ດັ່ງທີ່ພວກເຮົາຮູ້ນຳກັນແລ້ວວ່າ ປາກໍ່ເປັນແຫຼ່ງອາຫານທີ່ສຳຄັນຕໍ່ການດຳລົງຊີວິດຂອງມະນຸດເຮົາ. ສະນັ້ນ ເພື່ອເປັນການອະນຸລັກສັດນ້ຳ ໂດຍສະເພາະແມ່ນປາ ໃຫ້ຢູ່ຄູ່ກັບຄົນເຮົາຕະຫຼອດໄປ ພັກ ແລະ ລັດຖະບານເຮົາກໍ່ໄດ້ກຳນົດເອົາວັນທີ 13 ກໍລະກົດ ຂອງທຸກໆປີເປັນວັນປ່ອຍປາແຫ່ງຊາດ.

          ມາໃນຕອນເຊົ້າຂອງວັນທີ 10 ກໍລະກົດ 2019 ນີ້ ຢູ່ເມືອງປາກກະດິງ ແຂວງບໍລິຄຳໄຊ ໄດ້ມີພິທີປ່ອຍປາ 6 ພັນໂຕລົງສູ່ທຳມະຊາດຢ່າງເປັນຂະບວນການ ປາທີ່ນຳມາປ່ອຍໃນຄັ້ງນີ້ມີ: ປາປາກ 3 ພັນໂຕ ແລະ ປານວນຈັນ 3 ພັນໂຕ. ພິທີໄດ້ຈັດຂື້ນຢູ່ທີ່ບ້ານໂພນຈະເລີນ(ຄຸ້ມໂພນງາມ) ໂດຍໄດ້ປ່ອຍປາລົງສູ່ນ້ຳກະດິງ ເຂດວັງສະຫງວນຂອງບ້ານໂພນຈະເລີນ(ຄຸ້ມໂພນງານ). ໃຫ້ກຽດເຂົ້າຮ່ວມໂດຍທ່ານ ສຸລິຈັນ ມາກສົມພານ  ຮອງເຈົ້າເມືອງປາກກະດິງ, ທ່ານ ພັດທະຈອນ ແກ້ວພຸດທະວົງ ຮອງຫົວໜ້າພະແນກກະສິກຳ ແລະ ປ່າໄມ້ ແຂວງ, ມີຫົວໜ້າຫ້ອງການ-ຕາງໜ້າຫ້ອງການອ້ອມຂ້າງເມືອງ ແລະ ປະຊາຊົນບ້ານໂພນຈະເລີນ ເຂົ້າຮ່ວມ.