ຕອນເຊົ້າ ວັນທີ 09 ກໍລະກົດ 2019 ນີ້ ບໍລິສັດ ສະຕຣາ ໂທລະຄົມ (ຢູນິເທວ) ສາຂາແຂວງ ບໍລິຄໍາໄຊ ໄດ້ນໍາເອົາໂຕະ-ຕັ້ງ ມາມອບໃຫ້ ດ່ານສາກົນປາກຊັນ ແຂວງ ບໍລິຄໍາໄຊ ຈໍານວນ 05 ຊຸດ ມູນຄ່າ 6.500.000 ກີບ ແລະ ມອບຕັ່ງໃຫ້ສວນສາທາລະນະ ທ່ານ ສີສົມພອນ ລໍວັນໄຊ ຈໍານວນ 30 ໜ່ວຍ ມູນຄ່າ 6.000.000 ກີບ, ໂດຍເປັນກຽດມອບຂອງ ທ່ານ ນາງ ດາວອນ ເພັດສານຸພົນ ອໍານວຍການ ບໍລິສັດ ສະຕຣາ ໂທລະຄົມ ສາຂາ ແຂວງ ບໍລິຄໍາໄຊ ພ້ອມດ້ວຍຄະນະ ແລະ ເປັນກຽດກ່າວຮັບໂດຍ ທ່ານ ພັທ ນາງ ສີສົມພອນ ຈະເລີນລາດ ຫົວໜ້າດ່ານຕໍາຫຼວດກວດຄົນເຂົ້າ-ອອກເມືອງ ດ່ານສາກົນປາກຊັນ ແລະ ທ່ານ ສິງຖາວອນ ອິນທະແສງ ວ່າການ ຄະນະຮັບຜິດຊອບ ອານຸສາວະລີແຂວງ,​ ມີພະນັກງານ, ຂະແໜງການທີ່ກ່ຽວຂ້ອງ ເຂົ້າຮ່ວມ.

          ທ່ານ ນາງ ດາວອນ ເພັດສານຸພົນ ໄດ້ກ່າວວ່າ: ຍ້ອນເຫັນໄດ້ຄວາມສໍາຄັນ ແລະ ຈໍາເປັນໃນສະເພາະໜ້າ ແລະ ຍາວນານ ຂອງການໃຫ້ບໍລິການປະຊາຊົນ ແລະ ສະຖານທີ່ພັກຜ່ອນສາທາລະນະຕ່າງໆ ໃຫ້ມີຄວາມສະດວກສະບາຍຍິ່ງຂຶ້ນ,  ສະນັ້ນ ທາງບໍລິສັດ ສະຕຣາ ໂທລະຄົມ ສາຂາ ແຂວງ ບໍລິຄໍາໄຊ ຈຶ່ງໄດ້ມີການຄົ້ນຄ້ວາປຶກສາຫາລືກັນ ນໍາເອົາໂຕະ-ຕັ້ງ ຈໍານວນດັ່ງກ່າວ ມາມອບໃຫ້ໃນຄັ້ງນີ້ ເພື່ອຮັບໃຊ້ເຂົ້າໃນວຽກງານຕົວຈິງ ກໍ່ຄືເຮັດໃຫ້ ພໍ່, ແມ່, ປະຊາຊົນ ທີ່ມາຊົມໃຊ້ບໍລິການໃນສະຖານທີ່ຂອງລັດ ແລະ ສວນສາທາລະນະ ໄດ້ນໍາໃຊ້ໃຫ້ເປັນປະໂຫຍດ ແລະ ມີຄວາມສະດວກສະບາຍ.