ກອງປະຊຸມ ໂຄງການສ້າງພະນັກງານນໍາພາ-ບັນຊາ ຄຸ້ມຄອງ ກອງບັນຊາການ ປກສ ເມືອງ ທ່າພະບາດ ແຂວງ ບໍລິຄໍາໄຊ ໄດ້ຈັດຂຶ້ນ ໃນຕອນເຊົ້າ ວັນທີ 04 ກໍລະກົດ 2019 ນີ້ ຢູ່ທີ່ຫ້ອງປະຊຸມຂອງກອງບັນຊາການ ປກສ ເມືອງ ໂດຍການເປັນປະທານຂອງ ທ່ານ ພັທ ຄໍາຜັນ ບຸນມີໄຊ ເລຂາຄະນະພັກຮາກຖານ, ຫົວໜ້າກອງບັນຊາການ ປກສ ເມືອງ ທ່າພະບາດ, ມີຄະນະພັກ-ຄະນະກອງບັນຊາການ, ບັນດາພະແນກ, ພະນັກງານຫຼັກແຫຼ່ງ,​ ພະນັກງານ-ນັກຮົບ ເຂົ້າຮ່ວມ.

          ກອງປະຊຸມຄັ້ງນີ້ ໄດ້ຮັບຟັງການຜ່ານເອກະສານທີ່ສໍາຄັນ ເຊັ່ນ: ເອກະສານ ມະຕິ ຂອງກົມການເມືອງ ສູນກາງພັກ ສະບັບ ເລກທີ 030/ກມສພ ລົງວັນທີ 03 ມັງກອນ 2018  ວ່າດ້ວຍມາດຖານຂອງພະນັກງານນໍາພາ-ຄຸ້ມຄອງ, ມະຕິ ສະບັບ ເລກທີ 031/ກມສພ ວ່າດ້ວຍວຽກງານຄຸ້ມຄອງພະນັກງານ, ມະຕິ ສະບັບເລກທີ 032/ກມສພ ວ່າດ້ວຍວຽກງານສ້າງແຜນກໍານົດພະນັກງານນໍາພາ-ຄຸ້ມຄອງ, ຄໍາສັ່ງແນະນໍາຂອງຄະນະຈັດຕັ້ງສູນກາງພັກ ສະບັບ ເລກທີ 292/ຄຈສພ ລົງວັນທີ 26 ເມສາ 2018 ກ່ຽວກັບການຈັດຕັ້ງປະຕິບັດມະຕິຂອງກົມການເມືອງສູນກາງພັກ ວ່າດ້ວຍມາດຖານຂອງພະນັກງານນໍາພາ-ຄຸ້ມຄອງ, ວຽກງານຄຸ້ມຄອງພະນັກງານ ແລະ ວຽກງານສ້າງແຜນກໍານົດພະນັກງານນໍາພາ - ຄຸ້ມຄອງ, ຜ່ານແຜນໂຄງການກໍ່ສ້າງໜ່ວຍພັກ, ສະມາຊິກພັກປອດໃສ, ເຂັ້ມແຂງ, ໜັກແໜ້ນ ແລະ ຜ່ານແຜນຂອງໂຄງການ ສ້າງພະນັກງານນໍາພາ-ບັນຊາ, ຄຸ້ມຄອງ ສືບທອດປ່ຽນແທນ ຂັ້ນກອງບັນຊາການ ປກສ ເມືອງ. 

    ການຈັດກອງປະຊຸມໃນຄັ້ງນີ້ ກໍ່ເພື່ອເຮັດໃຫ້ພະນັກງານນໍາພາ-ບັນຊາ ຄຸ້ມຄອງ ແຕ່ລະຂັ້ນ ກໍ່ຄືພະນັກງານ - ນັກຮົບ ໄດ້ເປັນເຈົ້າການໃນການກໍານົດເປົ້າໝາຍພະນັກງານທີ່ຈະບໍາລຸງ, ກໍ່ສ້າງ, ບັນຈຸ ຈັດວາງເຂົ້າໃສ່ຕໍາແໜ່ງງານຕ່າງໆ ເປັນຕົ້ນແມ່ນຕໍາແໜ່ງນໍາພາ - ບັນຊາ ຂັ້ນພະແນກ ແລະ ຂັ້ນໜ່ວຍງານ ໃຫ້ມີລັກສະນະສືບທອດຕໍ່ເນື່ອງ ທັງຮັບປະກັນເຮັດໃຫ້ມີຄວາມໜັກແໜ້ນທາງດ້ານຄຸນທາດການເມືອງ, ມີຄວາມຮູ້,​ ຄວາມສາມາດ ໃນລະດັບອັນແນ່ນອນ, ຫຼັງຈາກນັ້ນ ກໍ່ໄດ້ປ່ອນບັດທາບທາມບຸກຄະລາກອນ ພະນັກງານນໍາພາ-ບັນຊາ, ຄຸ້ມຄອງ ສືບທອດປ່ຽນແທນ ຂັ້ນກອງບັນຊາການ ປກສ ເມືອງ ທ່າພະບາດ.

          ທ່ານປະທານ ໄດ້ມີຄຳເຫັນຊີ້ນຳກອງປະຊຸມວ່າ ຄະນະພັກ, ຄະນະບັນຊາທຸກຂັ້ນ ຕ້ອງໄດ້ເອົາໃຈຄົ້ນຄ້ວາ, ເລືອກເອົາພະນັກງານຜູ້ທີ່ດີເດັ່ນ ແລະ ຄົບມາດຖານທີ່ໄດ້ກໍານົດໄວ້ ເຊັ່ນ: ຕ້ອງເປັນບຸກຄົນທີ່ຍຶດໝັ້ນຕໍ່ອຸດົມການຂອງພັກ, ເປັນຜູ້ທີ່ມີຄວາມຮັບຜິດຊອບສູງຕໍ່ໜ້າທີ່ການເມືອງ, ມີການເຄື່ອນໄຫວທີ່ຖືກຕ້ອງ, ມີນໍ້າໃຈເສຍສະຫຼະ, ມີຄວາມຮູ້ຄວາມສາມາດ, ມີຄວາມສາມັກຄີໃນຄະນະ, ການຈັດຕັ້ງ ແລະ ກົມກອງ, ພ້ອມນັ້ນ ກໍ່ຕ້ອງພ້ອມກັນຫັນເອົາມະຕິ, ຄໍາສັ່ງ, ຂໍ້ກໍານົດ, ກົດລະບຽບຕ່າງໆ ຜັນຂະຫຍາຍເຂົ້າໃນວຽກງານຕົວຈິງໃຫ້ມີແບບແຜນ ແລະ ເກີດດອກອອກຜົນ.