ການຝຶກອົບຮົມການຮຽບຮຽງ ແລະ ສ້າງປື້ມຄູ່ມື ຝຶກອົບຮົມວຽກງານແນວລາວສ້າງຊາດ ໄດ້ຈັດຂຶ້ນໃນຕອນບ່າຍຂອງວັນທີ 08 ກໍລະກົດ 2019 ຢູ່ທີ່ຫ້ອງປະຊຸມຫ້ອງວ່າການປົກຄອງແຂວງ ໂດຍການເຂົ້າຮ່ວມເປັນປະທານຂອງທ່ານນາງ ຄຳຈັນ ພົມແສງສະຫວັນ ຮອງປະທານສູນກາງແນວລາວສ້າງຊາດ, ທ່ານ ລຳສະໄໝ ວໍລະສານ ຄະນະປະຈຳພັກແຂວງ ປະທານແນວລາວສ້າງຊາດແຂວງບໍລິຄຳໄຊ, ມີຫົວໜ້າສູນຝຶກອົບຮົມສູນກາງແນວລາວສ້າງຊາດ, ພະນັກງານຈາກກະຊວງທີ່ກ່ຽວຂ້ອງ ແລະ ພະນັກງານວິຊາການພາຍໃນແຂວງ ເຂົ້າຮ່ວມ.

          ການສ້າງໂຄງຮ່າງຫຼັກສູດຝຶກອົບຮົມວຽກງານແນວລາວສ້າງຊາດ ແມ່ນໄດ້ດຳເນີນມາແຕ່ປີ 2017 ແລະ ໄດ້ເຮັດສຳເລັດການສ້າງໂຄງຮ່າງຫຼັກສູດທີ່ກະຊວງສຶກສາທິການ ແລະ ກິລາ ໄດ້ຮັບຮອງອະນຸມັດໃຫ້ໃຊ້ ໃນວັນທີ 18 ເມສາ 2019 ທີ່ຜ່ານມາ ແຕ່ມັນເປັນພຽງໂຄ່ງຮ່າງ, ເປັນຟໍແມັດ ຮູບແບບ ທີ່ຍັງບໍ່ໄດ້ບັນຈຸເນື້ອໃນລາຍລະອຽດລົງແຕ່ລະບົດເທື່ອ, ສະນັ້ນ ຈະຕ້ອງໄດ້ສືບຕໍ່ການສ້າງປື້ມຄູ່ມືຝຶກອົບຮົມໃນວິຊາຕ່າງໆຕາມໂຄງຮ່າງຫຼັກສູດນີ້. ໃນວິຊາວຽກງານຊົນເຜົ່ານີ້ ມີ 2 ຫົວຂໍ້ ຄື: ຫົວຂໍ້ວຽກງານຂົນຂວາຍຊົນເຜົ່າ ໂດຍມີຄວາມຮູ້ພື້ນຖານກ່ຽວກັບວຽກງານຂົນຂວາຍຊົນເຜົ່າຢູ່ ສປປ ລາວ, ເສີມຂະຫຍາຍມູນເຊື້ອອັນດີງາມຂອງບັນດາເຜົ່າ, ທິດສະດີ ແລະ ຫຼັກການໂຄສະນາບັນຫາຕ່າງໆໃນເຂດຊົນເຜົ່າທີ່ມີພົນລະເມືອງໜ້ອຍ, ໜ້າທີ່ ແລະ ຄວາມຮັບຜິດຊອບຂອງຜູ້ຊົງຄຸນວຸດທິໃນແຕ່ລະໄລຍະ, ຫົວຂໍ້ວຽກງານປົກປ້ອງຊົນເຜົ່າ: ບົດຄວາມຮູ້ພື້ນຖານກ່ຽວກັບວຽກງານຊົນເຜົ່າ, ຊົນເຜົ່າວິທະຍາ ແລະ ບົດເພີ່ມທະວີວຽກງານປົກປ້ອງສິດ ແລະ ຜົນປະໂຫຍດຂອງປະຊາຊົນບັນດາເຜົ່າຢູ່ ສປປ ລາວ ໃນໄລຍະໃໝ່.

          ທັງນີ້ ກໍ່ເພື່ອປຶກສາຫາລື, ຄົ້ນຄ້ວາ ຮຽບຮຽງ ບັນດາເອກະສານຕ່າງໆ ໃຫ້ເປັນລະບົບ ຢ່າງຖືກຕ້ອງຕາມຫຼັກວິຊາການ ໃນການສ້າງປື້ມຄູ່ມືຝຶກອົບຮົມ, ຄົ້ນຄ້ວາ ແລະ ສ້າງສາລະບານ ໃສ່ແຕ່ລະບົດ, ກຳນົດເນື້ອໃນ ເພື່ອຄວາມເປັນເອກະພາບກັນ ຂອງວຽກງານຊົນເຜົ່າທີ່ຈະໄດ້ເຜີຍແຜ່ຕໍ່ສາທາລະນະ ໃຫ້ມີເນື້ອໃນຄົບຖ້ວນ, ສົມບູນ ແລະ ມີຄວາມສະດວກໃນການນຳໃຊ້ເຂົ້າໃນການຝຶກອົບຮົມ. ຊຸດອົບຮົມໃນຄັ້ງນີ້ ຈະໄດ້ດຳເນີນໄປເປັນເວລາ 5 ວັນຈຶ່ງຈະສຳເລັດ.