ພິທີເປີດບໍລິສັດ ຊັນ ສົ່ງເສີມກະສິກຳ-ອຸດສາຫະກຳ ແລະ ການຄ້າ ຈຳກັດ ໄດ້ຈັດຂຶ້ນໃນຕອນເຊົ້າຂອງວັນທີ 08 ສິງຫາ 2019 ຢູ່ບ້ານຫ້ວຍສຽດ ເມືອງປາກຊັນ ແຂວງບໍລິຄຳໄຊ ໂດຍການເຂົ້າຮ່ວມຂອງທ່ານ ພົຈ ຈວງຈັນ ລາດຊະວົງ ຫົວໜ້າກອງບັນຊາການທະຫານແຂວງ, ທ່ານ ສຸວັນ ແກ້ວສະຫວ່າງ ປະທານບໍລິສັດ ຊັນ ສົ່ງເສີມກະສິກຳ-ອຸດສາຫະກຳ ແລະ ການຄ້າ ຈຳກັດ, ມີທ່ານເຈົ້າເມືອງ, ພະແນກການກ່ຽວຂ້ອງ ພ້ອມດ້ວຍພະນັກງານພາຍໃນບໍລິສັດເຂົ້າຮ່ວມ.

          ບໍລິສັດ ຊັ່ນ ສົ່ງເສີມກະສິກຳ ແລະ ອຸດສາຫະກຳ ແມ່ນມີຈຸດປະສົ່ງເສີມການປູກຝ້າຍມົ້ງ ( HEMP ) ເປັນພືດທຳມະຊາດປະຈຳທ້ອງຖິ່ນ ຕາມປ່າດົງພົງໄພຢູ່ໃນປະເທດລາວເຮົາ ມາເປັນເວລາ 40 ກວ່າປີແລ້ວ ການປູກນີ້ແມ່ນບໍ່ໄດ້ໃຊ້ປຸຍເຄມີຕ່າງໆ ຂໍພຽງແຕ່ມີດິນທີ່ອຸດົມສົມບູນ, ຊຸກຍູ້ໃຫ້ພໍ່ແມ່ປະຊາຊົນປູກພືດເສດຖະກິດແນວໃໝ່ ທີ່ມີພື້ນຖານເກົ່າຢູ່ແລ້ວ ທົດແທນປູກພືດຊະນິດອື່ນໆ, ການປູກຝ້າຍມົ້ງ ເຮັດໃຫ້ພໍ່ແມ່ປະຊາຊົນບັນດາເຜົ່າມີລາຍໄດ້ເພີ່ມ ຫຼັງຈາກການເກັບກ່ຽວເຂົ້ານາປີສຳເລັດ, ນອກນັ້ນ ຍັງເປັນການປູກປອດສານພິດ ແລະ ຈະເຮັດໃຫ້ຊາວກະສິກອນມີສຸຂະພາບທີ່ດີ, ໂດຍທຸກຊິ້ນສ່ວນສາມາດນຳມາແປຮູບ ເປັນຜະລິດຕະພັນສິນຄ້າໂອດອບເຊັ່ນ: ແຜ່ນແພ, ອາຫານ, ເຄື່ອງດື່ມ, ເຄື່ອງສຳອາງ ແລະ ຢາປົວພະຍາດ ເພື່ອຈຳໜ່າຍຢູ່ພາຍໃນປະເທດ ແລະ ຕ່າງປະເທດ, ພ້ອມນັ້ນ ຍັງສ້າງໂອກາດໃຫ້ແກ່ຊາວໜຸ່ມຍິງຊາຍ ຊາວກະສິກອນມີວຽກເຮັດງານທຳໄດ້ຢູ່ກັບຄອບຄົວ ໂດຍບໍ່ຕ້ອງໄປຊອກເຮັດວຽກຢູ່ຕ່າງປະເທດອີກດ້ວຍ.