ວັນທີ 2 ສິງຫາ 2019 ນີ້ ຢູ່ທີ່ສະໂມສອນໂຮງຮຽນກິນນອນຊົນເຜົ່າຂອງເມືອງຄຳເກີດ ໄດ້ຈັດພິທີມອບ - ຮັບຫໍພັກນັກຮຽນຊົນເຜົ່າ ໂດຍໃຫ້ກຽດເຂົ້າຮ່ວມຂອງທ່ານ ເລື່ອນວິໄລ ຈັນທະລາພັນ ກຳມະການພັກແຂວງ, ຫົວໜ້າພະແນກແຜນການ-ການລົງທຶນແຂວງບໍລິຄຳໄຊ, ມີຄະນະນຳຂັ້ນເມືອງ, ຫົວໜ້າຫ້ອງການ, ຄະນະຮັບຜິດຊອບ, ຕາງໜ້າບໍລິສັດ ແລະ ຄູອາຈານເຂົ້າຮ່ວມ.

      ອາຄານໂຮງຮຽນກິນນອນຊົນເຜົ່າດັ່ງກ່າວ ເປັນອາຄານແບບຖາວອນ ມີຂະໜາດ

ກ້ວາງ 9 ແມັດ, ຍາວ 42 ແມັດ, ມີ 10 ຫ້ອງ ສາມາດບັນຈຸໄດ້ 80 ຄົນ, ມີ 40 ຕຽງນອນ ເປັນຕຽງໄມ້ສອງຊັ້ນ, ມີຕູ້ໃສ່ເຄື່ອງ 40 ໜ່ວຍ ແລະ ຫ້ອງນໍ້າຍິງ-ຊາຍ 8 ຫົວຫວິດ, ອ່າງລ້າງມື 4 ຫົວ ເຊິ່ງເລີ່ມລົງມືກໍ່ສ້າງ ແຕ່ວັນທີ 1 ຕຸລາ 2018 ແລະ ໄດ້ສຳເລັດໃນວັນທີ 1 ມີນາ 2019 ໃນມູນຄ່າການກໍ່ສ້າງທັງໝົດ 701.254.104 ກີບ ສະໜັບສະໜູນໂດຍໂຄງການລຸກຊໍາບວກແຜນງານລາວ 030.

      ມາໃນວັນທີ 4 ສິງຫາ 2019 ຢູ່ທີ່ໂຮງຮຽນປະຖົມສົມບູນບ້ານນາໄຮ ເມືອງຄຳເກີດ ແຂວງບໍລິຄຳໄຊ ກໍໄດ້ຈັດພິທີມອບ-ຮັບໂຮງຮຽນປະຖົມຫຼັງໃໝ່  ໂດຍໃຫ້ກຽດເຂົ້າຮ່ວມຂອງທ່ານ ວັນວິໄລ ແດນພູຫຼວງ ຄະນະປະຈຳພັກແຂວງ, ເລຂາພັກເມືອງ-ເຈົ້າເມືອງຄຳເກີດ.

       ໂຮງຮຽນແຫ່ງນີ້ ໄດ້ຮັບທຶນການສ້າງ ທີ່ເປັນທືນສົມທົບຂອງປະຊາຊົນບ້ານນາໄຮ ຈຳນວນ  28.600.000 ກີບ, ອົງການພຸດທະສາດສະໜາເມືອງຄຳເກີດ 79.600.000 ກີບ, ທືນສົມທົບຈາກຄອບຄົວ ທ່ານ ພັນຄໍາ ວິພະວັນ ຮອງປະທານປະເທດແຫ່ງ ສປປລາວ ຈຳນວນ 408.000.000 ກີບ, ຈາກໂຄງການລາວ-ລຸກຊຳບວກແຜນງານລາວ 030 ແລະ ພາກສ່ວນອື່ນໆ ລວມມູນຄ່າການກໍ່ສ້າງທັງໝົດ 515.799.000 ກີບ. ໂຮງຮຽນ ມີຂະໜາດກ້ວາງ 9 ແມັດ, ຍາວ 48 ແມັດ, ມີ 6 ຫ້ອງ, ໂຄງການສ້າງເປັນເບຕົງເສີມເຫຼັກ, ຝາກໍ່ດ້ວຍດິນບັອກ, ໂຄງຮ່າງເຮັດດ້ວຍໄມ້ເນື້ອແຂງປະສົມ, ມຸງດ້ວຍກະເບື້ອງ, ໂຄງເພດານເຮັດດ້ວຍໄມ້ເນື້ອແຂງປະສົມຕິດດ້ວຍແຜ່ນລຽບ, ມີລະບົບໄຟຟ້າ-ພັດລົມ ພາຍໃນອາຄານຄົບ ແລະ ຫ້ອງນໍ້າ 1 ຫຼັງ 3 ຫ້ອງ,  ປະກອບມີໂຕະຕັ່ງຄູ 5 ຊຸດ, ນັກຮຽນ 26 ຊຸດ ເຊິ່ງໄດ້ດຳເນີນການກໍ່ສ້າງແຕ່ ວັນທີ 28 ທັນວາ 2018 ແລະ ໄດ້ສໍາເລັດໃນວັນທີ 24 ມີຖຸນາ 2019.