ກອງປະຊຸມ ແລກປ່ຽນຂໍ້ມູນຂ່າວສານກ່ຽວກັບການຄວບຄຸມພະຍາດອະຫິວາ ໝູອາຟຣິກາ ຕາມແນວຊາຍແດນ ລະຫວ່າງ ເມືອງທ່າພະບາດ ແຂວງບໍລິຄໍາໄຊ ກັບ ເມືອງລັດຕະນະວາປີ ແຂວງໜອງຄາຍ, ເມືອງປາກຄາດ ແຂວງບຶງການ ປະເທດໄທ ໄດ້ຈັດຂຶ້ນໃນວັນທີ 12 ກໍລະກົດ 2019 ຢູ່ທີ່ຫ້ອງປະຊຸມສໍານັກງານປົກຄອງເມືອງທ່າພະບາດ ໂດຍເປັນກຽດເຂົ້າຂອງທ່ານ ປອ ດວງຕາ ມໍລະຄາສຸກ ເຈົ້າເມືອງທ່າພະບາດ, ທ່ານ ທະນາວຸດ ທອງທະວີ ເຈົ້າເມືອງປາກຄາດ, ທ່ານ ນາງ ຈະລິຍາ ວົງສຸວັນ ຮອງເຈົ້າເມືອງລັດຕະນະວາປີ, ມີບັນດາທ່ານໃນຄະນະນຳຂັ້ນເມືອງ, ພະແນກການທີ່ກ້ຽວຂ້ອງຈາກລາວ ແລະ ໄທ, ພະນັກງານຮາກຖານປະຈໍາຢູ່ເມືອງ, ປກສ-ປກຊ ພ້ອມດ້ວຍບັນດາຫົວໜ້າຫ້ອງການພາຍໃນເມືອງ ເຂົ້າຮ່ວມ.

    ໃນກອງປະຊຸມ ທ່ານ ບຸນເພັງ ຈັນທະວົງສຸກ ຫົວໜ້າຫ້ອງການກະສິກໍາ ແລະ ປ່າໄມ້ເມືອງທ່າພະບາດ ໄດ້ນໍາສະເໜີລາຍງານສະພາບການລະບາດຂອງພະຍາດອະຫິວາໝູອາຟຣິກາຢູ່ພາກພື້ນ ແລະ ສາກົນ ວ່່າ: ຄັ້ງທຳອິດແມ່ນເກີດຂຶ້ນຢູ່ທະວີບອາຟຣິກາໃນຊຸມປີ 1907 ຕໍ່ມາປີ 2007 ໄດ້ເກີດມີການລະບາດຢູ່ທະວີບເອີຣົບ ຮອດເດືອນສິງຫາ 2018 ໄດ້ມີການລະບາດຢູ່ປະເທດຈີນ ໝູຫຼາຍກ່ວາ 38,000 ໂຕ ຖືກຂ້າ ແລະ ມີການລາຍງານວ່າ ໄດ້ແຜ່ຂະຫຍາຍໄປທົ່ວທຸກພາກພື້ນຂອງຈີນ. ຕໍ່ມາໃນວັນທີ 19 ກຸມພາ 2019 ມີລາຍງານວ່າ ພະຍາດອະຫິວາໝູອາຟຣິກາ ໄດ້ເລີ່ມແຜ່ລະບາດຢູ່ປະເທດຫວຽດນາມ ແລະ ໄດ້ທໍາລາຍໝູໄປແລ້ວຫຼາຍກ່ວາ 3,000,0000 ໂຕ. ສ່ວນຢູ່ ສປປ ລາວ ເລີ່ມແຕ່ວັນທີ 25 ເມສາ ຫາ 10 ມິຖຸນາ 2019 ໄດ້ເກີດມີປະກົດການສັດລ້ຽງຂອງປະຊາຊົນ ໝູຕາຍຈໍານວນ 868 ໂຕ ໃນຈໍານວນ 7 ບ້ານ ທີ່ເກີດຂຶ້ນກັບເມືອງຕຸ່ມລານ ແຂວງສາລະວັນ ແລະ ມີ 1 ບ້ານຢູ່ເມືອງນາຊາຍທອງ ນະຄອນຫຼວງຈັນ, ໃນວັນທີ 3 ກໍລະກົດ 2019 ກົມລ້ຽງສັດ ແລະ ການປະມົງ ໄດ້ກວດພົບພະຍາດອະຫິວາໝູອາຟຣິກາ ຈໍານວນ 4 ຕົວຢ່າງ ຈາກ 1 ບ້ານ ຢູ່ເມືອງນາຊາຍທອງ ນະຄອນຫຼວງວຽງຈັນ, ປະກົດການດັ່ງກ່າວນີ້ ແມ່ນບໍ່ເຄີຍມີມາກ່ອນໃນອາດີດຜ່ານມາ, ການລະບາດຂອງພະຍາດນີ້ ສາເຫດແມ່ນເກີດມາຈາກສັດລ້ຽງຂອງປະຊາຊົນ ທີ່ມີຊາຍແດນຕິດກັບປະເທດຫວຽດນາມ ທີ່ມີການແລກປ່ຽນຊື້ຂາຍສິນຄ້າຕາມປະເພນີ.

      ສະນັ້ນ, ບັນດາທ່ານເຂົ້າຮ່ວມກອງປະຊຸມ ກໍໄດ້ມີການແລກປ່ຽນປະກອບຄໍາຄິດຄໍາເຫັນ ແລະ ເພື່ອຊອກຫາວິທີຄວບຄຸມ ແລະ ປ້ອງກັນ ການລະບາດຂອງພະຍາດອະຫິວາໝູອາຟຣິກາ ພ້ອມທັງຫ້າມນໍາເອົາສັດປະເພດໝູເຂົ້າ - ອອກຕາມແນວຊາຍແດນ ລະຫວ່າງເມືອງທ່າພະບາດ, ເມືອງລັດຕະນະວາປີ, ເມືອງປາກຄາດ ປະເທດໄທ ເພາະວ່າໃນຊ່ວງນີ້ແມ່ນສ່ຽງຕໍ່ການເກີດລະບາດຂອງພະຍາດ ອະຫິວາໝູອາຟຣິກາ.