ເພື່ອເປັນການປົກປັກຮັກສາຊັບສິນຂອງລັດ, ລວມໝູ່ ແລະ ພໍ່ແມ່ປະຊາຊົນບັນດາເຜົ່າ, ປົກປ້ອງຊີວິດ, ສຸຂະພາບ ຂອງພົນລະເມືອງລາວ, ຊາວຕ່າງປະເທດ ທີ່ມາອາໃສ ແລະ ດໍາເນີນທຸກິດຢູ່ປະເທດເຮົາ ເວົ້າລວມ, ເວົ້າສະເພາະ ກໍ່ຄືແຂວງບໍລິຄໍາໄຊ, ໃຫ້ມີຄວາມສະຫງົບ, ປອດໄພ, ສະນັ້ນ, ໃນວັນທີ 10 ກໍລະກົດ 2019 ນີ້ພະແນກຕຳຫຼວດສະກັດກັ້ນ ແລະ ຕ້ານອັກຄີໄພ ປກສ ແຂວງບໍລິຄຳໄຊ ໄດ້ລົງສາທິດການສະກັດກັ້ນ ແລະ ຕ້ານອັກຄີໄພ ຢູ່ໂຮງແຮມທົ່ງສາຍລົມ ແລະ ປໍ້ານໍ້າມັນນາງບຸນເລື່ອນ ຢູ່ເມືອງປາກກະດິງ ແຂວງບໍລິຄໍາໄຊ, ນໍາໂດຍທ່ານ ພຕ ແຂກ ພົມມະກົດ ຮອງຫົວໜ້າພະແນກຕໍາຫຼວດສະກັດກັ້ນ ແລະ ຕ້ານອັກຄີໄພ ປກສ ແຂວງ ພ້ອມດ້ວຍຄະນະ, ມີຜູ້ປະກອບການໂຮງແຮມ ແລະ ປໍ້ານໍ້າມັນ ເຂົ້າຮ່ວມ.

          ການສາທິດສະກັດກັ້ນ ແລະ ຕ້ານອັກຄີໄພໃນຄັ້ງນີ້ ເພື່ອເຮັດໃຫ້ເຈົ້າຂອງໂຮງແຮມ ແລະ ປໍ້ານໍ້າມັນ ຕະຫຼອດຮອດພະນັກງານສາມາດປ້ອງກັນອັກຄີໄພໄດ້ຖືກວິທີ, ຮັບຮູ້ເຖິງສາເຫດຂອງການເກີດອັກຄີໄພ, ວີທີປະຕິບັດ, ການຊ່ວຍເຫຼືອຕົນເອງ ແລະ ຜູ້ອື່ນອອກຈາກສະຖານທີ່ຖືກໄຟໄໝ້, ນອກນັ້ນ ຍັງໄດ້ຮັບຊົມການສາຍວີດີໂອເຫດການຕົວຈີງການເກີດອັກຄີໄພທີ່ໄດ້ສ້າງຜົນເສຍຫາຍທາງດ້ານຊັບສິນ, ສຸຂະພາບ ແລະ ຊີວິດຂອງປະຊາຊົນບັນດາເຜົ່າເປັນຈໍານວນຫຼວງຫຼາຍໃນແຕ່ລະປີ, ຮັບຟັງການແນະນໍາວິທີໃຊ້ອຸປະກອນມອດໄຟຂັ້ນພື້ນຖານ ເຊັ່ນ: ການມອດໄຟດ້ວຍຜົງເຄມີແຫ້ງ, ການນໍາໃຊ້ນໍ້າດັບໄຟ, ເຄມີໂຟມ, ທາດອາຍບໍ່ຕິດໄຟ ແລະ ອື່ນໆ. 

    ພ້ອມນີ້ ຍັງໄດ້ອະທິບາຍເຖິງວິທີການກວດກາບັ້ງມອດໄຟ, ລະບົບສຽງສັນຍານເຕືອນໄພ ແລະ ລະບົບນ້ຳປະປາທີ່ຕິດຕັ້ງຕາມຈຸດຕ່າງໆ ໃຫ້ຢູ່ໃນສະພາບພ້ອມໃຊ້ງານຢູ່ສະເໝີ.