ໃນລະຫວ່າງວັນທີ18-24 ມິຖຸນາ 2019 ນີ້ ຄະນະພັກ, ຄະນະກອງບັນຊາການ ປກສ ແຂວງ ບໍລິຄໍາໄຊ ໄດ້ລົງເຄື່ອນໄຫວເຜີຍແຜ່, ເຊື່ອມຊືມຂໍ້ຕົກລົງຂອງລັດຖະມົນຕີກະຊວງປ້ອງກັນຄວາມສະຫງົບ ວ່າດ້ວຍຂໍ້ຫ້າມຕໍ່ນາຍ ແລະ ພົນຕໍາຫຼວດ ແລະ ຄໍາສັ່ງ ວ່າດ້ວຍການນໍາໃຊ້ສື່ສັງຄົມອອນລາຍໃນກໍາລັງປ້ອງກັນຄວາມສະຫງົບ ຢູ່ ປກສ 06 ຕົວເມືອງ ອ້ອມຂ້າງກອງບັນຊາການ ປກສ ແຂວງ ບໍລິຄໍາໄຊ, ໂດຍການເຜີຍແຜ່ຂອງທ່ານພັນເອກ ທອງໃບ ລໍວັນໄຊ ເລຂາຄະນະພັກ, ຫົວໜ້າກອງບັນຊາການປກສ ແຂວງພ້ອມດ້ວຍຄະນະ, ມີຄະນະຫ້ອງການເມືອງ, ກອງບັນຊາການປກສ  06 ຕົວເມືອງ, ພະນັກງານຫຼັກແຫຼ່ງ, ນາຍ ແລະ ພົນຕໍາຫຼວດເຂົ້າຮ່ວມ.

          ໃນການເຜີຍແຜ່ເຊື່ອມຊືມຄັ້ງນີ້ ຄະນະປະທານ ໄດ້ຍົກໃຫ້ເຫັນເຖິງບົດບາດຂອງກໍາລັງປ້ອງກັນຄວາມສະຫງົບປະຊາຊົນ ທີ່ມີຄວາມເຕີບໃຫຍ່ເຂັ້ມແຂງ ແລະ ມີໜ້າທີ່ຮັບຜິດຊອບໃນການຮັກສາຄວາມສະຫງົບ, ຄວາມເປັນລະບຽບຮຽບຮ້ອຍຢູ່ໃນສັງຄົມ ເຊີ່ງເວລາໃດ ກໍາລັງປ້ອງກັນຄວາມສະຫງົບປະຊາຊົນ ກໍໄດ້ເອົາໃຈໃສ່ໃນການກໍ່ສ້າງພະນັກງານໃຫ້ມີຄຸນນະພາບ, ມີຄຸນທາດການເມືອງໜັກແໜ້ນ, ມີຄວາມຊໍານິຊໍານານທາງດ້ານວິຊາສະເພາະ ແລະ ປະຕິບັດກົດລະບຽບຂອງກໍາລັງປ້ອງກັນຄວາມສະຫງົບຢ່າງເຂັ້ມງວດ ເພື່ອສະກັດກັ້ນ ແລະ ແກ້ໄຂບັນຫາປະກົດການຫຍໍ້ທໍ້ໃນກໍາລັງໃຫ້ໝົດໄປ.

     ເພື່ອເປັນການສືບຕໍ່ປະຕິບັດໜ້າທີ່ ຕາມສິດ ແລະ ພາລະບົດບາດຂອງກຳລັງປ້ອງກັນຄວາມສະຫງົບ ໃຫ້ນັບມື້ເຕີບໃຫຍ່ເຂັ້ມແຂງຂື້ນໄປເລື້ອຍໆນັ້ນ ລັດຖະມົນຕີກະຊວງປ້ອງກັນຄວາມສະຫງົບ ຈຶ່ງໄດ້ອອກຂໍ້ຕົກລົງເລກທີ 564/ປກສ, ລົງວັນທີ 03 ເມສາ 2019 ວ່າດ້ວຍຂໍ້ຫ້າມຕໍ່ນາຍ ແລະ ພົນຕໍາຫຼວດ ໂດຍມີເນື້ອໃນບາງຕອນວ່າ: ຫ້າມໃຫ້ ຫຼື ຮັບສິນບົນໃນທຸກກໍລະນີ, ຫ້າມເຂົ້າຮ່ວມ ແລະ ພົວພັນກັບສິ່ງເສບຕິດທຸກປະເພດທີ່ເກືອດຫ້າມ, ຫ້າມສວຍໃຊ້ໜ້າທີ່ ອອກ ແລະ ນໍາໃຊ້ປ້າຍລົດທີ່ບໍ່ຖືກຕ້ອງຕາມລະບຽບຫຼັກການທີ່ໄດ້ກໍານົດ, ຫ້າມພົວພັນກັບສັງຄົມບໍ່ຖືກຕ້ອງຕາມລະບຽບກົດໝາຍ ແລະ ຮີດຄອງປະເພນີ ເປັນຕົ້ນ ລັກສ້າງຄອບຄົວ, ທໍາມິດສະຈານ, ພົວພັນຊູ້ສາວທີ່ບໍ່ເໝາະສົມ, ພົວພັນກັບບຸກຄົນ ຫຼື ກຸ່ມແກ໋ງທີ່ມີພຶດຕິກໍາລະເມີດລະບຽບກົດໝາຍ, ຫ້າມວິ່ງເຕັ້ນ, ເປັນນາຍໜ້າ, ປົກປ້ອງ, ແຊກແຊງການແກ້ໄຂຄະດີ ແລະ ບັນຫາອື່ນໆ, ຫ້າມເຜີຍແຜ່ ຫຼື ເປີດເຜີຍຂໍ້ມູນຂ່າວສານທາງລັດຖະການ, ຄວາມລັບ ແລະ ອື່ນໆ ທີ່ພາໃຫ້ເສື່ອມເສຍພາບພົດ, ບົດບາດຂອງກໍາລັງ, ຮູບພາບໃນເຄື່ອງແບບ, ພາບເຄື່ອນໄຫວວຽກງານ, ຂໍ້ຄວາມສຽງ, ຄໍາເຫັນທີ່ບໍ່ເໝາະສົມ ຫຼື ສົ່ງຕໍ່ຂໍ້ມູນໂດຍບໍ່ໄດ້ຮັບອະນຸຍາດຈາກຂັ້ນເທິງ ແລະ ການຈັດຕັ້ງທີ່ກ່ຽວຂ້ອງ, ຫ້າມສວຍໃຊ້ໜ້າທີ່ ເອົາເງິນຂອງລັດ, ລວມຫມູ່, ບຸກຄົນ ແລະ ຂອງກາງຄະດີເພື່ອຫາຜົນປະໂຫຍດສ່ວນຕົວໂດຍບໍ່ຊອບທໍາ, ຫ້າມປ່ອຍເງິນກູ້ນອກລະບົບ ແລະ ເຂົ້າຫວຍເກີນຄວາມສາມາດຂອງຕົນ, ຫ້າມສວຍໃຊ້ໜ້າທີ່ເກັບຄ່າຄຸ້ມຄອງນໍາຄົນຕ່າງປະເທດ ແລະ ເປົ້າໝາຍເຄື່ອນໄຫວລະເມີດລະບຽບກົດໝາຍ, ຫ້າມນໍາໃຊ້ລົດລວມເຄື່ອນໄຫວທຸກກໍລະນີທີ່ຜິດຕໍ່ກົດໝາຍ ແລະ ລະບຽບຂອງກໍາລັງ, ຫ້າມນໍາໃຊ້ອາວຸດ, ອຸປະກອນຮັບໃຊ້ວຽກງານວິຊາສະເພາະ ນາບຂູ່ ຫຼື ເຄື່ອນໄຫວເຮັດສິ່ງບໍ່ດີລະເມີດລະບຽບກົດໝາຍເດັດຂາດ, ຫ້າມເມີນເສີຍ, ລະເລີຍໃນເວລາປະຕິບັດໜ້າທີ່ ແລະ ເຂົ້າຮ່ວມກອງປະຊຸມຕ່າງໆເຊັ່ນ: ຫຼີ້ນໂທລະສັບ, ເຄື່ອງມືສື່ສານ, ອັດສຽງໂດຍບໍ່ໄດ້ຮັບອະນຸຍາດ, ຫ້າມເອົາ ຫຼື ຢັ້ງຢືນເອົາຄົນຕ່າງປະເທດ, ຄົນບໍ່ມີສັນຊາດ ເປັນຍາດພີ່ນ້ອງ, ຮັບປະກັນເຂົ້າສໍາມະໂນຄົວ ແລະ ອອກບັດປະຈໍາຕົວພົນລະເມືອງລາວ ຫຼື ບັດຕ່າງດ້າວທີ່ຂັດກັບກົດໝາຍ ແລະ ລະບຽບການ, ຫ້າມເຮັດສັນຍະກໍາດັດແປງໃບໜ້າ, ເສີມດັງ, ດັດແຂ້ວ, ສັກລາຍ, ຍ້ອມສີຜົມ ( ຍົກເວັ້ນສີດໍາ ), ຫ້າມນໍາໃຊ້ເຄື່ອງແບບຂອງກໍາລັງປ້ອງກັນຄວາມສະຫງົບ ເຄື່ອນໄຫວກິດຈະກໍາຕ່າງໆ ທີ່ບໍ່ເໝາະສົມ ແລະ ດື່ມສິ່ງມຶນເມົາທຸກປະເພດ; ຫ້າມວິຈານ ແລະ ໃສ່ຮ້າຍປ້າຍສີການນໍາພັກ-ລັດ, ການຈັດຕັ້ງ, ນາຍ ແລະ ພົນຕໍາຫຼວດ ທີ່ເປັນການສ້າງຄວາມປັ່ນປ່ວນ, ທໍາລາຍພາບພົດ, ບົດບາດຂອງການຈັດຕັ້ງ, ຫ້າມໃຊ້ກິລິຍາມາລະຍາດທ່າທີ, ປາກເວົ້າທີ່ບໍ່ສຸພາບ ແລະ ການນຸ່ງຖື, ໃຊ້ເຄື່ອງປະດັບເອຢ້ອງທີ່ບໍ່ເໝາະສົມໃນເວລາປະຕິບັດໜ້າທີ່.