ກິດຈະກຳສະເຫຼີມສະຫຼອງວັນສຳຄັນຂອງຊາດ ໄດ້ຈັດຂຶ້ນໃນວັນທີ 17 ກໍລະກົດ 2019 ຢູ່ເດີ່ນກິລາເປຕັ່ງຂອງແຂວງ ໂດຍການເຂົ້າຮ່ວມຂອງທ່ານ ປອ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ ມີການນຳຂອງແຂວງ, ເມືອງ, ພະນັກງານລັດຖະກອນ ຈາກພະແນກການອ້ອມຂ້າງ ແລະ ຕາງໜ້າຈາກລັດວິສາຫະກິດ-ຫ້າງຮ້ານ ເຂົ້າຮ່ວມ.

       ພິທີໄດ້ເລີ່ມຂຶ້ນໃນເວລາ 6 ໂມງ 30 ນາທີ, ໂດຍ ທ່ານ ບຸນມາ ບຸຈະເລີນ ຮອງເຈົ້າແຂວງບໍລິຄຳໄຊ ໄດ້ກ່າວຈຸດປະສົງຂອງງານວ່າ ເພື່ອເປັນການຂ່ຳນັບຮັບຕ້ອນ ແລະ ສະເຫຼີມສະຫຼອງວັນຄ້າຍວັນເກີດຂອງ ທ່ານ ປະທານ ສຸພານຸວົງ ຄົບຮອບ 110 ປີ, ວັນກິລາ-ກາຍຍະກຳແຫ່ງຊາດ ຄົບຮອບ 53 ປີ, ວັນປ່ອຍປາ ແລະ ອະນຸລັກສັດນ້ຳ-ສັດປ່າແຫ່ງຊາດ ແລະ ວັນສ້າງຕັ້ງອົງການຈັດຕັ້ງສະຫະພັນແມ່ຍິງລາວ ຄົບຮອບ 64 ປີ, ກິດຈະກຳຄັ້ງນີ້ ເປັນເຈົ້າການຮັບຜິດຊອບຂອງ 6 ພາກສ່ວນ ຄື: ສະຫະພັນແມ່ຍິງແຂວງ, ແມ່ຍິງຮາກຖານກະສິກຳ-ປ່າໄມ້ແຂວງ, ແມ່ຍິງຮາກຖານສຶກສາທິການ ແລະ ກິລາແຂວງ, ແມ່ຍິງຮາກຖານສາທາລະນະສຸກແຂວງ, ແມ່ຍິງຮາກຖານໂຮງໝໍແຂວງ ແລະ ອົງການກາແດງແຂວງ. ພາຍໃນງານມີຢູ່ 3 ກິດຈະກຳຫຼັກ ຄື: ເຕັ້ນແອໂລບິກປະກອບສຽງເພງ ໂດຍການນຳພາຂອງທິມງານຄູຝຶກ ຈາກສູນອອກກຳລັງກາຍປາກຊັນຟິດເນັດ, ບໍລິການກວດສຸຂະພາບຟຣີ ແລະ ກິດຈະກຳບໍລິຈາກເລືອດ  ເຊິ່ງມີຜູ້ສະມັກໃຈຮ່ວມບໍລິຈາກເລືອດ ທັງໝົດ 29 ຄົນ, ຍິງ 15 ຄົນ. ພ້ອມດຽວກັນນັ້ນ ທາງຮ້ານອາຫານກຸຫຼາບປາກຊັນ ຍັງໄດ້ສະໜັບສະໜຸນອາຫານເຊົ້າ ໃຫ້ແກ່ທຸກພາກສ່ວນທີ່ເຂົ້າຮ່ວມງານ.