ເພື່ອ​​ລາຍ​ງານການຈັດ​ຕັ້ງ​ປະຕິບັດ​ວຽກ​ງານ 1 ເດືອນ​ທີ່ຜ່ານມາ ​ກອງ​ປະຊຸມອົງການປົກຄອງແຂວງ ປະຈຳເດືອນກໍລະກົດ ໄດ້​ຈັດຂຶ້ນ​ໃນວັນ​ທີ 17 ກໍລະກົດ 2019 ຢູ່​ຫ້ອງ​ປະຊຸມ​ຫ້ອງ​ວ່າການ​ປົກຄອງ​ແຂວງ ພາຍ​ໃຕ້​ການ​ເປັນ​ປະທານ​ຂອງ​ທ່ານ ປອ ກອງ​ແກ້ວ ​ໄຊ​ສົງຄາມ ​ ເຈົ້າ​ແຂວງບໍລິຄຳ​ໄຊ, ມີບັນດາພະແນກການອ້ອມຂ້າງແຂວງ, ເມືອງ 7 ຕົວເມືອງ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ.

       ກອງປະຊຸມໄດ້ຮັບຟັງບົດລາຍງານ ການສັງລວມຜົນການຈັດຕັ້ງປະຕິບັດ ກອງປະຊຸມອົງການປົກຄອງແຂວງ ຄັ້ງວັນທີ 27 ມິຖຸນາທີ່ຜ່ານມາ ໂດຍລວມແລ້ວ ເຫັນວ່າວຽກງານຫຼາຍດ້ານໄດ້ຮັບການປະຕິບັດ ແລະ ໄດ້ຮັບຜົນສຳເລັດເປັນຢ່າງດີ ເປັນຕົ້ນແມ່ນສາມາດສ້າງລາຍຮັບໄດ້ 385,10 ຕື້ກີບ, ໃນນີ້ ພູດສູນກາງ 283,47 ຕື້ກີບ ແລະ ພູດທ້ອງຖິ່ນ 101,62 ຕື້ກີບ, ຜະລິດເຂົ້ານາປີ ຕາມແຜນ 37.470 ເຮັກຕາ ສຳເລັດແລ້ວ 23.672 ເຮັກຕາ ໃນນັ້ນ ນາດຳ 16.192 ເຮັກຕາ ແລະ ນາຫວ່ານ 7.480 ເຮັກຕ່າ, ສາມາດມ້າງຄະດີໄດ້ 13 ເລື່ອງ, ກັກຂັງຜູ້ກະທຳຜິດໄດ້ 32 ຄົນ, ເກັບກູ້ຂອງກາງໄດ້ ລົດຈັກ 2 ຄັນ, ປືນສັ້ນ 1 ກະບອກ, ເງິນກີບ 20.500.000 ກີບ, ເງີນບາດ 44.200 ບາດ, ພ້ອມດຽວກັນນັ້ນ ບັນດາເມືອງ ຍັງໄດ້ສຸມໃສ່ແກ້ໄຂບັນຫາ 4 ເຖື່ອນຢ່າງຕັ້ງໜ້າ ເຮັດໃຫ້ສັງຄົມມີຄວາມສະຫງົບ ແລະ ປອດໄພໂດຍພື້ນຖານ.

    ກອງປະຊຸມ ກໍ່ຍັງໄດ້ຮັບຟັງການລາຍງານຫຼາຍວຽກງານທີ່ພົ້ນເດັ່ນ ຈາກບັນດາເມືອງ ແລະ ພະແນກການທີ່ກ່ຽວຂ້ອງ ເປັນຕົ້ນແມ່ນ ການປ້ອງກັນ-ປິ່ນປົວ ພະຍາດໄຂ້ເລືອດອອກ, ການສ້ອມແປງເສັ້ນທາງເທດສະບານເມືອງປາກຊັນ, ຜົນການສອບເສັງຈົ້ບຊັ້ນມໍ 4 ແລະ ມໍ 7, ການອຳນວຍຄວາມສະດວກທາງດ້ານການຄ້າ, ການຄຸ້ມຄອງການນຳໃຊ້ລະບົບສື່ອິເລັກໂທນິກອອນລາຍ ແລະ ອື່ນໆ.