ການຝຶກອົບຮົມວຽກງານກໍ່ສ້າງຮາກຖານການເມືອງ ໄດ້ຈັດຂຶ້ນໃນຕອນເຊົ້າຂອງວັນທີ 07 ສິງຫາ 2019 ຢູ່ທີ່ຫ້ອງປະຊຸມຫ້ອງວ່າການປົກຄອງແຂວງ ໂດຍການເຂົ້າຮ່ວມເປັນປະທານຂອງທ່ານ ສຳເນົາ ສາຍລ້ອມທໍລະນີ ຫົວໜ້າກົມທ້ອງຖິ່ນ-ຮາກຖານ ຫ້ອງວ່າການສູນກາງພັກ, ທ່ານ ແດນປີ ມູນທະດີ ຫົວໜ້າຄະນະຈັດຕັ້ງແຂວງບໍລິຄຳໄຊ, ມີພະນັກງານຈາກຫ້ອງວ່າການສູນກາງພັກ, ພະນັກງານກໍ່ສ້າງຮາກຖານຂັ້ນແຂວງ, ເມືອງ ແລະ ພະນັກງານວິຊາການຈາກພະແນກການກ່ຽວຂ້ອງເຂົ້າຮ່ວມ.

          ຮາກຖານການເມືອງ ແມ່ນລະບົບການເມືອງຂອງລະບອບປະຊາທິປະໄຕປະຊາຊົນ ຢູ່ຂັ້ນຮາກຖານ ບ້ານ, ສຳນັກງານ, ອົງການ, ກົມກອງກຳລັງປະກອບອາວຸດ, ສະຖາບັນສຶກສາ, ໂຮງຮຽນ, ໂຮງໝໍ, ວິສາຫະກິດລັດ-ເອກະຊົນ ຊຶ່ງລວມມີການຈັດຕັ້ງຮາກຖານພັກ, ລັດ, ແນວລາວສ້າງຊາດ, ສະຫະພັນນັກຮົບເກົ່າ, ອົງການຈັດຕັ້ງມະຫາຊົນຂອງພັກ ໂດຍແມ່ນການຈັດຕັ້ງຮາກຖານພັກເປັນແກນນຳ ເຄື່ອນໄຫວປະຕິບັດສິດອຳນາດຂອງປະຊາຊົນ, ໂດຍປະຊາຊົນ ແລະ ເພື່ອປະຊາຊົນ. ນອກນັ້ນ ຍັງມີການຈັດຕັ້ງທາງດ້ານເສດຖະກິດ-ສັງຄົມ, ສະມາຄົມຕ່າງໆທີ່ໄດ້ສ້າງຕັ້ງ ແລະ ເຄື່ອນໄຫວຢູ່ຮາກຖານບ້ານຢ່າງຖືກຕ້ອງຕາມກົດໝາຍຂອງ ສປປ ລາວ. ຊຸດອົບຮົມໃນຄັ້ງນີ້ ມີທັງໝົດ 6 ຫົວຂໍ້ໃຫຍ່ຄື: ຍົກສູງວຽກງານກໍ່ສ້າງຮາກຖານການເມືອງໃນໄລຍະໃໝ່ຕາມມະຕິ 056, ໜ້າທີ່ພາລະບົດບາດ ຂອງພະນັກງານລົງກໍ່ສ້າງຮາກຖານ, ການຈັດຕັ້ງການເຄື່ອນໄຫວຂອງບ້ານ ແລະ ວຽກງານ 3 ສ້າງ, ການແກ້ໄຂຄວາມທຸກຍາກ ແລະ ການພັດທະນາ, ການສ້າງຄອບຄົວ-ບ້ານປ້ອງກັນຊາດເຂັ້ມແຂງ ແລະ ການສ້າງຄອບຄົວ-ບ້ານປ້ອງກັນຄວາມສະຫງົບດີ.

          ທັງນີ້ ກໍ່ເພື່ອຍົກສູງຄຸນນະພາບຂອງວຽກງານເສນາທິການຮັບໃຊ້ການນຳ ກ່ຽວກັບວຽກງານກໍ່ສ້າງຮາກຖານການເມືອງຂອງພັກໃນໄລຍະໃໝ່, ມັນໄດ້ເລັ່ງທວງໃຫ້ທຸກພາກສ່ວນຂອງການຈັດຕັ້ງ ເພີ່ມທະວີຄວາມຮັບຜິດຊອບວຽກງານຂອງຕົນ ຕໍ່ໜ້າທີ່ການເມືອງໃນໄລຍະໃໝ່ ໂດຍສະເພາະ ການເພີ່ມທະວີວຽກງານຊີ້ນຳໆພາວຽກງານໃນທຸກຂົງເຂດການຈັດຕັ້ງນັບແຕ່ສູນກາງລົງຮອດທ້ອງຖິ່ນຮາກຖານ, ເພື່ອສ້າງພື້ນຖານປັດໃຈໃໝ່ ດ້ານວຽກງານກໍ່ສ້າງຮາກຖານການເມືອງ ຮັບໃຊ້ໜ້າທີ່ການເມືອງຂອງພັກ ໃຫ້ສົມຄູ່ລະຫວ່າງທິດສະດີ ແລະ ພຶດຕິກຳຕົວຈິງທີ່ວ່າ ການກໍ່ສ້າງຮາກຖານ ແມ່ນວຽກງານໜຶ່ງທີ່ສຳຄັນ, ຈຳເປັນພາວະວິໄສ, ແມ່ນຍຸດທະສາດ ແລະ ແມ່ນວິທີປະຕິບັດຂອງພັກ, ແມ່ນໜ້າທີ່ຂອງພັກ.