ຕອນບ່າຍ ວັນທີ 16 ກໍລະກົດ 2019 ນີ້ ຢູ່ທີ່ດ່ານ ຕມ ສາກົນປາກຊັນ ແຂວງ ບໍລິຄໍາໄຊ ໄດ້ມອບຜູ້ຖືກຫາ ຊື່ ທ້າວ ສິດທິໂຊກ ທິສົມບູນ ອາຍຸ 35 ປີ ເຊື້ອຊາດ ແລະ ສັນຊາດໄທ , ຢູ່ບ້ານເກາະຂະໜຸນ, ເມືອງ ພະນົມສາລະຄາມ, ແຂວງ ສະເຊີງເຊົາ ກັບຄືນປະເທດ ໃນຂໍ້ຫາ ລັກລອບເຂົ້າ-ອອກເມືອງຜິດກົດໝາຍ, ມອບໂດຍ ທ່ານ ພັຕ ໄຊມະນີ ວົງມະນີ ຮອງຫົວໜ້າດ່ານ ຕມ ສາກົນປາກຊັນ ແລະ ຮັບໂດຍ ທ່ານ ພັທ ຈໍາທອງ ປານິທານ ຕາງໜ້າເຈົ້າໜ້າທີ່ຕໍາຫຼວດກວດຄົນເຂົ້າ-ອອກເມືອງ ຈັງຫວັດບຶງການ ປະເທດໄທ, ມີພະນັກງານທັງສອງຝ່າຍເຂົ້າຮ່ວມເປັນສັກຂີພິຍານໃນການມອບ-ຮັບ.

          ເຈົ້າໜ້າທີ່ຕໍາຫຼວດກວດຄົນເຂົ້າ-ອອກເມືອງ ດ່ານສາກົນ ປາກຊັນ ໄດ້ໃຫ້ຮູ້ວ່າ: ທ້າວ ສິດທິໂຊກ ທິສົມບູນ ໄດ້ລັກລອບຂ້າມເຂົ້າມາລາວ ໂດຍບໍ່ຖືກຕ້ອງ ເປັນຄັ້ງທີ່ 02 ກ່ອນຈະຖືກເຈົ້າໜ້າທີ່ກັກຕົວ ໃນວັນທີ 06 ມິຖຸນາ 2019 ໂດຍເປົ້າໝາຍຂອງຜູ້ກ່ຽວ ແມ່ນເຂົ້າມາລາວເພື່ອໄປຫາຄົນທີ່ເຄີຍຮູ້ຈັກກັນຢູ່ບ້ານນາສະຫວັນ ເມືອງປາກຊັນ ເລີຍຖືກເຈົ້າໜ້າທີ່ລາວກັກຕົວ ມາດຳເນີນການສືບສວນ - ສອບສວນ ແລະ ສຶກສາອົບຮົມຕາມລະບຽບກົດໝາຍ ແລະ ໄດ້ນໍາສົ່ງຕົວຜູ້ກ່ຽວ ພ້ອມດ້ວຍລົດຈັກ ຮອນດ້າເວັບ 110 ໄອ ທີ່ຜູ້ກ່ຽວໄດ້ຕົວະເອົານຳຄົນຮູ້ຈັກກັນ ໃຫ້ກັບເຈົ້າໜ້າທີ່ໄທ ເພື່ອສຶກສາອົບຮົມ ແລະ ປະຕິບັດຕາມລະບຽບກົດໝາຍຂອງໄທຕໍ່ໄປ.