ໄດ້ໃຊ້ເຂົ່າຕີເຂົ້າໜ້າເອິກລູກຊາຍເຈົ້າຂອງຮ້ານຈົນລົ້ມລົງ ແລ້ວໄດ້ດຶງເອົາກະເປົາ ແລະ ກວດເອົາເງິນໃນກະປຸກແລ້ວໜີໄປ. ­​ເຈົ້າ​ໜ້າ​ທີ່ຈຶ່ງໄດ້ລົງ​ກວດ​ກາ ແລະ ໄດ້ຂຶ້ນ​ບັນຊີເປົ້າ​ໝາຍໄວ້.  ມາຮອດ ວັນ​ທີ 19 ກໍລະກົດ 2019 ຈຶ່ງໄດ້ກັກຕົວຜູ້ຕ້ອງສົງໄສ ​ຄື: ທ້າວ ບົວພັນ ພັນດານຸວົງ ອາ​ຍຸ 33 ປີ ປະຊາຊົນ ບ້ານ​ສາມະຄີໄຊ ( ຄຸ້ມໄຊສະຫວັນ ) ແລະ ທ້າວ ສຸກສາຄອນ ແກ້ວສີລາເພັດ ອາຍຸ 26 ປີ ອາຊີບ ປະຊາຊົນ ຢູ່ບ້ານໂພນສະຫວັນ ທັງສອງແມ່ນຢູ່ ເມືອງ​ທ່າ​ພະ​ບາດ ແຂວງ​ບໍ​ລິ​ຄຳ​ໄຊ ເພື່ອມາ​ສືບ​ສວນ​ຂະ​ຫ​ຍາຍ​ຜົນ​ດຳ​ເນີນ​ຄະ​ດີ​ຕາມ​ລະ​ບຽບ​ກົດ​ໝາຍ.

          ​ ຜ່ານ​ການ​ສືບ​ສວນ-ສອບ​ສວນ​ຂະ​ຫ​ຍາຍ​ຜົນ​ຂ​ອງ​ເຈົ້າ​ໜ້າ​ທີ່ ທ້າວ ​ບົວພັນ ແລະ ທ້າວ ສຸກສາຄອນ      ຮັບສາລະພາບ ວ່າ: ວັນທີ 15 ກໍລະກົດ 2019 ທ້າວ ບົວພັນ ແລະ ທ້າວ ສຸກສາຄອນ ໄດ້ຊວນກັນຂີ່ລົດຈັກເລາະລັກຊັບ ພໍຂີ່ລົດຈັກມາຮອດຮ້ານ ນາງຄຳບາງ ຈຶ່ງແວ່ເຂົ້າໄປຮ້ານ ເຫັນທ້າວ ອາເລັກ (ລູກຊາຍ) ຢູ່ຄົນດຽວ ຈຶ່ງວາງແຜນ ໃຫ້ທ້າວ ສຸກສາຄອນ ຖາມຊື້ຢາສູບ, ສ່ວນທ້າວ ບົວພັນ ເປັນຜູ້ຕິດຕາມນັ່ງຢູ່ລົດຈັກຖ້າ ທ້າວ ສຸກສາຄອນ ໃຊ້ເຂົ່າແທງເຂົ້າໜ້າເອິກ ທ້າວອາເລັກ 01 ບາດ ລົ້ມລົງແລ້ວກຶງເອົາກະເປົາ ແຕ່ທ້າວອາເລັກບໍ່ຍອມປ່ອຍຈຶ່ງເຕະອີ 04 ບາດ ແລະ ຕີອີກ 01 ບາດ ເຮັດໃຫ້ທ້າວອາເລັກສະລົບຈຶ່ງໄດ້ເອົາກະເປົາ ແລະ ກວດຄົ້ນເອົາກະປຸກໃສ່ເງິນ ແລ້ວໜີອອກໄປຂີ່ລົດເຂົ້າມາທາງຊອຍຫ້ອງວ່າການປົກຄອງເມືອງທ່າພະບາດ ແລ້ວມາແບ່ງປັນກັນ ທ້າວ ບົວພັນ ໄດ້ເງີນ 900.000 ກີບ, ບັດເຕີມເງີນ 15 ບັດ ລວມມູນຄ່າ 01 ລ້ານກ່ວາກີບ ແລະ ທ້າວ ສຸກສາຄອນ ໄດ້ ເງີນ 400.000 ກີບ, ໂທລະສັບຍີຫໍ່ ອອບໂປ່ 01 ໜ່ວຍ ແລະ ບັດເຕີມເງີນ 03 ບັດ ລວມມູນຄ່າ 5.000.000 ກ່ວາກີບ. ຈາກນັ້ນ ພວກກ່ຽວຈຶ່ງວາງແຜນແຍກທາງກັນລົບໜີໄປລີ້ຊ້ອນຢູ່ນະຄອນຫຼວງວຽງຈັນ ແຕ່ໄປບໍ່ລອດ, ຕົກມາຮອດ ວັນທີ 19 ກໍລະກົດ 2019 ຈຶ່ງຖືກເຈົ້າໜ້າທີ່ກັກຕົວມາກອງບັນຊາການ ປກສ ເມືອງ ທ່າພະບາດ ເພື່ອດໍາເນີນຄະດີຕາມລະບຽບກົດໝາຍ. 

    ການກະທໍາຜິດຂອງພວກກ່ຽວ ເປັນການແຕະຕ້ອງເຖິງຊີວິດ, ສຸຂະພາບ ແລະ ຊັບສິນຂອງພົນລະເມືອງ ເຊິ່ງຜິດຕໍ່ປະມວນກົດອາຍຍາ ມາດຕາ 230, 232, ປະຈຸບັນຄະດີ ຍັງຢູ່ໃນຂັ້ນຕອນການສືບສວນ-ສອບສວນ ຂອງເຈົ້າໜ້າທີ່ ເພື່ອສົ່ງໄອຍະການສັ່ງຟ້ອງໃຫ້ສານຕັດສິນຕາມລະບຽບກົດໝາຍ.