ກອງປະຊຸມປຶກສາຫາລືໃຫ້ແກ່ຄະນະກຳມະການການຍົກຍ້າຍຈັດສັນ ແລະ ຟື້ນຟູຊີວິດການເປັນຢູ່ຂອງປະຊາຊົນ ໂຄງການເຂື່ອນໄຟຟ້ານ້ຳງຽບ 1 ໄດ້ຈັດຂຶ້ນໃນຕອນເຊົ້າຂອງວັນທີ 03 ກໍລະກົດ 2019 ຢູ່ທີ່ຫ້ອງປະຊຸມຂອງຫ້ອງວ່າການປົກຄອງແຂວງບໍລິຄຳໄຊ ໂດຍພາຍໃຕ້ການເປັນປະທານຂອງທ່ານ ປອ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ, ມີຄະນະປະຈຳພັກແຂວງ, ຫົວໜ້າ, ຮອງຫົວໜ້າພະແນກການອ້ອມຂ້າງແຂວງ, ສະມາຊິກສະພາປະຊາຊົນແຂວງ, ເຈົ້າເມືອງ ພ້ອມດ້ວຍພະນັກງານທີ່ກ່ຽວຂ້ອງພາຍໃນບໍລິສັດເຂົ້າຮ່ວມ.

          ກອງປະຊຸມໄດ້ລາຍງານຄວາມຄືບໜ້າຜົນການຈັດຕັ້ງປະຕິບັດວຽກງານຂອງໂຄງການໄຟຟ້ານ້ຳງຽບ 1 ວ່າ: ວຽກງານສາທາລະນະສຸກໃນບ້ານຍົກຍ້າຍຈັດສັນພູໂຮມໄຊ ສ້າງສຸກສາລາໃໝ່ 1 ຫຼັງ ແລະ ເປີດນຳໃຊ້ແຕ່ເດືອນຕຸລາ 2017, ມີອຸປະກອນການແພດ, ເຄື່ອງໃຊ້ຫ້ອງການຄົບຖ້ວນ, ໂຄງການໄດ້ສະໜອງຢາປົວພະຍາດຕາມລາຍການກະຊວງສາທາລະນະສຸກ, ມີພະນັກງານ 4 ຄົນ, ວຽກງານສຶກສາ ໄດ້ສ້າງໂຮງຮຽນອະນຸບານ 1 ຫຼັງ, ປະຖົມ 1 ຫຼັງ ແລະ ມັດທະຍົມຕອນຕົ້ນ 1 ຫຼັງ ເປີດນຳໃຊ້ແຕ່ສົກຮຽນ 2017-18 ເປັນຕົ້ນມາ, ມີພະນັກງານ 21 ຄົນ, ອັດຕາສຸດທິເຂົ້າຮຽນຊັ້ນປະຖົມ 100%, ອະນຸບານ 73%, ໄດ້ແຕ່ງຕັ້ງອຳນາດການປົກຄອງບ້ານຕາມຂໍ້ຕົກລົງຂອງທ່ານເຈົ້າເມືອງ ໂດຍປະກອບມີຄະນະບ້ານ 3 ທ່ານ, ມີ 5 ຂະແໜງການຂອງບ້ານ ມີ 83 ຫຼັງຄາເຮືອນ ໃນນີ້ ມາຈາກໄຊສົມບູນ 58 ຫຼັງຄາເຮືອນ.

          ຈາກນັ້ນ ກອງປະຊຸມໄດ້ປຶກສາຫາລືກັນຫຼາຍບັນຫາ ເປັນຕົ້ນແມ່ນການນຳໃຊ້ພື້ນທີ່ຄຸ້ມບ້ານຫາດຊາຍຄຳເກົ່າ, ມາດຕະການ ແລະ ນະໂຍບາຍຕໍ່ປະຊາຊົນ ຈຳນວນ 4 ຄົວເຮືອນ ທີ່ຍົກຍ້າຍເຂົ້າມາຢູ່ບ້ານຫາດຍື້ນ ແລະ ການເຂົ້າມາພັກເຊົາຂອງຄົນນອກ, ການປະກອບຄູ ແລະ ແພດ ປະຈຳສຸກສາລາ ບ້ານພູໂຮມໄຊ ພາຍຫຼັງມອບຮັບໂຄງການ, ການນຳໃຊ້ຫົວໜ່ວຍຊົດເຊີຍ 1003 ແລະ 031, ການສ້າງຄວາມສາມັກຄີພາຍໃນບ້ານ, ບັນຫາການຄ້າຂາຍຢາເສບຕິດ ແລະ ປະກົດການຫຍໍ້ທໍ້, ການເຂົ້າໄປຈັບຈອງທີ່ດິນ, ການຖາງປ່າເຮັດໄຮ່ແບບຊະຊາຍ, ແຜນຟື້ນຟູຊີວິດການເປັນຢູ່ໄລຍະຍາວ ແລະ ບັນຫາອື່ນໆທີ່ປິ່ນອ້ອມ. ທັງນີ້ ກໍ່ເພື່ອຟື້ນຟູຊີວິດການເປັນຢູ່ຂອງປະຊາຊົນຜູ້ຍົກຍ້າຍ ແລະ ບ້ານ ໃຫ້ດີຂຶ້ນ ພ້ອມທັງຮັບປະກັນດ້ານສິ່ງແວດລ້ອມໃຫ້ຢືນຢົງຕະຫຼອດໄປ.