ໃນວັນທີ 3 ກໍລະກົດ 2019 ຢູ່ຫ້ອງປະຊູມຫ້ອງວ່າການປົກຄອງເມືອງໄຊຈຳພອນ ໄດ້ຈັດກອງປະຊຸມເຜີຍແຜ່ຂໍ້ຕົກລົງຂອງກະຊວງປ້ອງກັນຄວາມສະຫງົບ ສະບັບເລກທີ 564/ປກສ ວ່າດ້ວຍຂໍ້ຫ້າມຕໍ່ນາຍ ແລະ ພົນຕຳຫຼວດ ແລະ ຄຳສັ່ງຂອງກະຊວງປ້ອງກັນຄວາມສະຫງົບ ສະບັບເລກທີ 583/ປກສ ວ່າດ້ວຍການນຳໃຊ້ສື່ສັງຄົມອອນລາຍໃນກຳລັງປ້ອງກັນຄວາມສະຫງົບຂຶ້ນ ໃຫ້ກຽດເຜີຍເອກະສານໂດຍ ທ່ານ ພັອ ທອງໃບ ລໍວັນໄຊ ຫົວໜ້າກອງບັນຊາການ ປກສ ແຂວງບໍລິຄຳໄຊ, ມີບັນດາຄະນະພັກ, ຄະນະກອງບັນຊາການ, ນາຍ ແລະ ພົນຕຳຫຼວດກອງບັນຊາການ ປກສ ເມືອງໄຊຈຳພອນ ເຂົ້າຮ່ວມ.

   ໃນກອງປະຊຸມ ໄດ້ຮັບຟັງການເຜີຍແຜ່ເນື້ອໃນເອກະສານວ່າດ້ວຍຂໍ້ຫ້າມ ແລະ ຄຳສັ່ງວ່າດ້ວຍການນຳໃຊ້ສື່ສັງຄົມອອນລາຍ ຂອງກຳລັງປ້ອງກັນຄວາມສະຫງົບ ນຳມາເຜີຍແຜ່ໃຫ້ນາຍ ແລະ ພົນຕຳຫຼວດ ເຊິ່ງນິຕິກຳດັ່ງກ່າວມີທັງໝົດ 6 ໝວດ ແລະ 22 ມາດຕາ ໃນນັ້ນ ທ່ານໄດ້ເນັ້ນໜັກເຖິງບັນດາຂໍ້ຫ້າມ ແລະ ມາດຕະການຕໍ່ຜູ້ລະເມີດສິດ, ໜ້າທີ ແລະ ພາລະບົດບາດຂອງກຳລັງປ້ອງກັນຄວາມສະຫງົບ ພ້ອມດຽວກັນ ທ່ານຫົວໜ້າກອງບັນຊາການ ປກສ ແຂວງ ຍັງໄດ້ຍົກໃຫ້ເຫັນບາງບັນຫາທີ່ເກີດຂຶ້ນໃນໄລຍະຜ່ານມາ ແລະ ຈະຕ້ອງໄດ້ພ້ອມກັນສຸມໃສ່ແກ້ໄຂ ບໍ່ໃຫ້ບັນຫາດັ່ງກ່າວເກີດຂຶ້ນໃນຂົງເຂດກຳລັງປ້ອງກັນຄວາມສະຫງົບໃນໄລຍະຕໍ່ໄປ, ຈຸດປະສົງເພື່ອເຮັດໃຫ້ນາຍ ແລະ ພົນຕຳຫຼວດ ທົ່ວກອງບັນຊາການ ປກສ ເມືອງໄຊຈຳພອນ ກຳແໜ້ນຕໍ່ແນວທາງນະໂຍບາຍຂອງພັກ, ລະບຽບກົດໝາຍຂອງລັດ ເຮັດໃຫ້ການຈັດຕັ້ງປະຕິບັດໜ້າທີ່ວຽກງານວິຊາສະເພາະຂອງນາຍ ແລະ ພົນຕຳຫຼວດຖືກຕ້ອງ ແລະ ສອດຄ່ອງກັບລະບຽບການ ທີ່ຂັ້ນເທິງວາງອອກຢ່າງເຂັ້ມງວດ.