ໂດຍປະຕິບັດຕາມຄໍາສັ່ງຂອງ ທ່ານ ເຈົ້າແຂວງ ບໍລິຄໍາໄຊ ສະບັບເລກທີ 001/ຂບຊ ລົງວັນທີ 01 ກຸມພາ 2018 ວ່າດ້ວຍການສະກັດກັ້ນ ແລະ ປາບປາມຫວຍເຖື່ອນ  ຕອນເຊົ້າວັນທີ 08 ກໍລະກົດ 2019 ນີ້ ທີ່ຫ້ອງການ ພະແນກ ຕໍາຫຼວດປ້ອງກັນເສດຖະກິດ ປກສ ແຂວງ ບໍລິຄໍາໄຊ ໄດ້ຈັດໃຫ້ມີພິທີສຶກສາອົບຮົມ ຜູ້ຂາຍຫວຍເຖື່ອນຂຶ້ນ, ໂດຍການປະສານສົມທົບຂອງ ພະແນກ ຕໍາຫຼວດປ້ອງກັນເສດຖະກິດ ປກສ ແຂວງ ກັບ ອົງການໄອຍະການປະຊາຊົນແຂວງ. 

       ການຄ້າຂາຍຫວຍເຖື່ອນ ກໍ່ເປັນອີກປະກົດການໜຶ່ງ ທີ່ສ້າງຄວາມບໍ່ສະຫງົບໃຫ້ສັງຄົມ ເຊີ່ງກົດໝາຍອາຍາ ແຫ່ງ ສປປ ລາວໄດ້ຈັດຢູ່ໃນປະເພດຄະດີຫລີ້ນການພະນັນທີ່ຕ້ອງຫ້າມ, ມາດຕາ 141 ຂອງກົດໝາຍອາຍາ ໄດ້ລະບຸໄວ້ວ່າ: ບຸກຄົນໃດຫາກຫຼີ້ນການພະນັນທີ່ຕ້ອງຫ້າມ ຈະຖືກປັບໄໝແຕ່ 5.000.000 ກີບ ຫາ 10.000.000 ກີບ, ບຸກຄົນໃດຫາກໄດ້ສົມຍອມໃຫ້ຫຼີ້ນການພະນັນທີ່ຕ້ອງຫ້າມຢູ່ໃນເຮືອນຂອງຕົນ ຫຼື ເປັນເຈົ້າມື ຫຼື ເປັນຜູ້ກະທໍາຜິດທີ່ບໍ່ເຂັດຫຼາບ ຈະຖືກລົງໂທດຕັດອິດສະລະພາບແຕ່ສາມເດືອນ ຫາ ສອງປີ ຫຼື ດັດສ້າງໂດຍບໍ່ຕັດອິດສະລະພາບ ແລະ ຈະຖືກປັບໄໝແຕ່ 5.000.000 ກີບ ຫາ 15.000.000 ກີບ.

     ໃນໂອກາດນີ້ ຄະນະຊີ້ນຳການສຶກສາອົບຮົບຜູ້ຄ້າຂາຍຫວຍເຖື່ອນ ໄດ້ຮຽກຮ້ອງໃຫ້ພວກກ່ຽວຈົ່ງຢຸດເຊົາ ບໍ່ໃຫ້ກະທໍາຜິດຊໍ້າຕື່ມອີກ ເພາະການກະທໍາດັ່ງກ່າວ ແມ່ນສ້າງເງື່ອນໄຂຫາຜົນປະໂຫຍດໃຫ້ຕົນເອງແບບບໍ່ຖືກຕ້ອງຕາມກົດໝາຍ ເຮັດໃຫ້ສັງຄົມບໍ່ມີຄວາມເປັນລະບຽບຮຽບຮ້ອຍ, ຈົ່ງພາກັນຊອກຢູ່ຫາກິນສ້າງອາຊີບທີ່ສຸດຈະລິດ ຄ້າຂາຍ ຖືກຕ້ອງຕາມລະບຽບກົດໝາຍ ທີ່ໄດ້ກຳນົດໄວ້.