ໃນວັນທີ 18 ກໍລະກົດ 2019 ຢູ່ຫ້ອງປະຊຸມພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງ ໄດ້ຈັດພິທີປາຖະກະຖາ 4 ວັນປະຫວັດສາດ: ວັນຄ້າຍວັນເກີດປະທານ ສຸພານຸວົງ ຄົບຮອບ 110 ປີ, ວັນສ້າງຕັ້ງສະຫະພັນແມ່ຍິງລາວ ຄົບຮອບ 64 ປີ, ວັນສ້າງຕັ້ງສາຍພົວພັນການທູດລາວ-ຫວຽດນາມ ຄົບຮອບ 57 ປີ ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມືລາວ-ຫວຽດນາມ ຄົບຮອບ 42 ປີ ໃຫ້ກຽດປາຖະກະຖາໂດຍ ທ່ານ ສົນທອງ ວີບຸນກວ້າງ ຮອງຫົວໜ້າພະແນກ ຖວທ ແຂວງ,  ມີບັນດາຂະແໜງການ, ກອງວິຊາການ ແລະ ພະນັກງານລັດຖະກອນພາຍໃນພະແນກ ເຂົ້າຮ່ວມ.

      ໃນພິທີ ໄດ້ຫວນຄືນຊີວິດ, ການປະຕິວັດອັນພິລະອາດຫານ ແລະ ນ້ຳໃຈຮັກຊາດອັນດູດດື່ມຂອງ ທ່ານ ປະທານ ສຸພານຸວົງ ທີ່ຄົນລຸ່ນຫຼັງຄວນສຶກສາຮ່ຳຮຽນເອົາເປັນແບບຢ່າງ ແລະ ປະຕິບັດຕາມ ເຊີ່ງມີບາງຕອນຂອງເນື້ອໃນ ໄດ້ກ່າວວ່າ: ເພີ່ນເກີດເມື່ອວັນທີ 13 ກໍລະກົດ 1909 ທີ່ແຂວງຫຼວງພະບາງ ໃນຄອບຄົວເຊື້ອເຈົ້າ ແລະ ໄດ້ເລີ່ມຕົ້ນພາລະກິດປະຕິວັດອັນຍິ່ງໃຫຍ່ ໃນເດືອນຕຸລາ ປີ 1945. ຕະຫຼອດຊີວິດການປະຕິວັດ ທ່ານປະທານສຸພານຸວົງ ແມ່ນເປັນຜູ້ໜຶ່ງທີ່ມີຄວາມຈົ່ງຮັກພັກດີຕໍ່ອຸດົມການປະຕິວັດຢ່າງເດັດຂາດ, ຕໍ່ສູ້ຢ່າງກ້າແກ່ນພິລະອາດຫານ, ຍາມໃດກໍ່ໄດ້ຍົກສູງສະຕິລະວັງຕົວ ມີລະບຽບວິໄນຕໍ່ການຈັດຕັ້ງ, ນັບຖືໝູ່ຄະນະເອື້ອເຟື້ອຮັກແພງມິດສະຫາຍຢ່າງຈິງໃຈ, ດຳລົງຊີວິດຢ່າງຊື່ສັດສຸຈະລິດ ແລະ ງ່າຍດາຍ, ເປັນປັນຍາຊົນຜູ້ຍິ່ງໃຫຍ່ເປັນເຊື້ອເຈົ້າຜູ້ໜຶ່ງທີ່ມີນ້ຳໃຈຮັກຊາດອັນດູດດື່ມ, ມີຈິດໃຈຕໍ່ສູ້ທີ່ອາດຫານກ້າແກ່ນ, ມີທັດສະນະຫຼັກໝັ້ນອັນໜັກແໜ້ນ ມີນ້ຳໃຈເສຍສະຫຼະອັນສູງສົ່ງເພື່ອຊາດເພື່ອປະຊາຊົນ, ເລີ່ມຈາກນັກຮັກຊາດທີ່ແທ້ຈິງ ກາຍເປັນນັກປະຕິວັດທີ່ກ້າແກ່ນ, ເປັນໜຶ່ງໃນບັນດາຜູ້ນຳທີ່ດີເດັ່ນ, ເປັນທີ່ເຄົາລົບຮັກຂອງປະຊາຊົນລາວບັນດາເຜົ່າ, ຕະຫຼອດຊີວິດຂອງທ່ານ ບໍ່ວ່າຈະຢູ່ໃນຕຳແໜ່ງໃດ, ຄວາມຮັບຜິດຊອບອັນໃດ ກໍ່ໄດ້ອຸທິດໝົດຈິດໝົດໃຈ, ໝົດຄວາມສາມາດ ແລະ ຫົວຄິດປະດິດສ້າງຂອງຕົນ ໃຫ້ແກ່ພາລະກິດປົກປັກຮັກສາ ແລະ ສ້າງສາພັດທະນາ ເພື່ອເອກະລາດ, ອະທິປະໄຕຂອງຊາດ ຄວາມສົມບູນພູນສຸກຂອງປະຊາຊົນຢ່າງແທ້ຈິງ.

  ໃນພິທີ ທ່ານປະທານ ຍັງໄດ້ຍົກໃຫ້ເຫັນເຖິງມູນເຊື້ອວັນສ້າງຕັ້ງແມ່ຍິງລາວ ຄົບຮອບ 64 ປີ ( 20 ກໍລະກົດ 1955-20 ກໍລະກົດ 2019) ເຊິ່ງໄດ້ເວົ້າເຖິງເຫດຜົນ ແລະ ຄວາມເປັນມາທີ່ພາໃຫ້ມີອົງການຈັດຕັ້ງແມ່ຍິງ ຈາກເປັນພຽງການຈັດຕັ້ງໜ່ວຍຄົ້ນຄ້ວາວຽກງານແມ່ຍິງ ກ້າວໄປເຖິງການສ້າງຕັ້ງສະມາຄົມແມ່ຍິງລາວຮັກຊາດ, ຈາກສະມາຄົມແມ່ຍິງຮັກຊາດ ມາເປັນສະຫະພັນແມ່ຍິງລາວ ແລະ ກອງປະຊຸມໃຫຍ່ຜູ້ແທນແມ່ຍິງລາວທົ່ວປະເທດ. 

    ນອກຈາກນີ້ ທ່ານປະທານກໍ່ຍັງໄດ້ຍົກໃຫ້ເຫັນເຖິງມູນເຊື້ອສອງວັນປະຫວັດສາດລາວ-ຫວຽດນາມ ຕື່ມອີກຄື: ວັນສ້າງຕັ້ງສາຍພົວພັນການທູດລາວ-ຫວຽດນາມ ຄົບຮອບ 57 ປີ  ( 5 ກັນຍາ 1962-5 ກັນຍາ 2019) ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມືລາວ-ຫວຽດນາມ ຄົບຮອບ 42 ປີ (18 ກໍລະກົດ 1977-18 ກໍລະກົດ 2019) ທີ່ໄດ້ສະແດງເຖິງການຊ່ວຍເຫຼືອເຊິ່ງກັນ ແລະ ກັນດ້ວຍຄວາມຈິງໃຈ-ຮັກແພງ ປານພີ່ນ້ອງເກີດຮ່ວມພໍ່ແມ່ດຽວກັນ, ໄດ້ຮ່ວມສຳພັນສູ້ຮົບຢູ່ຂຸມຄອງດຽວກັນ, ເຂົ້າເມັດຫັກ, ຜັກເສັ້ນໜຶ່ງກໍ່ບິແບ່ງປັນກັນກິນ ເພື່ອຕີຕ້ານສັດຕູຜູ້ຮຸກຮານ ແລະ ໄດ້ກາຍມາເປັນສາຍພົວພັນສາມັກຄີພິເສດ ແລະ ຮ່ວມມືຮອບດ້ານລະຫວ່າງສອງປະເທດລາວ-ຫວຽດນາມອ້າຍນ້ອງ ຈົນເຖິງປະຈຸບັນນີ້.