ໃນຕອນເຊົ້າຂອງວັນທີ 17 ກໍລະກົດ 2019 ຢູ່ຫ້ອງປະຊຸມຫ້ອງວ່າການປົກຄອງແຂວງບໍລິຄຳໄຊ ໄດ້ມີພິທີພົບປະໂອ້ລົມຂອງທ່ານ ເຢຍເກີຢ່າ ໜໍຈໍຈົງຕົວ ຮອງປະທານສູນກາງແນວລາວສ້າງຊາດ  ເນື່ອງໃນໂອກາດທີ່ໄດ້ລົງມາຢ້ຽມຢາມ ແລະ ຊີ້ນຳວຽກງານຢູ່ແຂວງບໍລິຄຳໄຊ. ມີຄະນະປະຈຳພັກແຂວງ, ພະນັກງານຈາກພະແນກການອ້ອມຂ້າງແຂວງ, ພະນັກງານອາວຸໂສບຳນານ ແລະ ພະນັກງານວິຊາການພາຍໃນອົງການແນວລາວສ້າງຊາດແຂວງ ເຂົ້າຮ່ວມ.

          ໃນໂອກາດນີ້ ທ່ານ ເຢຍເກີຢ່າ ໜໍຈໍຈົງຕົວ ໄດ້ໂອ້ລົມ ແລະ ໃຫ້ທິດຊີ້ນຳຕໍ່ແຂວງບໍລິຄຳໄຊ 6 ບັນຫາໃຫຍ່ຄື: ສ້າງຂະບວນການຕ້ອນຮັບກອງປະຊຸມໃຫຍ່ ຜູ້ແທນທົ່ວປະເທດຂອງພັກປະຊາຊົນປະຕິວັດລາວ ຄັ້ງທີ 11 ໄລຍະກ່ອນດຳເນີນກອງປະຊຸມ ປຸກລະດົມຊຸກຍູ້ຂະບວນການປາຖະກະຖາ, ເລົ່າມູນເຊື້ອສະເຫຼີມສະຫຼອງວັນສ້າງຕັ້ງ, ເຫດການປະຫວັດສາດຂອງຊາດ ຂອງພັກ, ລັດ, ກອງທັບ, ວັນສ້າງຕັ້ງແນວລາວສ້າງຊາດຄົບຮອບ 69 ປີ, ອົງການຈັດຕັ້ງມະຫາຊົນ ແລະ ອື່ນໆ, ຂະບວນການວຽກງານຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ເປັນຕົ້ນແມ່ນໂຄສະນາອອກຂ່າວທາງໂທລະພາບ, ວິທະຍຸ ແຂ່ງຂັນແຕ່ງບົດປະພັນ, ກະວີ, ເພງ, ຖາມ-ຕອບຄວາມຮູ້, ສີລະປະການສະແດງ, ວາງສະແດງຮູບພາບການເຄື່ອນໄຫວ, ສົ່ງເສີມວັດທະນະທຳ-ຮີດຄອງປະເພນີອັນດີງາມຂອງບັນດາເຜົ່າ, ໄລຍະດຳເນີນ ແມ່ນຕ້ອງຊີ້ນຳຈັດຕັ້ງເວນຍາມ, ອະນາໄມ, ນຳກ້ອນກຳລັງບັນດາເຜົ່າເຂົ້າອວຍພອນກອງປະຊຸມໃຫຍ່ ຫຼັງຈາກສຳເລັດກອງປະຊຸມ ຕ້ອງໄດ້ລົງເຜີຍແຜ່ຜົນສຳເລັດ ແລະ ສະຫຼຸບຖອດຖອນບົດຮຽນ ແລະ ແຕ່ລະພາກສ່ວນກໍ່ຕ້ອງໄດ້ສຸມໃສ່ວຽກງານຂອງຕົນໃຫ້ດີຂຶ້ນຕາມການມອບໝາຍ, ຝຶກອົບຮົມວຽກງານຊົນເຜົ່າ ສືບຕໍ່ຮ່ວມມືສອງຝ່າຍລະຫວ່າງສູນກາງແນວລາວສ້າງຊາດ ແລະ ຄະນະກຳມະການຊົນເຜົ່າແຫ່ງລັດ ສສ ຫວຽດນາມ ເພື່ອຍົກລະດັບຄວາມຮູ້ວຽກງານຊົນເຜົ່າໃຫ້ຖັນແຖວພະນັກງານແນວລາວສ້າງຊາດ ແລະ ພາກສ່ວນຕ່າງໆ, ກະກຽມ ແລະ ດຳເນີນກອງປະຊຸມພົບປະຜູ້ຊົງຄຸນວຸດທິບັນດາເຜົ່າໃນພາລະກິດການປົກປັກຮັກສາ ແລະ ສ້າງສາພັດທະນາປະເທດຊາດ ແນະນຳກ່ຽວກັບການສ້າງຂະບວນການຕາມແຕ່ລະຂະແໜງການ ໂດຍສະເພາະແນວລາວສ້າງຊາດແຕ່ລະຂັ້ນໃຫ້ຖືເອົາແຜນການຈັດກອງປະຊຸມພົບປະຜູ້ຊົງຄຸນວຸດທິບັນດາເຜົ່າ ເປັນວຽກງານໜຶ່ງທີ່ຕ້ອງເຜີຍແຜ່ຜັນຂະຫຍາຍເຂົ້າສູ່ຊີວິດຕົວຈິງຕາມການແຈ້ງການຂອງຄະນະຮັບຜິດຊອບຊີ້ນຳລະດັບຊາດ, ສ້າງບ້ານ ແລະ ຄອບຄົວສາມັກຄີປອງດອງ  ໃຫ້ຖືເອົາແຜນການສ້າງບ້ານ ແລະ ຄອບຄົວສາມັກຄີປອງດອງ ເປັນວຽກງານໜຶ່ງໃນຂະບວນການໃຫ້ແກ່ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 11 ຂອງພັກ,  ວຽກງານການທູດປະຊາຊົນ ເພີ່ມທະວີການຕິດຕາມຊຸກຍູ້ແກ້ໄຂບັນຫາທີ່ລັດຖະບານທັງສອງຝ່າຍໄດ້ອອກຂໍ້ຕົກລົງລະຫວ່າງລັດຖະບານ ສປປ ລາວ ແລະ ລັດຖະບານ ສສ ຫວຽດນາມ ວ່າດ້ວຍການແກ້ໄຂບັນຫາຜູ້ຍົກຍ້າຍຕັ້ງພູມລຳເນົາຕາມລຳພັງໃຈ ແລະ ການສ້າງຄອບຄົວບໍ່ຖືກຕ້ອງຕາມກົດໝາຍຢູ່ຕາມບໍລິເວນຊາຍແດນຂອງສອງປະເທດ ທີ່ນະຄອນວິ້ງ ແຂວງເຫງ້ອານ ສສ ຫວຽດນາມ, ເກັບກຳສະພາບຫາງສຽງສັງຄົມ ຕິດຕາມກວດກາ ສະພາບການຊີ້ນຳນຳພາໃນການປະຕິບັດສອງໜ້າທີ່ຍຸດທະສາດ ການປົກປັກຮັກສາ ແລະ ສ້າງສາພັດທະນາປະເທດຊາດ ໃນດ້ານດີ ດ້ານຕັ້ງໜ້າ ທີ່ມີການຂະຫຍາຍຕົວ ຄວນຊຸກຍູ້ສົ່ງເສີມ, ດ້ານຫຍໍ້ທໍ້ ທີ່ຄວນເອົາໃຈໃສ່ປັບປຸງແກ້ໄຂມີຫຍັງແດ່, ສາເຫດທີ່ພາໃຫ້ເກີດຄວາມຫຍໍ້ທໍ້ ແລະ ວິທີການແກ້ໄຂ.