ພິທີເຊັນສັນຍາສຳປະທານ ໂຄງການພັດທະນາກະສິກຳປູກກ້ວຍ ໄດ້ຈັດຂຶ້ນໃນວັນທີ 11 ກໍລະກົດ 2019 ຢູ່ພະແນກແຜນການ ແລະ ການລົງທຶນແຂວງ ຕາງໜ້າໃຫ້ແກ່ອຳນາດການປົກຄອງແຂວງບໍລິຄຳໄຊ ເຊັນໂດຍທ່ານນາງ ແກ້ວວິໄລ ບຸນໂຮມ ຮອງຫົວໜ້າພະແນກແຜນການ ແລະ ການລົງທຶນແຂວງ, ຕາງໜ້າບໍລິສັດຜູ້ລົງທຶນພັດທະນາ ເຊັນໂດຍ ທ່ານ ດວງແກ້ວ ດວງຈະເລີນ ອຳນວຍການບໍລິສັດດວງຈະເລີນ ພັດທະນາກະສິກຳ ຈຳກັດຜູ້ດຽວ ຊ້ອງໜ້າໂດຍ ທ່ານ ບຸນມາ ບຸຈະເລີນ ຮອງເຈົ້າແຂວງບໍລິຄຳໄຊ ພ້ອມດ້ວຍຫົວໜ້າພະແນກການອ້ອມຂ້າງ, ເມືອງ ແລະ ພະນັກງານວິຊາການເຂົ້າຮ່ວມເປັນສັກຂີພິຍານ.

       ບໍລິສັດ ແມ່ນມີຄວາມຕ້ອງການສຳປະທານ ໂຄງການພັດທະນາກະສິກຳ ປູກກ້ວຍ ຢູ່ບ້ານໂພນທອງ ເມືອງບໍລິຄັນ ແຂວງບໍລິຄຳໄຊ ໃນເນື້ອທີ 150 ເຮັກຕາ, ສັນຍາດັ່ງກ່າວແມ່ນມີອາຍຸ 10 ປີ ແລະ ສາມາດຕໍ່ໄດ້ດ້ວຍເຫດ ແລະ ຜົນ, ນີ້ຈະເປັນຜົນດີຕໍ່ການພັດທະນາເສດຖະກິດຂອງແຂວງ ກໍ່ຄືການພັດທະນາເສດຖະກິດຄອບຄົວຂອງພໍ່ແມ່ປະຊາຊົນເມືອງບໍລິຄັນ. ເພື່ອແນໃສ່ເຮັດໃຫ້ການຈັດຕັ້ງປະຕິບັດໂຄງການດັ່ງກ່າວໄດ້ດຳເນີນໄປຢ່າງຖືກຕ້ອງຕາມລະບຽບ-ກົດໝາຍ ແລະ ທ່ວງທັນຕາມເວລາກຳນົດເວລາ ພະແນກແຜນການ ແລະ ການລົງທຶນແຂວງ ຈຶ່ງໄດ້ກະກຽມທາງດ້ານເນື້ອໃນສັນຍາ ແລະ ລະບຽບການໃຫ້ຖືກຕ້ອງຕາມກົດໝາຍທີ່ວາງໄວ້.