ພິທີເຊັນສັນຍາສຳປະທານ ໂຄງການພັດທະນາກະສິກຳ ປູກໝາກມັງກອນ ໄດ້ຈັດຂຶ້ນໃນວັນທີ 11 ມິຖຸນາ 2019 ຢູ່ຫ້ອງວ່າການປົກຄອງແຂວງ ຕາງໜ້າໃຫ້ແກ່ອຳນາດການປົກຄອງແຂວງບໍລິຄຳໄຊ ເຊັນໂດຍ ທ່ານ ເລື່ອນວິໄລ ຈັນທະລາພັນ ຫົວໜ້າພະແນກແຜນການ ແລະ ການລົງທຶນແຂວງ, ຕາງໜ້າບໍລິສັດຜູ້ລົງທຶນພັດທະນາ ເຊັນໂດຍ ທ່ານ ເໝົາຮົງຕ່າວ ປະທານບໍລິສັດງົວເກົ້າໂຕ ພັດທະນາກະສິກຳບໍລິຄໍາໄຊ ຈຳກັດ ຊ້ອງໜ້າໂດຍ ທ່ານ ແດນປີ ມູນທະດີ ຫົວໜ້າຄະນະຈັດຕັ້ງແຂວງ, ທ່ານ ບຸນເສັງ ປະທຳມະວົງ ຮອງເຈົ້າແຂວງບໍລິຄຳໄຊ ພ້ອມດ້ວຍຫົວໜ້າພະແນກການອ້ອມຂ້າງ, ເມືອງ ແລະ ພະນັກງານວິຊາການເຂົ້າຮ່ວມເປັນສັກຂີພິຍານ.

       ຕາມການໃຫ້ສຳພາດຂອງ ທ່ານ ສອນໄຊ ທອງວິໄລ ທີ່ປຶກສາບໍລິສັດງົວເກົ້າໂຕ ພັດທະນາກະສິກຳບໍລິຄຳໄຊ ຈຳກັດ ວ່າ: ບໍລິສັດ ແມ່ນມີຄວາມຕ້ອງການສຳປະທານ ໂຄງການພັດທະນາກະສິກຳ ປູກໝາກມັງກອນ ຢູ່ເຂດບ້ານນາຫີນ ເມືອງປາກກະດິງ ໃນເນື້ອທີ 130 ເຮັກຕາ ມູນຄ່າ 15.000.000 ໂດລ່າ, ອາຍຸຂອງສັນຍາ 30 ປີ. ໂດຍຈະໄດ້ປູກໝາກມັງກອນ 2 ສາຍພັນ ຄື: ພັນສີແດງ ເບີ 1 ຊິນຕູ່ ແລະ ພັນສີເຫຼືອງ ຢຽນວໍກໍ  ເຊິ່ງຈະໄດ້ລົງມືປູກຕົວຈິງໃນ ເດືອນມີນາ 2020 ແລະ ຈະໃຊ້ເວລາ 2 ປີກໍ່ຈະເກັບຜົນຜະລິດໄດ້ ຕາມເປົາໝາຍຂອງບໍລິສັດ ພັນສີແດງຈະສາມາດເກັບຜົນຜະລິດໄດ້ຕ່ຳສຸດ 40 ໂຕ່ນ ແລະ ສີເຫຼືອງ 15 ໂຕ່ນຕໍ່ປີ ໂດຍຈະເນັ້ນສົ່ງອອກຂາຍຕະຫຼາດຕ່າງປະເທດເປັນຫຼັກ.

     ທ່ານ ສອນໄຊ ທອງວິໄລ ຍັງໄດ້ໃຫ້ຮູ້ຕື່ມອີກວ່າ ໂຄງການດັ່ງກ່າວນີ້ ຈະສາມາດສ້າງວຽກເຮັດງານທຳໃຫ້ພໍ່ແມ່ປະຊາຊົນໄດ້ 260 ຄົນ ແລະ ຄ່າຕອບແທນຕ່ຳສຸດແມ່ນ 1.600.000 ກີບ ຫຼື ປະມານ 200 ໂດລ່າຕໍ່ຄົນຕໍ່ເດືອນ ນີ້ຈະເປັນຜົນດີຕໍ່ການພັດທະນາເສດຖະກິດຂອງແຂວງ ກໍ່ຄືການພັດທະນາເສດຖະກິດຄອບຄົວຂອງພໍ່ແມ່ປະຊາຊົນເມືອງປາກກະດິງ.