ຕອນເຊົ້າ ວັນທີ 11 ມິຖຸນາ 2019 ນີ້ ຢູ່ທີ່ຫ້ອງປະຊຸມ ກອງບັນຊາການ ປກສ ເມືອງ ວຽງທອງ, ແຂວງ ບໍລິຄໍໄຊ ໄດ້ຈັດພິທີ ປະກາດປັບປຸງລະບົບການຈັດຕັ້ງນໍາພາ-ບັນຊາ ທົ່ວ ປກສ ເມືອງ, ໂດຍເປັນປະທານຂອງ ທ່ານ ພັນໂທ ປະຊັນ ຫຼວງພິທັກ ກໍາມະການພັກເມືອງ, ເລຂາຄະນະພັກຮາກຖານ, ຫົວໜ້າກອງບັນຊາການ ປກສ ເມືອງ, ມີຄະນະພັກຮາກຖານ, ສະມາຊິກພັກ, ພະນັກງານ-ນັກຮົບ ເຂົ້າຮ່ວມ.

          ທີ່ປະຊຸມ ໄດ້ຜ່ານ ຂໍ້ຕົກລົງຂອງ ກອງບັນຊາການ ປກສ ເມືອງວຽງທອງ ວ່າດ້ວຍການຊັບຊ້ອນ ແລະ ແບ່ງໜ້າທີ່ຮັບຜິດຊອບໃນການຊີ້ນໍາ-ບັນຊາ ຂອງຄະນະພັກຮາກຖານ, ໃນນີ້ຕົກລົງແຕ່ຕັ້ງ ພັທ ວຽງດາວັນ ໄຊຍະເສນ ຜູ້ຊີ້ນໍາພະແນກຕໍາຫຼວດ ໄປຊີ້ນໍາພະແນກສໍາມະໂນຄົວ ແລະ ກໍ່ສ້າງຮາກຖານ, ທ່ານ ພັທ ຈອນ ອຸດລາຍັນ ຜູ້ຊີ້ນໍາພະແນກສໍາມະໂນຄົວ ແລະ ກໍ່ສ້າງຮາກຖານ ໄປຮັບໜ້າທີ່ຊິ້ນໍາພະແນກຕໍາຫຼວດ, ພ້ອມນັ້ນ ຍັງໄດ້ແຕ່ງຕັ້ງ ຮອ ເປ່ມ ແກ້ວຄໍາຫຼວງ ຈາກຮອງຫົວໜ້າ ປກສ ກຸ່ມນາເມືອງ ມາເປັນຮອງຫົວໜ້າພະແນກຄຸ້ມຄອງສໍາມະໂນຄົວ ແລະ ກໍ່ສ້າງຮາກຖານ, ຍົກຍ້າຍ ຮອ ຄໍາເພື່ອນ ສີປະເສີດ ຈາກຮອງຫົວໜ້າພະແນກຄຸ້ມຄອງສໍາມະໂນຄົວ ແລະ ກໍ່ສ້າງຮາກຖານ ໄປຮັບໜ້າທີ່ໃຫມ່ເປັນ ຮອງຫົວໜ້າພະແນກຕໍາຫຼວດ, ຍົກຍ້າຍ ພັຕ ຄໍາເພັງ ມະນີວັນ ຈາກ ຮອງຫົວໜ້າ ພະແນກ ຕໍາຫຼວດ ໄປຮັບໜ້າທີ່ໃຫມ່ ເປັນຮອງຫົວໜ້າ ປກສ ກຸ່ມນາຊວງ, ຍົກຍ້າຍ ຮອ ແສງເດືອນ ຈິນດາວົງ ຈາກ ຮອງຫົວໜ້າ ປກສ ກຸ່ມນາຊວງ ໄປຮັບໜ້າທີ່ໃຫມ່ ເປັນ ຮອງຫົວໜ້າ ປກສ ກຸ່ມນາເມືອງ.

       ໃນພິທີ ຍັງໄດ້ເຜີຍແຜ່, ເຊື່ອມຊືມຂໍ້ຕົກລົງຂອງກະຊວງປ້ອງກັນຄວາມສະຫງົບ ວ່າດ້ວຍຂໍ້ຫ້າມຕໍ່ນາຍ ແລະ ພົນຕໍາຫຼວດ, ແຈ້ງການຂອງກົມໃຫຍ່ການເມືອງ ວ່າດ້ວຍການຍົກສະຖານະ ຂອງໂຮງຮຽນ ປກສ ຊັ້ນກາງຂຶ້ນເປັນໂຮງຮຽນ ປກສ ຊັ້ນສູງຈໍານວນ 4 ແຫ່ງ, ຜ່ານມະຕິຕົກລົງຂອງຄະນະປະຈໍາພັກແຂວງ ວ່າດ້ວຍການແບ່ງປັນຜູ້ແທນສົມບູນ ແລະ ສໍາຮອງໃຫ້ອົງຄະນະພັກເມືອງ, ບົດແນະນໍາຂອງອະນຸກໍາມະການບຸກຄະລາກອນຂັ້ນແຂວງ ກ່ຽວກັບການປ່ອນບັດເລືອກເອົາຜູ້ແທນສົມບູນ ແລະ ສໍາຮອງ ໄປຮ່ວມກອງປະຊຸມໃຫຍ່ ຄັ້ງທີ VII ຂອງອົງຄະນະພັກແຂວງ ປີ 2020. 

      ໂອກາດດຽວກັນ ຍັງໄດ້ປະກາດການເລື່ອນຊັ້ນ, ປະດັບຊັ້ນ ໃຫ້ນາຍ ແລະ ພົນຕໍາຫຼວດ ຂອງກອງບັນຊາການ ປກສ ເມືອງວຽງທອງ ຈໍານວນ 10 ສະຫາຍ, ໃນນີ້ ເລື່ອນຊັ້ນ ພັຕ ຂຶ້ນຊັ້ນ ພັທ ຈໍານວນ 01 ສະຫາຍ, ຮອ ຂຶ້ນຊັ້ນ ພັຕ 02 ສະຫາຍ, ຮທ ຂຶ້ນ ຮອ ຈໍານວນ 07 ສະຫາຍ.