​     ເພື່ອ​ເປັນ​ການ​ລົງ​ຊຸກຍູ້​ສົ່ງ​ເສີມວຽກ​ງານ​ປ້ອງ​ກັນຊາ​ດ-ປ້ອງ​ກັນ​ຄວາມ​ສະຫງົບ ​​ໃຫ້​ມີ​ຄວາມ​ເຂັ້ມ​ແຂງໜັກແໜ້ນ ​ແລະ ​ເປັນ​ການ​ພົບ​ປະ​ຢ້ຽມຢາມອ້າຍ​ນ້ອງ​ທະຫານ​ ທີ່​ປະຈຳ​ຢູ່​ບັນດາ​ກົມ​ກອງ​​ໃນ​ເຂດ​ຫ່າງ​ໄກ ​ໃນ​ວັນ​ທີ 2 ກໍ​ລະ​ກົດ 2019 ທ່ານ ກອງ​ແກ້ວ ​ໄຊ​ສົງຄາມ ​ເຈົ້າ​ແຂວງ​ບໍລິ​ຄຳ​ໄຊ ປະທານ​ປ້ອງ​ກັນຊາ​ດ-ປ້ອງ​ກັນ​ຄວາມ​ສະຫງົບ​ຂັ້ນ​ແຂວງ, ທ່ານ ພົຈ ຈວງ​ຈັນ ລາດ​ຊະ​ວົງ ຫົວໜ້າ​ການ​ເມືອງ​ກອງ​ບັນຊາ​ການ​ທະຫານ​ແຂວງ ພ້ອມ​ດ້ວຍ​ຄະນະ ​ໄດ້​ລົງ​ພົບ​ປະ​ຢ້ຽມຢາມ​ທະຫານກອງຮ້ອຍ 3 ງໍ 615 ​ເຂດ​ນ້ຳ​ຈອຍ ​ແລະ ກອງພັນ 615 ຢູ່ບ້ານ​ທ່າ​ສີ​ ເມືອງ​ບໍລິ​ຄັນ.

    ທ່ານ ພັທ ສີ​ລັງ​ພອນ ​ແພງ​ນະຄອນ ຫົວໜ້າ​ການ​ເມືອງ​ກອງພັນ 615 ​ໄດ້​ລາຍ​ງານ​ການ​ເຄື່ອນ​ໄຫວ​ປະ​ຕິບັດ​ວຽກ​ງານຂອງ​ກົມ​ກອງ​ ​​ໃນ​ໄລຍະ​ຜ່ານ​ມາວ່າ ​ໄດ້ມີ​ການ​ເຄື່ອນ​ໄຫວທາງດ້ານ​ວຽກ​ງານ​ວິຊາ​ສະ​ເພາະ​ຢ່າງ​​ເຂັ້ມ​ແຂງ ​​ເຊິ​ງ​ໄດ້ສະ​​ແດງ​ອອກ ​ໃນ​ການກວດກາ​ລາດ​ຕາ​ເວັນ​​ຂອບ​ເຂດຮັບຜິດຊອບ​ຢ່າງ​ເປັນ​ປະຈຳ ​​​​​ເຮັດ​ໃຫ້​​ມີ​ຄວາມ​ສະຫງົບປອດ​ໄພ ປະຊາຊົນ​ທຳ​ມາ​ຫາ​ກິ​ນດ້ວຍຄວາມສະດວກປອດໄພ ​ແລະ ມີ​ຊິວິດ​ການ​ເປັນ​ຢູ່ດີ​ຂຶ້ນ, ​ອ້າ​ຍນ້ອງ​ພາຍ​ໃນ​ກົມ​ກອງ​ມີ​ຄວາມ​ສາມັກຄີຊ່ວຍເຫຼືອເຊິ່ງກັນ ແລະ ກັນ ​ພ້ອມທັງ​ໄດ້​​ເອົາ​ໃຈ​ໃສ່​ຕັ້ງໜ້າ​ ປະຕິບັດ​ກົດ​ລະບຽບ​ວາງ​ອອກ​ຢ່າງ​ເຂັ້ມ​ງວດ, ຈາກນັ້ນໃນພິທີທ່ານເຈົ້າແຂວງ ຍັງໄດ້ໃຫ້ກຽດມີຄຳເຫັນໂອ້ລົມ ຕໍ່ອ້າຍນ້ອງພາຍໃນກົມກອງ ເຊິ່ງທ່ານໄດ້ເນັ້ນໜັກໃຫ້ຄະນະກອງພັນ ຈົ່ງສືບຕໍ່ສຶກສາອົບຮົມການເມືອງ-ແນວຄິດ ໃຫ້ແກ່ຖັນແຖວອ້າຍນ້ອງ ພະນັກງານນັກຮົບ ໃຫ້ມີຄວາມເຂັ້ມແຂງໜັກແໜ້ນ, ເອົາໃຈໃສ່ປັບປຸງກໍ່ສ້າງພັກໃຫ້ປອດໃສເຂັ້ມແຂງໜັກແໜ້ນ  ເສີມຂະຫຍາຍມຸນເຊື້ອສາມັກຄີກັບປະຊາຊົນ ໃຫ້ມີຄວາມແໜ້ນແຟ້ນ, ຕັ້ງໜ້າຜັນຂະຫຍາຍ 4 ໜ້າທີ່ 26 ແຜນງານໃຫ່ຍ ແລະ ປະຕິບັດ 4 ປູກ 4 ລ້ຽງ ຂອງກະຊວງປ້ອງກັນຊາດວາງອອກໃຫ້ປະກົດຜົນເປັນຈິງ, ໄປຄຽງຄູ່ກັນນັ້ນ ກໍ່ຕ້ອງມີຄວາມບໍລິສຸດຕໍ່ຊາດ, ມີຄວາມເສຍສະຫຼະຮັບໃຊ້ປະຊາຊົນຢ່າງສຸດໃຈ ແລະ ຕັ້ງໜ້າປະຕິບັດເຮັດສຳເລັດທຸກວຽກງານທີ່ຂັ້ນເທິງມອບໝາຍໃຫ້.

      ​ໃນ​ໂອກາດນີ້​ ທ່ານເຈົ້າແຂວງພ້ອມຄະນະ​ ໄດ້​ນຳ​ເອົາ​ເຄື່ອງ​ອຸປະ​ໂພ​ກ-ບໍລິ​ໂພກຈຳນວນໜຶ່ງ​ ​ເຊິ່​ງປະກອບ​ມີເຂົ້າສານ​ໜຽວ, ປາກະປ໋ອງ, ໝີ່, ເຄື່ອງກິລາ​ ພ້ອມດ້ວຍອຸປະກອນ​ການ​ຫຼີ້ນກິລາມາ​ມອບ​ໃຫ້. ຫຼັງຈາກນັ້ນທ່ານເຈົ້າແຂວງພ້ອມດ້ວຍຄະນະ ຍັງໄດ້ໄປພົບປະຢ້ຽມຢາມປະຊາຊົນເຜົ່າມົ້ງ ທີ່ຍ້າຍຈາກຜົນກະທົບໂຄງການກໍ່ສ້າງເຂື່ອນໄຟຟ້ານ້ຳງຽບ 1 ມາຢູ່ເຂດກຸ່ມບ້ານນາກຸນ ເມືອງບໍລິຄັນ ໃນນັ້ນ ຢູ່ບ້ານນາກຸນ 7 ຄອບຄົວ ແລະ ຢູ່ບ້ານຫວ້າ 39 ຄອບຄົວ ເຊິ່ງເຫັນໄດ້ວ່າ ຊີວິດການເປັນຢູ່ຂອງເຂົາເຈົ້າ ແມ່ນດີຂື້ນຈາກເມື່ອກ່ອນ ຊຶ່ງສະແດງອອກຄື ມີທີ່ຢູ່ອາໃສ ແລະ ເຮືອນແໜ້ນໜາຖາວອນ.