ກອງປະຊຸມສະຫຼຸບລາຍງານການເຄື່ອນໄຫວວຽກງານຄຸ້ມຄອງເງິນຕາຕ່າງປະເທດ ແລະ ສົ່ງເສີມການນຳໃຊ້ເງິນກີບ ຂັ້ນແຂວງ ໄດ້ຈັດຂຶ້ນໃນຕອນເຊົ້າຂອງວັນທີ 04 ກໍລະກົດ 2019 ຢູ່ຫ້ອງປະຊຸມຫ້ອງວ່າການປົກຄອງແຂວງ ໂດຍພາຍໃຕ້ການເປັນປະທານຂອງທ່ານ ບຸນເສັງ ປະທຳມະວົງ ຮອງເຈົ້າແຂວງບໍລິຄຳໄຊ, ມີຫົວໜ້າ, ຮອງຫົວໜ້າພະແນກການອ້ອມຂ້າງ ແລະ ພະນັກງານວິຊາການທີ່ກ່ຽວຂ້ອງ    ເຂົ້າຮ່ວມ.

          ທ່ານ ສົມເພັດ ວົງຄຳຈັນ ຮອງຫົວໜ້າ ສາຂາທະນາຄານແຫ່ງ ສປປ ລາວ ປະຈຳພາກກາງແຂວງສະຫວັນນະເຂດ ໄດ້ລາຍງານການເຄື່ອນໄຫວວຽກງານຂອງຄະນະກຳມະການຕິດຕາມການຈັດຕັ້ງປະຕິບັດການບັງຄັບໃຊ້ລະບຽບການຄຸ້ມຄອງເງິນຕາຕ່າງປະເທດ ແລະ ສົ່ງເສີມການນຳໃຊ້ເງິນກີບຂັ້ນແຂວງປະຈຳປີ 2018 ວ່າ: ຜ່ານການເຄື່ອນໄຫວໃນ 1 ປີຜ່ານມາ ຂອງຄະນະ ແລະ ອະນຸກຳມະການ ໄດ້ມີການເຄື່ອນໄຫວວຽກງານຄຸ້ມຄອງເງິນຕາຕ່າປະເທດ ແລະ ສົ່ງເສີມການນຳໃຊ້ເງິນກີບ ດ້ວຍຫຼາຍຮູບການ ໂດຍເນັ້ນໃສ່ການປຸກລະດົມໂຄສະນາ, ເຜີຍແຜ່, ສຶກສາອົບຮົມ ໂດຍໄດ້ມີການຈັດກອງປະຊຸມເຜີຍແຜ່ກົດໝາຍ ແລະ ລະບຽບການຕ່າງໆກ່ຽວກັບການຄຸ້ມຄອງເງິນຕາຕ່າງປະເທດ ແລະ ສົ່ງເສີມການນຳໃຊ້ເງິນກີບ ເຊິ່ງສະແດງອອກໃນຫຼາຍດ້ານ ເປັນຕົ້ນແມ່ນ ສຳເລັດການຈັດກອງປະຊຸມສະຫຼຸບການເຄື່ອນໄຫວວຽກງານຂອງຄະນະກຳມະການຕິດຕາມການຈັດຕັ້ງປະຕິບັດການບັງຄັບໃຊ້ລະບຽບການຄຸ້ມຄອງເງິນຕາຕ່າງປະເທດ ແລະ ສົ່ງເສີມການນຳໃຊ້ເງິນກີບຂັ້ນແຂວງ 1 ຄັ້ງ, ສຳເລັດການເຜີຍແຜ່ກົດໝາຍຄຸ້ມຄອງເງິນຕາປະເທດ ຢູ່ເມືອງຄຳເກີດ ແລະ ເມືອງປາກກະດິງ ເມືອງລະ 1 ຄັ້ງ, ໄດ້ມອບປ້າຍແຈ້ງເຕືອນກ່ຽວກັບການຄຸ້ມຄອງເງິນຕາຕ່າງປະເທດ ແລະ ສົ່ງເສີມການນຳໃຊ້ເງິນກີບ ຂະໜາດ 80 x 120 cm ຈຳນວນ 4 ປ້າຍ ໃຫ້ຫ້ອງວ່າການເມືອງຄຳເກີດ 1 ປ້າຍ, ຫ້ອງວ່າການເມືອງປາກກະດິງ 1 ປ້າຍ ກຸ່ມບ້ານບຸ່ງກວາງ 1 ປ້າຍ ແລະ ກຸ່ມບ້ານຫຼັກຊາວ 1 ປ້າຍ. ຜ່ານການໂຄສະນາດ້ວຍຫຼາຍຮູບແບບ ເຮັດໃຫ້ປະຊາຊົນຕະຫຼອດຮອດນັກທ່ອງທ່ຽວ ໄດ້ຮັບຮູ້ ແລະ ເຂົ້າໃຈ ເຖິງລະບຽບການ ຊຶ່ງມັນສະແດງອອກໃນການໃຊ້ຈ່າຍຂອງພໍ່ແມ່ປະຊາຊົນ ແລະ ນັກທ່ອງທ່ຽວ ຫັນມາໃຊ້ສະກຸນເງິນກີບເຂົ້າໃນການຊຳລະຫຼາຍຂຶ້ນ ແລະ ເຂົ້າໃຈເຖິງລະບຽບກົດໝາຍທີ່ວາງອອກໃນແຕ່ລະໄລຍະ.

          ນອກນັ້ນ ຍັງໄດ້ລົງຕິດຕາມການເຄື່ອນໄຫວວຽກງານຄຸ້ມຄອງເງິນຕາຕ່າງປະເທດ ແລະ ການສົ່ງເສີມການນຳໃຊ້ເງິນກີບ ຢູ່ຕາມຈຸດດ່ານຕ່າງໆ, ບ້ານລຽບຕາມແຄມແມ່ນ້ຳຂອງ ແລະ ຮ້ານແລກປ່ຽນເງິນຕາ, ໄດ້ຕໍ່ໃບອະນຸຍາດຮ້ານແລກປ່ຽນເງິນຕາປະຈຳປີ 2019 ຈຳນວນ 9 ຮ້ານ ຄື: ເມືອງປາກກະດິງ 2 ຮ້ານ, ປາກຊັນ 3 ຮ້ານ ແລະ ເມືອງຄຳເກີດ 4 ຮ້ານ.

        ຜູ້ເຂົ້າຮ່ວມກອງປະຊຸມ ຍັງໄດ້ປະກອບຄຳເຫັນ ປຶກສາຫາລືຫລາຍປະເດັນ ເພື່ອແນໃສ່ເຮັດໃຫ້ການຄຸ້ມຄອງການນຳໃຊ້ເງິນຕາຕ່າງປະເທດ ແລະ ສົ່ງເສີມການນຳໃຊ້ເງິນກີບຢູ່ແຕ່ລະທ້ອງຖີ່ນໃຫ້ຫັນເຂົ້າສູ່ລະບົບ ແລະ ລະບຽບການເທື່ອລະກ້າວ.